Durante e di dos parti di e Common Good Conference, a tuma luga un ceremonia special den cual oficialmente a institui Fundacion Bernhardstraat.
Pa oficialisa e fundacion aki, Sr. John Hassel como presidente di “Stichting Revitalisation Bernhardstraat”, hunto cu Inky Richardson, a firma a acto notarial cu notario Theodore Johnson di Johnson Notary. E momento aki ta marca un paso significativo pa e futuro di Bernhardstraat y pa e fortalecemento di e comunidad di San Nicolas completo, segun un comunicado di gobierno.
Fundacion Bernhardstraat tin como meta busca sosten y cooperacion di empresanan y sponsor pa eleva Bernhardstraat for di su estado actual, transforma e caya den un luga unda e habitantenan por biba den harmonia cu otro y forma un comunidad basa riba respet, cuido mutuo y responsabilidad comparti.
E iniciativa ta enfoca riba mehora e calidad di bida den bario, creando un ambiente unda hende no solamente ta biba banda di otro, sino cu nan ta realmente cuida otro y traha hunto pa un miho futuro.
