Gabinete AVP-FUTURO ta informa cu desde 1 di januari 2026 personal di gobierno den “kaderfuncties” y funcionnan specialisa lo conoce un structura salarial nobo. Meta di esaki ta preveni salida di profesionalnan den e rangonan mas halto di e aparato gubernamental. E cambio aki ta encera personal di gobierno den “kaderfuncties” y funcionnan specialisa lo conoce un trayecto di crecemento salarial den nan respectivo rangonan.
E compromiso y punto di salida di Gabinete AVP-FUTURO ta y lo sigui duna e beneficio di desaroyo back na nos comunidad, segun un comunicado di gobierno. Awor ta nos profesionalnan den gobierno cu tin como salario solamente un schaal sin e posibilidad di haya periodieken y cu ta haci diferente trabaonan grandi continuamente.
Basa riba e Meibrief cu ta contene diferente opcion compila pa Departamento di Finanzas, Ministerraad riba peticion di minister Geoffrey Wever ta determina loke lo bira e cuadro financiero y prioridadnan pa e Presupuesto 2026. Un di e prioridad tabata pa preveni salida di profesionalnan den e rangonan mas halto di e aparato gubernamental. P’esey basa riba conseho di Departamento di Recurso Humano, Conseho di Minister riba 30 di mei 2025 a tuma e decision pa aloca 5 miyon florin pa mehora e structura salarial di ambtenaarnan den e rangonan mas halto, di cual a usa 3.3 miyon florin pa e aumento salarial aki.
Investigacionnan di salario di Deloitte na 2016 y di Curconsult di 2023 ta mustra cu salarionan den e schaalnan mas halto den sector publico ta na un promedio mas abao cu salarionan den sector priva. E diferencianan mas significativo den salarionan maximo ta den caso di posicionnan di management, caminda e salarionan den sector priva den tur caso ta considerablemente mas halto.
Riba esaki indexering di sumanan fiho na 2008, 2011, 2012 y 2013 incluso e indexering via e compensacionnan anual, a conduci na un desbalansa entre e schaalnan halto den e structura salarial y esnan na schaalnan mas abao. Considerando esaki, a usa e indexering den forma di porcentahe cu e meta pa trece mas balans den e structura di salario.
Ta un realidad cu den e Bezoldigingsregeling Aruba 1986, e schaalnan 13 te cu 16 ta e unico schaalnan cu no conoce periodieken, compara cu otro schaalnan cu si conoce periodieken, tin te hasta 15 periodieken.
E cambio di maneho aki ta dirigi riba funcionarionan publico cu responsabilidad riba area di maneho y specialisa y tambe riba funcionarionan den management cu ta dificil pa haya y mantene, segun e comunicado. Den gobierno e posibilidadnan pa crece den funcionnan cu schaal 13 te cu 16 ta hopi limita mientras e grupo aki no conoce aumento via periodieken.
Gabinete AVP-FUTURO a entrega riba 29 di augustus 2025 e presupuesto 2026 na Parlamento, na tempo y conforme ley. Despues cu Parlamento por a haci tur su preguntanan riba e Presupuesto 2026, Parlamento di Aruba a duna su aprobacion despues di e tratamento publico di esaki den december 2025, un prioridad di maneho cu ta drecha structura salarial di ambtenaarnan den e rangonan mas halto ta un realidad. Gabinete AVP-FUTURO ta sigui su compromiso pa hiba un maneho financiero responsabel y prudente segun normanan di presupuesto hancra den ley y sigui duna e beneficio di desaroyo economico back na pueblo di Aruba, segun e comunicado.
Un palabra di danki ta bay pa Departamento di Recurso Humano pa su conseho y implementacion di e maneho nobo. Un maneho cu e meta pa preveni cu Gobierno como dunador di trabao no perde su “kaderpersoneel”. Sector priva ta keda atractivo pesey nos como gobierno mester keda inverti pa percura cu cierto funcionnan esencial den e aparato gubernmental no keda bashi y tranca entre otro trahamento di presupuesto, di leynan y di maneho, segun minister Arthur Dowers.
Minister Geoffrey Wever ta gradici Conseho di Minister di Gabinete AVP-FUTURO pa reafirma e compromiso pa un maneho financiero responsabel y prudente. Cumpli cu normanan presupuestario, crea e surplusnan ta un esfuerso colectivo pero duna bek ta muestra di un vision, di un compromiso, di curashi y di tuma e decision pa preveni cu gobierno como dunador di trabao perde profesionalnan den cierto rango y funcion.
