Siman pasa, Oficina Central di Estadistica, CBS a publica su Indice di Prijs di Consumo (CPI) pa luna di januari 2026. Den esaki a nota un reduccion leve den e bestaansminimum: Afl. 8 pa famia y Afl. 3 pa un hogar di un adulto. Esaki ta laga un gap entre salario minimo y loke un persona of famia “mester pa por funciona den sociedad.”

E bestaansminimum pa un hogar consistiendo di dos (2) adulto y dos (2) mucha (edad 0-14) na Januari 2026 ta Afl. 5,529, un caida di Afl. 8 compara cu December 2025 (Afl. 5,537). E bestaansminimum pa un hogar di un (1) adulto ta Afl. 2,633, un caida di Afl. 3 compara cu December 2025 (Afl. 2,636).

Kico ta un “Bestaansminimum” y con e ta ahusta?

CBS ta defini un bestaansminimum como e nivel minimo di entrada cu ta ser percibi necesario pa un persona of famia por funciona den sociedad di un manera adecuado y socialmente aceptabel. Ora nos usa e definicion “Bestaansminimum”, en realidad ta ser referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta ser considera necesario pa biba un bida liber di privacionnan basico” (Nacionnan Uni). Un indice a ser crea pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna. Cada luna e indice aki ta ser ahusta, a base di e prijsnan di alimento, paña, vivienda, transporte y otro articulonan den e canasta.

E bestaansminimum actual ta ser basa riba e rapport “Bestaansminimum 2010” publica door di CBS na December 2010, y cual ta ser actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (edad 0-14). E peso total pa un hogar asina ta 2.1 (1.0+0.5+0.3+0.3).

Gap persistente

Aunke e bestaansminimum a bira un caida chikito na januari 2026, e espacio entre loke un persona of famia mester pa biba adecuadamente y loke ley ta garantisa ta keda significante. Entrante 1 di januari 2026, salario minimo pa ora na Aruba ta Afl. 11,58 – loke pa un empleado cu ta traha 40 ora pa siman ta resulta den un salario mensual di Afl. 2.007,05. E bestaansminimum pa hogar di un adulto, segun CBS, ta Afl. 2.633 pa luna – un gap di mas di 600 florin cu un soltero ganando salario minimo no por cubri.

Pa un famia di dos adulto y dos mucha, e situacion ta mas critico. Hasta si ambos adulto gana salario minimo, nan entrada combina di Afl. 4.014 ta keda 1.500 florin bao di e bestaansminimum di Afl. 5.529. E cifranan aki ta ilustra cu e aumento recien di salario minimo – introduci pa parlamento na september 2025 y vigente for di januari ultimo – ainda no ta suficiente pa cera e gap entre loke trahadornan ta gana y loke realmente nan tin mester.