Nationaal Restauratiefonds (NRF), cu ta e Fondo Nacional di Restauracion di Monumento na Hulanda, ta un fondo financiero cu ta duna prestamo cu interes abao pa yuda propietario y gobierno na restaura y mantene monumento y herencia cultural. E meta ta pa preserva edificio historico y yuda nan bira sostenibel pa futuro.
Uğur Özcan, Director-Gerente di Nationaal Restauratiefonds, a reuni cu Prome Minister Mike Eman (AVP) dialuna atardi. E tabata acompaña pa director di Monumentenfonds Aruba, Anne Witsenburg. Özcan a mustra interes den e oportunidadnan cu Aruba ta ofrece. Uğur Özcan tin un background amplio den organisacion publico y priva, specialmente den sector financiero, y su vision ta enfoca riba fortalecemento di herencia cultural cu un compromiso social fuerte. Özcan a señala cu Aruba tin hopi potencial ora trata di preservacion di patrimonio. El a describi e colaboracion como inspirador, resaltando e importancia di mantene identidad Arubiano, e balornan y normanan, mientras cu ta crea oportunidad pa crecemento economico y empleo.
Nationaal Restauratiefonds ta ofrece apoyo financiero cu interes abao y periodo largo, pa haci restauracion di nos monumentonan mas na nos alcance. Segun Özcan, esaki ta yuda realisa e proyectonan importante na Aruba, tanto awor como den futuro.
Un ehempel concreto di apoyo financiero di NRF na Aruba ta Cas Veneranda, unda e restauracion ta casi completo. E transformacion, segun Özcan, ta impresionante: di un estado di deterioro pa un edificio restaura cu respet pa su historia, pero cu un upgrade moderno y elemento di sostenibilidad. Asina, e edificio ta keda preserva pa futuro generacion mientras cu ta duna bida nobo n’e patrimonio.
Cu varios proyecto ainda den pipeline, e Nationaal Restauratiefonds tin confiansa cu Aruba lo sigui tuma paso significativo den preservacion di su herencia.
E vision di Prome Minister mr. Mike Eman rib’e restauracion di e monumentonan ta basa riba rescate, preservacion y uzo funcional di herencia historico di Aruba. Eman su enfoke tin como meta pa fortifica identidad cultural, revitalisa centro di ciudad, specialmente Oranjestad y promove turismo sostenibel.
Durante Gabinete Eman I y II e maneho a enfoca riba cuida e edificionan historico cu tabata na riesgo di deterioro y transforma nan pa uzo moderno. Esaki ta inclui restauracion di edificionan di gobierno, centro administrativo y espacio historico pa uzo publico y institucional. Un elemento clave den e vision te colaboracion entre sector publico y priva, cu apoyo di e institutonan financiero, pa garantisa cu e herencia di Aruba keda preserva pa futuro generacion.
