(AFP)—Francia y Reino Uni a bisa diahuebs cu nan lo lidera un mision multinacional pa sigura libertad di nabegacion den Estrecho di Hormuz, mientras nan a enfatisa cu e forsa lo ser completamente defensivo y solamente lo ser desplega ora tin paz duradero den e region.
Prome minister Britanico Keir Starmer y presidente Frances Emmanuel Macron a confirma cu e forsa ta ser forma mientras nan tabata co-presidi charla internacional na Paris enfoca riba sigura comercio fluido door di e coredor maritimo crucial.
E conferencia, cual a tuma luga mayormente via video, a reuni un total di 49 pais for di Europa y Asia, representa na diferente nivel incluyendo decenas di hefe di estado y gobierno.
Ni Merca ni Iran, como partidonan den e guera, no a participa den e reunion.
Iran a impone un blokeo mesora cu Merca y Israel a lansa e guera contra republica Islamico dia 28 di februari.
Impacto economico a propaga mundialmente, causando temor di inflacion, preocupacion riba suministro di combustible y temor di escasez di cuminda.
Pero mercado a reacciona cu alivio ora minister di Exterior di Iran Abbas Araghchi—den un publicacion riba X durante e charla na Paris—a bisa cu Estrecho di Hormuz awor ta habri pa embarcacion comercial tanten cu e tregua den Medio Oriente dura.
Starmer a bisa cu e mision multinacional por ser desplega “tan pronto cu condicionnan permiti”.
“Esaki lo ta estrictamente pacifico y defensivo como un mision pa duna seguridad na embarcacionnan comercial y yuda cu limpieza di mina,” el a bisa, agregando cu “mas cu un decenas pais caba a ofrece pa contribui recurso.”
E lidernan a duna bon binida na e anuncio di Teheran, pero a pidi un “reapertura completo y sin condicion pa tur partidonan,” Macron a bisa.
Presidente Frances a bisa cu e anuncio ta haci e mision multinacional “aun mas importante pasobra esaki ta loke lo permiti e anuncionan aki consolida a corto plazo y, sobre todo, tin un oportunidad pa dura.”
Macron a describi e mision como “neutral” y “completamente separa di e partidonan” involucra den e guera.
Prome minister Italiano Giorgia Meloni, presente personalmente na e reunion, a bisa cu su pais ta “cla pa participa” den e forsa, pero a enfatisa cu hostilidad mester para prome.
Canciyer Aleman Friedrich Merz, tambe na Paris, a agrega cu lo ta “deseable” pa Merca forma parti di e mision.
E reunion a ofrece un oportunidad pa Europa mustra su capacidad despues cu gran parti a keda na un banda pa Merca den esfuersonan diplomatico pa termina e guera.
Presidente di Merca Donald Trump a bisa riba red social despues di e anuncio di Teheran cu el a rechasa un oferta di NATO pa yuda sigura Estrecho di Hormuz, bisando e alianza transatlantico pa “KEDA LEU.”
No tabata cla si e tabata referi na reunion na Paris, unda NATO no a representa.
Starmer a bisa cu mundo “mester Estrecho di Hormuz completamente habri pasobra asina nos ta mantene prijsnan abao pa nos pueblo y para daño economico global.”
