Gobierno a anuncia medida contra uso ilegal di stepnan electrico riba caminda publico

Durante un conferencia di prensa ayera mainta minister di Husticia, Integracion, Transporte Publico y Energia, Arthur Dowers, a anuncia un medida nobo pa atende preocupacionnan creciente relaciona cu uso y huur di step, scooter y bicicletanan electrico, principalmente den area di Palm Beach. E situacion a desaroya durante un periodo largo te bira un problema serio di orden y seguridad, impulsa den gran parti pa un aumento rapido di actividad di huur e tipo di vehiculonan aki sin permiso debido.

Minister Dowers a splica cu desde cu el a asumi responsabilidad como minister, el a pone seguridad den trafico como un prioridad importante. Un comision special di trafico a ser estableci pa analisa e diferente riesgonan den e sistema di trafico di e isla. Resultado inicial a mustra rapidamente cu tin problema significante den area turistico, specialmente Palm Beach, unda un gran cantidad di stepnan electrico a contribui na desorden, peliger y aumento di riesgo di accidente.

Segun e mandatario hopi usuario di e tipo di vehiculo aki, incluyendo menor di edad, ta conduci sin respet pa reglanan di trafico.

“Nos a caba di mira con un mucha menor di edad bastante chikito ta pasa riba un step, core contra trafico y crusa pa loco. Ta lamentable cu e cosnan ki ta pasa pasobra ora algo pasa e personanan no ta bay bisa cu ta nan mesun falta, nan ta bay bisa ta pais Aruba, y bo ta bay mira diferente website ta bisa cu Aruba ta iresponsable y insigur. Mi ta kere ta momento pa hala faha mara,” el a enfatisa.

Despues di analisa e riesgonan cu uso di e tipo di vehiculonan aki riba caminda publico ta trece , gobierno a conclui cu ta necesario pa fortalece e medida di control y cuminsa cu aplicacion mas estricto di ley.

Minister Dowers a splica cu segun ley actual, tur stepnan electrico cu ta riba tereno publico ta ilegal. No tin ningun base legal den Aruba cu permiti uso di e vehiculonan aki riba caminda publico of acera. E regla aki ta aplica pa tur caso sin excepcion.

Como consecuencia, autoridadnan policial lo cuminsa den e dianan cu ta bin cu un campaña di control mas fuerte. Hendenan cu ta ser haya core riba step electrico riba caminda publico lo ser para, e vehiculo lo ser confisca. E accion aki no ta limita solamente na Palm Beach, pero lo extende tambe pa otro area unda a observa comportamento similar, incluyendo camindanan principal manera Watty Vos Boulevard y otro vecindarionan.

Un otro aspecto importante di e problema ta e actividad comercial relaciona cu huur di e vehiculonan aki. Den Palm Beach, hopi di e stepnan ta ser ofrece pa huur. Sinembargo, segun regulacion di Aruba, cualkier negoshi cu kier huur vehiculo mester tin permiso di Departamento di Transporte Publico. Stepnan electrico, minister Dowers a indica, no tin ningun categoria legal cu permiti otorgamento di tal permiso, loke ta nifica cu tur e operacionnan di huur di e tipo di vehiculonan aki ta ilegal.

Ademas di uso riba caminda, e manera cu e vehiculonan ta ser laga para riba acera y otro espacio publico tambe ta contra ley. E mandatario a splica cu ordenansa local ta prohibi pa para vehiculo, riba tereno publico sin permiso di gobierno. Den hopi caso, e stepnan ta ser laga den luga publico, causando obstruccion pa peatonnan y contribuyendo na desorden den area. Minister a indica cu e practica aki lo ser atendi durante e periodo di control.

Doñonan di negoshi cu a inverti den e tipo di actividad aki ta enfrenta un situacion dificil. Hopi di nan no ta registra na Departamento di Transporte Publico, loke ta haci dificil pa autoridadnan notifica nan formalmente. Pa e motibo aki, gobierno a haci e anuncio publicamente, urgiendo tur operador pa retira e step, scooter of bicicleta electrico for di espacio publico mesora.

Den caso cu vehiculonan ser confisca, doñonan lo mester tuma contacto cu autoridadnan pa regla nan devolucion. E proceso aki por inclui procedemento administrativo y pago di boet. Autoridadnan ta enfatisa cu e medida aki ta destina pa stimula cumplimento y evita cu e problema ta sigui aumenta.

Minister Dowers a splica cu tin negoshinan cu tin area designa pa parkeer nan step of bicicletanan electrico. El a indica cu e step of bicicleta por keda para na e area ey solamente, pero si nan ser usa of movi y para otro caminda, autoridadnan lo confisca e stepnan.

E mandatario a confirma cu actualmente no tin posibilidad pa introduci permiso pa stepnan electrico. Ley vigente no ta ofrece ningun base pa regula uso di e vehiculonan aki riba caminda publico, y no tin plan inmediato pa cambia e situacion aki. E decision aki ta basa riba preocupacionnan di seguridad y dificultad pa integra e tipo di transporte aki den sistema existente.

Uso di e vehiculonan riba tereno priva ta keda un excepcion. Hotel, resortnan y otro propietario di tereno priva por dicidi pa permiti uso di stepnan dentro di nan propiedad, siempre y cuando nan no drenta tereno publico. Responsabilidad den e caso aki ta keda cu e doño di e propiedad.

Campaña di control lo inclui tambe scooter y otro vehiculonan electrico cu no ta cumpli cu reglanan legal. Minister Dowers a splica cu pa un scooter ser huur legalmente, e mester ta registra, aproba pa Departamento di Transporte Publico y tin identificacion oficial, nummerplaat. Hopi di e vehiculonan cu ta circula actualmente no ta cumpli cu e exigencianan aki.

E mandatario a indica cu nan a observa tambe cu scooter ta ser laga para riba acera publico of den luga cu ta obstaculisa trafico di peatonnan. El a enfatisa cu e tipo di comportamento aki tambe ta ilegal y lo ser sanciona. Negoshinan cu ta ofrece huur di scooter mester sigura cumplimento cu tur regla aplicabel.

Pa loke ta trata bicicleta electrico, minister a expresa preocupacion similar. El a splica cu aunke bicicleta tradicional ta permiti riba caminda y pista di bicicleta, version electrico cu motor no ta adapta pa uso sigur den trafico mixto. Nan velocidad y caracteristica ta crea riesgo adicional.

E meta principal di e medida aki ta pa reestablece orden y aumenta seguridad den trafico di Aruba. Gobierno a reconoce cu control anterior no tabata consistente, loke a permiti situacion crece. Cu e analisis di comision di trafico como base, gobierno ta implementa un acercamento mas structura.

Pa facilita transicion, un periodo corto di un of dos dia ta ser duna pa hende of negoshinan retira nan vehiculonan ilegal for di espacio publico. Despues di e periodo aki, control activo lo cuminsa incluyendo confiscacion.

E iniciativa aki ta forma parti di un compromiso mas amplio pa mantene standard di seguridad, specialmente den area cu hopi actividad turistico. Gobierno ta busca reduci accidente, mehora fluho di trafico y sigura cu espacio publico ta keda accesibel y sigur pa tur usuario.