(AFP)—Gobierno di Merca a hacie mas facil diahuebs pa Mericanonan usa cannabis pa motibonan medico door di reclasifica e droga y permiti mas investigacion riba su seguridad y eficacia.
Marihuana awor ta ser describi como algo cu tin potencial di adiccion moderado te abao, “expandiendo acceso di pashentnan na tratamentonan y dunando dokternan mas poder pa tuma decisionnan medico mas informa,” fiscal general interino Todd Blanche a bisa.
Gobierno ta parce di ta siguiendo cambionan amplio den sociedad di Merca — uso di marihuana pa adulto pa cualkier motibo ta legal den 24 estado y capital di Merca, y aproba pa uso medicinal den 40 estado.
Te cu diahuebs, ainda e tabata clasifica federalmente como “Schedule I,” un categoria pa droganan manera heroina y metanfetamina cu no tin uso medico acepta y un potencial halto pa abuso.
Productonan di marihuana aproba of regula pa agencia federal of estatal awor a ser movi pa e tercer nivel den un sistema di cinco nivel.
Substancianan “Schedule III,” cu ta inclui ketamina y steroid anabolico, ta ser considera cu tin balor medico y menos potencial pa abuso.
Departamento di Husticia a bisa cu e medida di diahuebs ta sigui un orden ehecutivo di presidente Donald Trump na december riba aumenta investigacion di marihuana medico.
E tambe a pidi pa audiencia acelera cuminsando juni cu lo “duna un caminda rapido y conforme cu ley pa evalua cambionan mas amplio den status di marihuana bao di ley federal,” segun un declaracion di DOJ.
‘Pidiendo’ pa cambio
E medida hopi spera no ta legalisa uso di marihuana den estadonan unda ainda e ta prohibi, ni tampoco ta permiti su uso como droga recreativo.
Pero Trump a bisa na december cu esaki lo haci marihuana mas accesibel pa “uso medico legitimo” manera pa hende cu cancer y dolor cronico.
“Tin hende ta pidiendo mi pa haci esaki. Hende cu ta den hopi dolor,” Trump a bisa den Oficina Oval.
Trump, ken tabata rondona pa expertonan medico den bata blanco pa e anuncio, a agrega cu e orden “no ta legalisacion” di marihuana.
El a agrega: “Mi semper a bisa mi yiunan, no tuma droga, no bebe, no fuma, y keda leu di droga.”
Presidentenan di Merca no por reclasifica un droga so nan mes. Orden di Trump a instrui Departamento di Husticia pa acelera e proceso.
Gobierno di Democrata Joe Biden tabata sigui e reclasificacion, pero e esfuerso no a keda completa prome cu Trump a asumi poder na comienso di 2025.
Merca tin un mescla di reglamentonan estatal riba distribucion comercial, posesion recreativo y cultivo personal di cannabis.
E medida di gobierno tin como meta pa baha obstaculonan pa investigacion, pasobra autorisa estudio clinico riba substancianan “Schedule I” por rekeri varios nivel di aprobacion.
“E accionnan aki lo permiti investigacion mas enfoca y riguroso riba seguridad y eficacia di marihuana,” Blanche a bisa.
Esaki tambe por ta un gran impulso fiscal pa companianan cu legalmente ta cultiva y bende cannabis.
