(AFP)—E organo di supervision interno di Departamento di Husticia di Merca a bisa diahuebs cu lo investiga si e departamento a cumpli cu un ley cu ta obliga publicacion di miyones pagina di documentonan den e caso di delincuente sexual Jeffrey Epstein.
E ley, cu a ser aproba november pasa, a obliga administracion di Trump pa mustra transparencia total riba e expediente delicado di Epstein, e playboy miyonario cu a muri den prison na 2019 mientras e tabata wardando huicio pa acusacionnan di trafico sexual.
Pero despues cu a publica un gran cantidad di documento — culminando cu liberacion di alrededor di tres miyon pagina pa fin di januari — Departamento di Husticia (DOJ) a haya critica fuerte.
Legisladornan di ambos partido a keha cu tabata falta informacion, specialmente esnan di un caso masivo contra e delicuente cu a keda tapa.
Na mesun momento, e departamento a publica nomber y potretnan di victimanan di Epstein cu te e momento ey no tabata publicamente conoci, causando indignacion. E partinan sensitivo aki despues a ser kita for di dominio publico.
Ley “Epstein Files Transparency Act” a obliga DOJ pa publica tur documento relaciona cu Epstein den nan posesion dentro di 30 dia.
E ley a exigi cu nomber y otro informacion personal di victimanan — cu segun FBI ta mas cu 1.000 — mester ser redacta.
Pero personanan influyente cu tabata amistoso cu Epstein no por ser protegi “riba base di berguensa, daño di reputacion of sensibilidad politico,” segun e ley.
Oficina di Inspector General di e departamento a anuncia cu e ta habriendo un investigacion riba con DOJ a cumpli cu e ley.
E investigacion lo evalua e procesonan pa identifica, redacta y publica documentonan conforme e ley. Un informe final lo ser presenta.
Na februari, legisladornan di ambos partido cu a haya acceso pa mira e archivonan completo sin redaccion na facilidadnan di DOJ a bisa cu ainda tin informacion den e documentonan publico cu tabata ser protegi indebidamente.
Solamente mencion di un persona den e archivonan Epstein no ta nifica cu e persona ey a comete delito.
Pero desde e publicacion grandi di documentonan dia 30 di januari, personanan prominente rond mundo a keda afecta pa revelacionnan di nan relacion cu Epstein. Esaki a conduci na investigacionnan criminal, aresto y retironan, principalmente den Europa.
