(AFP)—Merca ainda no a paga su cuota atrasa na Organisacion Mundial di Salud (WHO), hefe di e organisacion a bisa diaranson, unda e salida di Washington ta depende riba pago di debe.
Director general di agencia di salud di UN, Tedros Adhanom Ghebreyesus, a bisa cu e ta spera cu Merca lo paga loke nan debe — un condicion cu nan mes a pone pa sali for di e organisacion.
Presidente di Merca Donald Trump, na su prome dia back na poder na januari 2025, a entrega na WHO un aviso di un aña pa e salida di su pais.
“Pa loke ta e debe di Merca, e salida di Merca tin dos condicion,” Tedros a bisa durante un conferencia di prensa cu asociacion di periodista di UN, ACANU.
“Un ta un notificacion un aña adelanta, cual a ser cumpli. Y e segundo ta paga e debe, asina cu nos ta spera nan lo haci esaki, pero nos no a ricibi nada ainda.”
Merca tabata e contribuyente mas grandi na e presupuesto di WHO.
Tedros a bisa cu no tin “ningun señal” cu Washington lo paga e placa.
Pero el a agrega: “Pa bisa e berdad, e no ta trata placa.
“E asunto ta cu seguridad di salud mester universalidad y Merca, cu su salida, ta haci su mes insigur y tambe e resto di mundo insigur. Pues nos tur ta perde.
“Asina cu nos enfoke no ta riba placa. E enfoke ta riba yuda Merca compronde y reconsidera.
“Unda tin un buraco, virus ta gana. E ta asina simpel.
“Ta cooperacion global y solidaridad ta e mihor respuesta.”
Aunke bandera di Merca no ta bula pafor di sede di WHO na Ginebra mas, e organismo decisivo di WHO — e asamblea anual di estado miembronan — lo dicidi riba e salida di Merca ora nan reuni for di 18 te 23 di mei.
Constitucion di WHO no tin un clausula di salida.
Pero Merca a reserva e derecho pa sali ora el a uni cu WHO na 1948 — cu condicion di duna un aviso di un aña y cumpli cu tur su obligacion financiero pa e aña fiscal.
E periodo di aviso a pasa caba pero Washington ainda no a paga su cuota di 2024 of 2025, debiendo alrededor di $260 miyon.
Na januari, ora e periodo a vence, secretario di Estado di Merca Marco Rubio y secretario di Salud Robert F. Kennedy Jr. a critica WHO, alegando cu e organisacion a “daña y destrui tur loke Merca a haci p’e”, y cu “insultonan contra Merca” a continua te fin.
“E contrario ta berdad,” WHO a responde.
A pesar di e critica final di Kennedy, e secretario di Salud ainda ta papia regularmente cu Tedros.
“Nos ta keda den contacto de vez en cuando,” e hefe di WHO a bisa periodistanan.
