ARA ta presenta recomendacion cla pa corigi deficiencia den supervision di presupuesto

Den su rapport di investigacion nobo, Algemene Rekenkamer Aruba (ARA) a critica e maneho y supervision di e fondonan di presupuesto di Aruba (begrotingsfondsen). Segun e rapport, e sistema actual no ta ofrece suficiente garantia pa un uso legal, transparente y responsabel di fondo publico. ARA ta conclui cu deficiencianan structural den gobernacion, supervision, presupuesto y responsabilisacion a crea un situacion unda grandi cantidad di recurso financiero ta move fuera di control efectivo di Parlamento.

E investigacion a enfoca riba e pregunta si e fondonan di presupuesto ta ofrece proteccion suficiente pa maneho financiero sano y si e autoridad presupuestario di Parlamento ta ser proteha den practica. E fondonan aki ta ser usa pa mantene recurso publico disponible pa varios aña pa obhetivonan specifico di politica.

Segun ARA, e instrumento en si por tin balor. Teoricamente, e por contribui na continuidad di financiamento, flexibilidad den implementacion di politica y uso mas dirigi di recurso. Pero den practica, implementacion di e fondonan ta desvia significantemente di e meta original.

E organo di supervision ta conclui cu gobernacion inadecua, supervision deficiente y responsabilisacion insuficiente a debilita control administrativo riba e fondonan. Un di e problemanan principal, segun e rapport, ta cu hopi biaha no ta cumpli cu e marco legal existente.

Hopi presupuesto no ta ser adopta na tempo of ta falta completamente. Den algun caso, presupuesto ta ser aproba retroactivamente despues cu gasto a ser haci caba. Responsabilisacion na Parlamento tambe hopi biaha no ta tuma lugar. Como resultado, no tin suficiente bista riba e tamaño y gasto di recurso publico canalisa via e fondonan.

Regun ARA, Parlamento falta informacion completo, confiabel y na tempo pa eherce su funcion di supervision. Consecuentemente, e autoridad presupuestario di e Estado ta bin bao di presion y fluho financiero substancial ta cay fuera di bista di representante eligi.

Un otro punto importante di critica ta e falta di un cuadro general y coherente pa maneho di e fondonan di presupuesto. Segun e rapport, no tin criterio cla pa establece, structura, evalua of disolvi fondonan. Tambe falta regla uniforme pa e procesamento financiero di e relacion entre e fondonan y pais Aruba.

Debi na falta di guia uniforme, e structuranan di gobernacion ta varia hopi entre diferente fondo. Rol, responsabilidad y supervision no ta defini claramente, loke ta crea confusion tocante ken ta responsabel pa maneho, control y responsabilisacion. ARA ta adverti cu control y balans efectivo ta falta como resultado.

Adicionalmente, ARA ta indica cu hopi fondo ta opera sin obhetivonan concreto y midibel. Aunke metanan general ta defini legalmente, den practica nan no ta converti den criterio of indicadornan cu por ser evalua. Esey ta haci’e dificil pa determina si un proyecto realmente ta contribui na e meta di politica cu a ser proponi.

E investigacion tambe a revela cu den varios caso, tumamento di decision no ta suficientemente documenta. Como resultado, no por verifica te ki grado proyecto ta cuadra cu e obhetivonan di e fondo. Segun ARA, esaki ta limita tanto control administrativo como supervision riba gasto di recurso.

E rapport ta reconoce cu eficiencia y flexibilidad hopi biaha ta ser menciona como argumento pa uso di fondonan di presupuesto. Sinembargo, ARA ta enfatisa cu eficiencia nunca mester bay na costo di transparencia, supervision y control parlamentario. Precisamente pasobra e fondonan aki ta opera fuera di e structura presupuestario regular, nan mester proteccion adicional pa preveni abuso y gasto ineficiente.

Den varios caso, desviacion di regla regular di presupuesto y responsabilisacion tabata ser hustifica cu apelacion riba eficiencia, mientras cu supervision tabata insuficiente y presupuesto tabata falta. Segun e rapport, esaki ta conduci na decisionnan cu ta ser tuma sin suficiente mecanismo di control.

Un ehempel menciona ta e Fondo pa Mehoracion di Producto di Turismo. Corte di Control ta indica cu pa varios aña gasto a ser haci for di e fondo sin autorisacion presupuestario previo. Tambe, rekisito legal pa reportahe y responsabilisacion no tabata ser cumpli consistentemente.

E rapport ta mustra tambe un contraste notable entre fondonan financia pa Hulanda of Union Europeo y e fondonan local. Pa financiamento externo, rekisito di responsabilisacion ta hopi mas estricto y generalmente ta ser cumpli. Sinembargo, e reportahenan corespondiente no ta ser entrega sistematicamente na Parlamento.

Segun ARA, responsabilisacion na Parlamento ta keda obligatorio, ainda ora cu recurso no ta origina directamente for di Presupuesto Nacional. Na final, e fondonan di presupuesto ta instrumento oficial di politica publico y pues mester keda bou di supervision parlamentario.

E investigacion ta identifica tambe problema cu fondonan inactivo cu oficialmente ta sigui existi sin actividad relaciona cu politica. Algun fondo ta persisti pa hopi aña sin evaluacion of disolucion formal. Segun e rapport, esaki ta parcialmente resultado di transferencia inadecua durante cambio di gabinete y falta di claridad riba responsabilidad.

ARA ta adverti cu e situacion aki ta crea riesgo pa continuidad, transparencia y maneho di recurso publico. Likidacion administrativo di fondonan sin disolucion legal formal por ta contrario na e marco legal.

Un otro preocupacion importante ta e falta di un panorama financiero completo. Registronan incompleto y inconsistente ta haci imposibel pa obtene un imagen confiabel di posicion financiero di Pais Aruba y di e riesgonan financiero existente.

Como resultado, Corte di Control ta conclui cu e fondonan di presupuesto actualmente no ta funciona mas como instrumento pa sostene maneho financiero sano, sino cu nan por forma un riesgo pa transparencia, legalidad y control administrativo. Segun e rapport, e fondonan solamente tin balor agrega ora nan ta opera bou di condicionnan cla y ehecutabel.

Pa motibo ey, ARA a formula varios recomendacion na gobierno y Parlamento. E recomendacion principal ta pa desaroya un solo cuadro formal y coherente pa tur fondo di presupuesto. E cuadro aki mester inclui criterio cla pa establecimento, structura, maneho, supervision, evaluacion y disolucion di fondonan.

Segun ARA, e cuadro mester clarifica ki ora uso di un fondo di presupuesto ta hustifica y cual condicionnan ta necesario pa garantisa transparencia y control administrativo. Tambe mester evalua e politica periodicamente den consulta cu Parlamento.

Ademas, ARA ta recomenda pa fortalece gobernacion y maneho di cada fondo. Mester defini explicitamente ken ta responsabel pa politica, implementacion, supervision y responsabilisacion pa preveni confusion den rol y responsabilidad.

E organo di supervision ta insisti tambe riba cumplimento estricto di e marco legal, incluyendo adopcion na tempo di presupuesto y cuenta anual. Gastonan sin autorisacion presupuestario previo, segun e rapport, no mester ser permiti.

Tambe ARA ta recomenda pa haci obhetivonan di e fondonan mas concreto y midibel. Sub-obhetivo, indicadornan y criterio di evaluacion mester ser defini claramente pa por determina si recurso publico realmente ta contribui na e meta di politica.

Pa loke ta trata fondonan inactivo, ARA ta boga pa disolucion formal y legal di e fondo nan. Pa haci esey, mester tin aprobacion previo di Parlamento.

Na Parlamento, ARA ta recomenda pa aplica su autoridad presupuestario mas estrictamente. Presupuesto no mester ser aproba retroactivamente y consecuencia concreto mester sigui ora obligacionnan legal di reportahe no ser cumpli.

Parlamento tambe mester exigi evaluacionnan mas frecuente di eficiencia y efectividad di fondonan existente. Ora un fondo a logra su meta, ta inactivo pa un tempo largo of no ta ofrece suficiente balor agrega, continuacion di e fondo mester ser reconsidera criticamente.

Den e rapport, ARA ta referi tambe na e proposicion pa establece un Fondo General di Inversion y Desaroyo. Segun e organo di supervision, Aruba mester evita cu deficiencianan di pasado ta ripiti den e fondo nobo.

P’esey ARA ta enfatisa cu ta importante pa establece desde principio criterio cla, un structura di gobernacion transparente, maneho financiero sano y mecanismo fuerte di responsabilisacion. Tambe mester tin claridad riba con inversionnan ta relaciona cu presupuesto nacional y con supervision y reportahe lo ser organisa.

Finalmente, ARA ta conclui cu Aruba ta dilanti un escogencia fundamental. Fondonan di presupuesto solamente por funciona como instrumento util di politica ora nan ta compaña pa regla cla, supervision robusto y transparencia completo. Sin e condicionnan aki, nan ta representa un riesgo structural pa gobernacion financiero sano.