Dialuna atardi a surgi riba rednan social cu un grupo di dolfijn a yega na costa den cercania di Palm Beach y Sarah-Quita Beach, unda nan a landa asina cerca di canto cu un dolfijn a hasta keda pega den santo, manera a reporta. Mesora comunidad y activistanan a bati alarma, y Aruba Conservation Foundation a publica un advertencia diamars urgiendo pa mantene distancia y yuda protege e mamiferonan aki.

Segun un medio di comunicacion turistico, e caso aki a surgi inicialmente riba plataforma Reddit, unda a reporta cu e incidente a sucede inesperadamente. A reporta cu imagennan comparti tabata mustra personanan yudando algun dolfijn cambia di direccion y landa bay afo den lama.

Videonan cu a surgi riba red social a gara atencion di comunidad tambe, y centenares a cuminsa comparti nan teoria tocante pakico un grupo di dolfijn a aparece na canto.

Aruba no sa mira dolfijn landa asina cerca di nos costa, y mucho menos un grupo grandi manera por a mira dialuna. Segun un medio di comunicacion a reporta, a calcula cu tabatin rond di 100 dolfijn den diferente grupo. Sinembargo, Bon Dia Aruba a busca pa verifica e informacion aki cerca ACF, y aunke no por a duna un cantidad exacto, a clarifica cu lo tabatin rond di 20 dolfijn.

Den comentario hopi hende a comenta tocante e incidente aki, y algun a lansa diferente teoria pakico e dolfijnnan a aparece den e area. Un comentario ta supone cu nan a yega na costa pa duna luz y siña nan yiunan pa landa. Otronan ta sugeri cu nan lo por ta buscando cuminda. Segun usuarionan ta splica den comentario, e dolfijnnan aki kisas tabata cazando pisca den e area. Manera un ta splica, dolfijnnan ta dispuesto pa landa hasta den areanan nobo djis pa haya cuminda. Otro a agrega cu tin biaha nan por landa asina leu cu nan por keda pega den coriente y termina den areanan unda normalmente nan no ta landa.

Otro teoria ta inclui cu e dolfijnnan aki por a keda desorienta y a landa bay demasiado paden. Hopi a atribui e posible desorientacion na trafico pisa den awa, specialmente den e areanan unda a encontra e dolfijnnan aki, cual ta conoci di mira cantidad di turista y atletanan riba jetski, kitesurf of windsurf. Contaminacion tambe por ta hungando un rol, segun algun usuario, como cu e area ta frecuentemente druk y vehiculonan di lama por laga petroleo of otro forma di contaminacion atras den lama.

Algun usuario tambe a sugeri cu e fenomeno aki por ta relaciona cu un peliger detecta den awa. Tin a menciona cu por tin tiburon of otro menasa den e area, obligando e dolfijnnan pa landa mas cerca di costa pa busca refugio. Di otro banda, algun ta sugeri cu e peliger ta conecta mas cu cambio den clima, y ta specula cu e dolfijnnan por a keda desorienta pa via di cambio di temperatura den lama of, segun par usuario, e aparicion di dolfijn na costa por indica un menasa inminente, manera un tsunami of mal tempo.

Bon Dia Aruba a acerca Aruba Marine Mammal Foundation pa nan perspectiva experto di kico por a causa e yegada aki. Sinembargo, te ciere di edicion aki no por a haya contesta, kisas pasobra AMMF ta activamente trahando cu ACF na e sitio pa yuda e mamiferonan aki.

A pesar cu teorianan den comentario ta varia, loke si hopi usuario a acorda ta cu e fenomeno aki no ta un “atraccion gratis”, manera e ser describi den un medio di comunicacion. Aruba Conservation Foundation tambe a subraya e estado precario den cual e dolfijnnan ta, y ayera a urgi comunidad pa mantene distancia.

Manera ACF ta splica den su publicacion riba Facebook, e dolfijnnan ta bao di hopi stress y tin mester di un ambiente trankilo pa por recupera. Pues, e organisacion ta enfatisa cu esaki no ta un “atraccion” of oportunidad pa saca potret.

A informa na momento di publicacion cu un dolfijn ta herida y expertonan di bida marino di ACF y AMMF ta na e sitio ta monitoriando y asistiendo e situacion. ACF a clarifica na Bon Dia Aruba cu un dolfijn a keda atras y cu e tabatin problema di wanta su mes den awa. Pa e motibo aki, e team na e sitio ta trahando den shift pa carga e criatura.

ACF ta urgi na comunidad pa duna di nan parti den e caso aki y mantene distancia respetuoso for di e area. Esaki ta specialmente relevante pa personanan cu ta maneha jet ski, boto of cu ta practica kite y wind surf den e area. Ta importa pa evita zonido fuerte, drone y actividadnan den grupo cerca di e area, como cu e dolfijn mester un ambiente keto y trankilo pa por recupera. Ademas ta pidi cu ta miho pa no drenta e zona afecta mes y pa respeta instruccionnan di expertonan na e sitio.

Esaki no ta e prome biaha cu Aruba a mira presencia di dolfijn cerca di nos costa. Mas recien tabatin un caso lamentable na Mangel Halto na januari 2026 unda a reporta un dolfijn hubenil morto. E tempo ey AMMF a reporta cu a transporta e mamifero na un sitio sigura pa documentacion, medidanan morfometrico, necropsia y preservacion di skelet pa estudio cientifico.

Den e caso aki, testigonan a conta cu a observa tres dolfijn den e area unda un di nan a yega hopi cerca dunando señal di ta bao stress. AMMF a reporta cu algun hende tabata tumando potret y ora e dolfijn a muri, a trec’e na canto. Despues di esaki a tuma contacto cu AMMF.

Aruba Marine Mammal Foundation (AMMF) a informa e tempo ey cu e awanan poco profundo den areanan di Malmok, Palm Beach, Eagle Beach, Surfside, Southreef, Mangel Halto y Roger’s Beach ta areanan costero unda dolfijn sa busca refugio den caso cu nan ta den condicion vulnerable of ta huyendo for di menasa den lama. Dolfijnnan cu ta den condicion debil, herida, ta cansa of ta criando yiu frecuentemente ta ser acompaña pa otronan den e areanan aki. Ta pa e motibo aki cu e organisacion a adverti cu stroba dolfijnnan den un situacion asina ta crea peliger pa ambos e bestia y personanan. Den e incidente di dialuna, a reporta cu algun persona a purba yuda e dolfijnnan landa bay, pero AMMF y otro organisacionnan internacional di bida marino ta adverti cu mishi of carga e mamiferonan aki—aunke kisas cu bon intencion—ta peligroso, y organisacionnan internacional ta bisa cu esaki mester keda den cargo di expertonan.

E situacion na Sarah-Quita Beach ta subraya un bes mas e menasa cu ta existi pa bida marino den areanan sobrepobla cu turista y actividad riba lama. Den e ultimo añanan, activista y ciudadanonan ta keda expresa nan preocupacion pa e strobacion cu sobrepoblacion na beach ta causa pa bida marino. Pa Aruba, e menasa ta mas grandi pa nos driekiel y turtuga berde, specialmente na tres trapi, unda awor ta mira cantidad di UTV y jeepnan di tours ta staciona cu decenas turista preta den un area chikito. Y awor nos ta mira cu e menasa ta conta tambe hasta pa bida marino cu no ta nativo na nos isla, pero cu ta sinti e mesun presion cu nos bida marino ta sinti.