Ayera, riba su pagina di Facebook, minister di Finanzas, Geoffrey Wever (Futuro) a comparti un comunicado di Directie Financiën den cual a informa cu lo tin un atraso cu payroll di mei 2026.
E mensahe, comparti tambe riba website di Directie Financiën, ta bisa lo siguiente: “Pa motibo tecnico, un parti di e payroll di mei 2026 a enfrenta contratempo.” E departamento a agrega cu tabata “trahando hunto cu Banco Central di Aruba pa soluciona e problema.”
E departamento a indica cu tabata spera cu e problema no lo dura demasiado largo, bisando cu “e meta y expectativa ta cu e problema lo wordo soluciona prome cu fin di dia” ayera diahuebs. “Nos disculpa pa e inconveniencia,” e departamento a finalisa bisando.
Minister Wever a comparti e anuncio cu e comentario: “Por fabor tuma nota di e anuncio aki.”
