Diamars pa 12:06 di merdia, un homber a informa Central di Polis cu un rato prome, un auto color blauw cu cuatro homber coriendo aden a los tiro, y a alcansa auto di un otro homber, na Seroe Colorado.
Ta asina cu Central di Polis ta despacha patruya di San Nicolas y mas unidadnan pa Seroe Colorado, segun un comunicado di polis. Na yegada riba e caminda bayendo direccion di hotel Secrets, e patruya a topa cu e chauffeur den un auto color shinishi. E homber ta informa polis cu un rato prome, un auto KIA color blauw cu 4 homber aden lo mester a bin su tras y los tiro cu a alcansa su auto.
E homber a duna descripcion di e auto y e sospechosonan.
Di biaha a cuminsa un buskeda pa cu e auto y e sospechosonan.
Un rato despues ta bin topa cu e auto KIA color blauw cu probablemente lo ta esun envolvi den e caso na altura di Isaac Wagemakerstraat. E auto a keda confisca pa mas investigacion.
Polis a sigui cu e buskeda y na altura di Dirkszstraat ta bin detene dos hende homber cu lo ta relaciona cu e caso, y a transporta nan pa warda di polis San Nicolas.
Polis na Isaac Wagemakestraat ta detene despues tambe e otro sospechoso na e sitio, cu tambe a keda transporta pa warda di polis San Nicolas, na unda nan lo presenta dilanti un sub-fiscal.
Recherche y polis tecnico a presenta pa asina haci nan investigacion.
Bon trabao di parti tur unidadnan di San Nicolas tambe tur unidadnan cu a duna un man y den un relampago a pone man riba e sospechosonan.
Cuerpo Policial Aruba ta haci un apelacion na esun cu sa algo of a wak algo pa yama e tiplijn di polis cu ta 11141. Bo ta keda anonimo.
