(AFP)—Negociadornan Mericano y Irani a yega na un marco pa un acuerdo di extension di e paro den combate di 60 dia pero e ainda mester aprobacion di presidente Mericano Donald Trump, fuentenan Mericano a bisa AFP diahuebs.
E fuentenan a confirma un reportahe di medio Axios cu e dos bandanan a yega na un acuerdo riba un memorandum di entendimento pa prolonga e tregua, habri Estrecho di Hormuz y cuminsa negociacionnan tocante e programa nuclear di Iran.
No tabatin confirmacion inmediato di Trump mes of di Iran.
Secretario di Tesoro Mericano Scott Bessent a nenga confirma algun acuerdo pero a bisa cu “nos probablemente tin e base pa e acuerdo aki.”
“E teamnan a bay y bolbe, y presidente Trump a laga sa hopi cla… cu e tin varios condicion estricto,” Bessent a bisa durante un briefing na Cas Blanco ora a puntr’e si tabatin un acuerdo riba mesa.
E condicionnan aki ta inclui cu Iran mester entrega su deposito di uranium enrikeci, acepta pa no sigui busca arma nuclear, y acepta pa permiti transito liber door di Estrecho di Hormuz, el a bisa.
“Pues e no lo acepta un acuerdo malo. E lo logra un gran acuerdo pa pueblo Mericano,” Bessent a agrega, kende tabata substituyendo secretaria di prensa di Cas Blanco Karoline Leavitt cu ta na zwangerschapsverlof.
Trump a bisa durante un reunion di gabinete diaranson cu ainda e “no tabata satisfecho” cu e ofertanan di Iran y a adverti cu e por “caba cu e trabao” militarmente.
Axios a reporta cu e acuerdo di 60 dia lo bisa cu transporte maritimo door di Estrecho di Hormuz lo ta sin restriccion, sin pago of acoso y cu Iran mester kita tur mina dentro di 30 dia.
Na cambio, Merca lo kita su blokeo naval riba wafnan di Iran, pero solamente den proporcion cu cuanto transporte comercial ta ser reestableci, segun e reportahe.
E memorandum tambe lo contene un compromiso Irani pa no sigui busca pa crea arma nuclear, Axios a bisa. Entre e prome asuntonan pa trata tin con pa deshaci di e deposito di uranium enrikeci di Iran.
Trump repetidamente a insisti cu Iran no por tin un arma nuclear bao ningun acuerdo pa caba e guera cu Merca y Israel a cuminsa riba 28 di februari. Un acuerdo fragil pa stop combate ta vigente desde 7 di april.
Washington y Teheran ambos a acusa otro diahuebs di viola e tregua despues di un intercambio di tiro.
Pero hefe di Tesoro Bessent a insisti cu e paro den combate ainda tabata vigente.
“Presidente Trump semper ta prefera un acuerdo di paz, pues tur loke nos a haci te awor tabata defensivo, y actualmente esey ta loke nos lo sigui haci,” el a agrega.
Bessent tambe a minimisa e impacto economico di e guera cu Iran, a pesar di e aumento den costo di bida causa pa prijsnan halto di petroleo despues cu Iran a cera Estrecho di Hormuz.
“Mi ta kere, y mercado di futuro ta mustra nos, cu prijsnan di petroleo lo ta mas abao cu nivelnan prome cu e conflicto,” el a bisa — mientras e ta admiti cu e economia “ta un reto awor.”
