Recientemente Bon Dia Aruba tabatin e placer di cera conoci cu artista Sr. Tomas Gonzalez, ken a conta nos tocante su soño pa pone un cruz riba sero Hooiberg. P’e, e cruz aki no lo ta solamente un muestra di su gran amor pa nos isla, sino tambe “bendiciona” nos tera, unda gran parti di poblacion ta Catolico.

Gonzalez, originalmente for di Argentina, a bin Aruba na aña 1990 y a crea un bida riba nos isla chikito hunto cu su casa. Awor, e tin hasta ruman, yiu y nieto cu ta yama nos baranca stima cas. Pa mas cu 30 aña, Gonzalez a contribui na nos cultura como musico, y a desaroya un gran aprecio pa Aruba y su yiunan di tera. Gonzalez a studia Bellas Artes na Argentina, y hunto cu su casa ta artesano.

Gonzalez a conta Bon Dia Aruba cu su inspiracion pa un cruz riba e di dos sero mas halto riba nos isla ta basa riba otro cruznan rond mundo, manera na Brasil cu su estatua enorme di Hesus cu a bira un simbolo di e pais. Gonzalez ta expresa su deseo pa Aruba tambe tin su propio “marca”, cual lo haci Aruba un pais unico den Caribe ya cu, segun e ta conta, otro islanan no tin cruz. E ta enfatisa con e cruz por ta un sitio di atraccion no solamente pa localnan Catolico devoto, sino tambe pa turistanan cu ta bishita nos isla.

Cu un diseño strategico pa ciudadanonan por mira e cruz di tur banda, Tomas a sigui splica cu e kier pa e cruz tambe ta visible anochi cu luz saliendo for di e fundeshi pa ilumina e gran estatua. E ta spera cu e visibilidad di e cruz por alcansa henter pueblo, y hasta funciona como un punto di orientacion pa piscadornan of barconan nabegando den bisindario.

Gonzalez ta expresa cu e proyecto aki ta un soño di dje, enfatisando cu e ta spera su propuesta por genera interes y habri caminda pa realis’e. Na mesun momento, e ta consciente cu e proyecto tin necesidad di profesional y aprobacion amplio di pueblo y gobierno. Tambe e ta conoci cu e cruz cu nos tin na Ser’i Noka. Sinembargo, den su perspectiva e lo ta algo bunita pa tin un cruz riba un punto halto, unda e estatua por sirbi como un protector spiritual riba e isla.

Gonzalez ta sigui conta cu por medio di e proyecto aki, cual e tin casi cuatro aña ta desaroyando, e kier laga su legado di su famia atras, cual a pasa gran parti di nan bida na Aruba, “e paraiso di mundo.”