E division di conseho di Raad van State di Reino a sostene en gran parti e propuesta di Ley di Reino pa Finanzas Publico Sostenible pa Aruba, conoci como HOFA, pero a recomenda varios clarificacion y ahuste prome cu e legislacion sigui cana den e proceso legislativo.
E propuesta ta bin di e Acuerdo Administrativo firma pa Aruba y Hulanda na juni 2024, y ta destina pa reemplasa e regimen actual di supervision financiero temporal cu un sistema nobo, cu ta combina un ley di consenso di Reino y un ordenansa nacional di Aruba.
Raad van State ta conclui cu e legislacion proponi ta un base solido pa cooperacion entre Aruba y Hulanda tocante maneho di finanzas publico. Na mes momento, e ta expresa preocupacion tocante varios provision, y ta haci un yamado pa mas claridad tocante autonomia di Aruba, partnership publico-priva, areglonan di refinanciamento, y e operacion di e marco supervision financiero.
Un marco financiero nobo
E ley proponi ta busca pa crea un structura a largo plaso cu meta di salvaguardia finanzas publico di Aruba mientras ta reconoce cu supervision di Reino na final mester ta temporal.
Bao di e propuesta, supervision financiero lo continua mediante Colegio di Supervision Financiero (CAft), mientras Aruba lo ta rekeri pa cumpli cu un serie di standard di maneho, financiero, y institucional. E ley tambe ta crea un caminda door di cual Aruba eventualmente por sali di supervision financiero di Reino, unabes cu cierto logro a ser alcansa pa un periodo sosteni.
Raad van State ta nota cu e propuesta ta vincula di cerca cu un ley Arubano separa, e Ordenansa Nacional pa Salvaguardia Finanzas Publico Sostenible (Lwho). Mientras e Ley di Reino ta establece e marco y principionan general, e ordenansa nacional ta contene e metanan numerico cu Aruba mester alcansa, incluyendo tasa di debe, balans di presupuesto, y rekisito di reserva.
E opinion di conseho di RvS ta enfatisa cu ambos pida di legislacion ta interdepediente y mester funciona hunto pa por logra e obhetivo declara di finanzas publico sostenible.
Reconocemento di progreso financiero di Aruba
Un di e observacionnan notable di e conseho ta e reconocemento di e mehoracion fiscal significante di Aruba den añanan recien.
RvS ta pone enfasis riba e tasa di debe di Aruba, cu a cay bao di e nivel registra prome cu pandemia di Covid-19 y ta na caminda pa alcansa su nivel mas abao desde 2011. Segun cifranan cita den e opinion, debe di Aruba tabata aproximadamente 61 porciento di producto interno bruto (GDP) na fin di maart 2026.
RvS tambe ta nota cu Aruba cu Aruba a reduci su peso di debe nominal door di paga back y a logra surplus den presupuesto den añanan recien.
Sinembargo, RvS ta adverti cu ainda tin reto. E ta pone enfasis riba preocupacion expresa pa CAft tocante e calidad di rapport financiero, inversion publico insuficiente, y visibilidad limita riba e sector publico colectivo mas ampliamente.
Pa e motibonan aki, RvS ta di acuerdo cu e necesidad pa un marco cu ta promove sostenibilidad fiscal a largo plaso.
Proteccion di autonomia di Aruba
Un porcion mayor di e conseho di RvS ta enfoca riba e relacion entre e Ley di Reino y autonomia constitucional di Aruba.
E propuesta di ley ta pone cu gobierno di Aruba no por entrega of aproba amienda na e ordenansa nacional gobernando finanzas publico sostenible sin aprobacion previo di Conseho di Minister di Reino (RMR).
RvS ta compronde e rasonamento tras di e rekisito aki. Ya cu e metanan fiscal numerico den e Ordenansa Nacional ta forma un componente central di e acuerdo entre Aruba y Hulanda, cambionan unilateral lo por mina e obhetivonan di e Ley di Reino.
Na mes momento, RvS ta insisti cu finanzas publico di Aruba ta keda un responsabilidad nacional autonomo bao di Statuut.
Pa motibo di e principio constitucional aki, RvS ta recomenda pa reduci e rekisito di aprobacion pa asina e aplica solamente na provisionnan cu ta trata e cuantificacion di metanan fiscal, manera standard di debe y balans presupuestario. Segun e Conseho, no mester extende e restriccion mas amplio cu ta necesario.
En esencia, e Conseho ta acepta e principio di control conhunto tocante e metanan fiscal acorda, pero ta argumenta cu cualkier limitacion riba libertad legislativo di Aruba mester keda lo mas limita posible.
Pregunta tocante PPP
Otro area identifica pa clarificacion ta trata public-private partnership y nan impacto riba debe publico di Aruba.
E propuesta ta exclui temporalmente cierto obligacion di PPP for di e standardnan fiscal cu Aruba mester cumpli cune durante e prome tres aña presupuestario. Durante e periodo ey, e standardnan lo aplica solamente na e gobierno central mes. Cuminsando e di cuatro aña presupuestario, e standardnan lo aplica atrobe riba henter e sector publico colectivo.
Segun RvS, e memorandum splicativo no ta splica adecuadamente cua proyecto ta cualifica como PPP of con grandi e obligacionnan aki ta en relacion cu e posicion general di debe di Aruba.
RvS ta recomenda duna informacion adicional tocante e proyectonan specifico involucra y nan impacto financiero calcula.
Ta considera e clarificacion importante pasobra e areglonan aki por trece obligacionnan financiero substancial a largo plaso, cu por afecta e sostenibilidad fiscal general di Aruba.
Rol di CAft y acceso na beneficio
E marco proponi ta introduci un sistema bao cual Aruba por haya acceso na cierto beneficio si yega na cierto metanan fiscal. E beneficionan aki ta inclui acceso na facilidad di prestamo mediante cual Hulanda por duna prestamo capital na tasa faborable di interes y un regimen di supervision mas suave cu rekisitonan di supervision reduci.
E legislacion tambe ta establece un caminda pa Aruba solicita e eventual revocacion di e Ley di Reino despues di cumpli cu tur standard aplicable pa al menos tres aña consecutivo.
CAft lo ta responsable pa haci evaluacion anual di prestacion di Aruba basa riba e criteria estableci. Basa riba e evaluacionnan, Conseho di Minister di Reino lo determina si Aruba ta cualifica pa e facilidad di prestamo, supervision mas suave of e derecho pa termina e Ley di Reino.
RvS ta nota, sinembargo, cu e memorandum splicativo no ta laga suficiente cla con ta bay tuma e decisionnan. Segun e opinion, intencion ta parce di ta cu Aruba automaticamente ta ricibi e beneficionan asina cu CAft determina cu a cumpli cu e standardnan aplicable. Pa evita ambiguedad, RvS ta recomenda cu e memorandum splicativo declara explicitamente cu cumplimento cu e standardnan ta resulta den acceso na e beneficionan.
Refinanciamento di debe externo
Un di e incentivonan inclui den e propuesta ta un compromiso di Hulanda pa refinancia parti di e debe externo di Aruba cu ta madurando.
RvS ta sostene e concepto, pero ta nota cu e legislacion y memorandum splicativo no ta specifica cua prestamo lo cualifica pa refinanciamento of con hopi debe lo cubri eventualmente. E falta di detaye aki, RvS ta argumenta, ta crea incertidumbre pa tanto Aruba como Hulanda.
Pa Aruba, ta keda incerto ki nivel di sosten financiero por spera realisticamente. Pa Hulanda, ausencia di informacion preciso ta hacie dificil pa evalua e consecuencianan financiero di e areglo.
E conseho ta pidi clarificacion adicional tocante e alcance di e compromiso di refinanciamento.
Preocupacion tocante maneho di documento
E conseho tambe a examina provisionnan cu ta trata preservacion di documento y maneho di registro publico door di CAft.
E ley proponi ta rekeri e Colegio di Supervision pa tuma medida adecua pa sigura cu documento ta keda accesible y manteni adecuadamente durante tempo. Mientras cu ta sostene e obhetivo aki, RvS ta mustra cu e propuesta no ta splica claramente con responsabilidadnan di maneho di documento ta bay ta organisa bao di e marco nobo.
Legislacion existente ya tin provision tocante maneho di documento di CAft, pero no ta completamente cla con e areglonan aki ta bay opera unabes HOFA drenta na vigor.
RvS ta recomenda pa duna mas splicacion tocante responsabilidadnan di archivo y accesibilidad di documento a largo plaso.
Sosten amplio cu recomendacion pa mehoracion
Generalmente, e conseho di RvS ta sostene e legislacion proponi y no ta reta su obhetivo central di sigura finanzas publico sostenible pa Aruba.
E conseho ta reconoce e cooperacion extensivo entre Aruba y Hulanda durante e proceso di preparacion y a mira e uso di un Ley di Consenso di Reino como un mecanismo apropia pa atende un asunto cu ta keda formalmente dentro di esfera autonomo di Aruba.
Na mes momento, RvS ripitidamente ta enfatisa e necesidad di balansa supervision financiero cu respet pa autonomia constitucional di Aruba.
E recomendacionnan ta enfoca riba mehora claridad legal, reforsa transparencia y sigura cu e marco ta opera di un manera predecible.
RvS ta conclui cu mester haci amienda na e memorandum splicativo – y, unda ta necesario, e propuesta di ley mes – prome cu entrega e propuesta na Tweede Kamer y parlamentonan di Aruba, Corsou y Sint Maarten.
E conseho di RvS no ta representa un rechaso di HOFA. Mas bien, e ta sirbi como un revision detaya cu meta pa refina e legislacion y sigura cu e marco fiscal nobo ta efectivo y constitucionalmente balansa mientras Aruba y Hulanda ta move den un fase nobo den nan relacion financiero.
