(AFP) – Anthropic, creador di e modelonan di inteligencia artificial (AI) Claude, riba diamars a pone e version mas poderoso di su tecnologia disponibel pa publico general, mientras ta restringi su uso den areanan sensitivo.
Bautisa como Fable 5, e modelo ta e prome for di clase Mythos — e liña mas avansa di tecnologia di AI di Anthropic, presenta na april pero restringi pa preocupacionnan di seguridad cibernetico — cu ta ser haci ampliamente disponibel.
Anthropic ta bisa cu Fable 5 ta excepcionalmente bon den skirbi, entre otro, codigo di software, contesta preguntanan compleho di investigacion y analisa imagen.
Paralelo na esaki, Anthropic ta ofrece un version sin restriccion, Claude Mythos 5, na companianan y organisacionnan cu ya tin acceso na e famia di modelo aki — incluyendo partnernan di seguridad cibernetico registra den su programa Project Glasswing.
E grupo selecto ey a ser amplia na cuminsamento di juni pa alrededor di 200 organisacion den mas cu 15 pais y ta ser spera pa sigui crece.
Anthropic a restringi acceso na Mythos a base di seguridad cibernetico, considerando loke e compania ta yama su capacidad pa identifica vulnerabilidadnan den infrastructura critico rapidamente, manera rednan electrico y software.
Ora Project Glasswing a ser lansa, algun critico a acusa Anthropic di exagera e menasa pa genera atencion.
Pero companianan cu a test Mythos despues a respalda su capacidadnan, cu gobierno di Merca — cu tabata den un disputa legal cu Anthropic — finalmente poniendo e modelo den test pa preocupacionnan di seguridad.
Desde eynan, Cas Blanco a establece un areglo pa test e modelonan mas poderoso for di e companianan lider di AI prome cu nan ser lansa.
Anthropic ta bisa cu e restriccionnan riba Fable 5 lo funciona asina: mayoria di preguntanan na e relaciona cu asuntonan sensitivo manera seguridad cibernetico lo ser dirigi en bes di esey na e modelo di nivel mas abao, Opus 4.8, cu a ser pone publico na fin di mei.
Anthropic a contrata expertonan externo pa pasa mas cu 1.000 ora purbando haya maneranan pa pasa rond di e restriccionnan aki — un proceso conoci como red-teaming.
E compania tambe a ehecuta un programa di recompensa pa ‘bug’, cu ta paga hende pa haya fayonan di seguridad. Ningun hende no a haya un manera pa habri e modelo completamente, Anthropic a bisa.
Lansamento di Fable 5 ta bin cu un prijs halto — $10 pa cada miyon token di entrada y $50 pa cada miyon token di salida, dobel di costo di Opus 4.8. Tokennan ta medidanan di uso di un modelo di AI.
Un sesion intensivo di codificacion pa un programador por gasta un miyon token den cuestion di ora of menos.
A pesar di crecemento exponencial di entrada, Anthropic ta keda leu for di rentabilidad y ta pagando un prijs premium pa poder di computacion. Recientemente e a cuminsa huur un centro di data for di Elon Musk pa $1,25 biyon pa luna.
E lansamento aki ta bin den medio di entusiasmo financiero intenso rond di AI.
Anthropic y su rival OpenAI recientemente a anuncia cu nan a presenta plannan di IPO, apenas algun dia prome cu un debut record riba mercado pa SpaceX, e gigante espacial di Elon Musk cu tambe ta doño di xAI, su compania di AI.
