Ayera a tuma lugar un asina-yama Cita cu Fiscal den e caso yama Mero, den cual e sospechoso M.E. de Meza y su esposa mester a responsabilisa nan mes pa delitonan fiscal cometi den e periodo 2009 te 2019.
E investigacion contra e dos sospechoso aki a cuminsa despues cu DIMP (Departamento di Belasting) a haci denuncia na Ministerio Publico cu, durante e añanan menciona, a keda sin yena e aangiftenan di belasting completamente, keda sin yena nan corectamente y keda sin yena nan na tempo. E iregularidadnan a sali na cla durante un investigacion di integridad den cuadro di screening di kandidaat-ministernan na inicio di 2025.
Screening di kandidaat-ministernan a keda fiha den ley na 2021 y ta inclui entre otro un evaluacion di parti di Inspector di Belasting tocante e cumplimento fiscal den e añanan anterior, inclusivamente si tin debenan habri of otro iregularidadnan.
E sospecho di un crimen den un investigacion habri ta trece cune cu e nominacion di un persona como minister no por sigui su curso. Esaki tabatin consecuencianan grandi pa señor De Meza, cu a pone su mes candidato pa un puesto ministerial den e gabinete actual.
Ministerio Publico a ofrece ayera na señor De Meza pa paga un suma di Afl. 5000 pa evita persecucion penal. A haci mesun oferta na su esposa. Tur dos sospechoso tin 1 luna di tempo pa cumpli cu e condicion di pago di e suma di placa. Si nan no acepta loke Ministerio Publico ta ofrece nan, e caso penal – manera ta sucede semper ora un sospechoso keda sin cumpli cu un condicion impone riba dje – lo ser hiba dilanti hues.
