Recien, miembro Hulandes di parlamento Europeo Marit Maij a critica e exclusion di islanan den Caribe Hulandes for di e Strategia Europeo pa Islanan, cual recien a ser presenta pa e Comision Europeo. Den su critica, parlamentario Maij ta enfatisa cu e islanan exclui ta enfrenta retonan similar pa cu cambio di clima y pa e motibo aki tambe mester ser inclui den e strategia nobo.

Comision Europeo a anuncia diahuebs for di nan sede na Bruselas cu el a adopta dos strategia dedica, un pa islanan den Union Europeo (EU) y un pa comunidadnan costero den EU, marcando e prome biaha cu a bin cu un strategia cu ta atende ambos tipo di teritorio dentro di e bloc. Cu e inciativa nobo aki, e comision a indica cu lo introduci un metodo dirigi y dedica na e necesidadnan y retonan unico di e teritorionan relevante.

Segun e comision ta enfatisa den su comunicado, 17 miyon hende ta biba riba mas cu 4.000 isla cu ta forma parti di e 16 estado miembronan di EU. Ademas tin 95 miyon hende bibando riba costa y areanan costero den 22 estado miembro di e bloc. Mayoria isla dentro di e bloc ta comparti retonan cu ta impacta nan economia y calidad di bida. Entre e retonan menciona ta isolacion geografico, costo halto di biahamento, mercadonan chikito, demasiado dependencia riba turismo y vulnerabilidad climatico.

Comunidadnan costero ta un activo vital, manera e comunicado ta expresa. E regionnan aki ta combina herencia ambiental y cultural pa stimula nan economia. Na mesun momento, e comunidadnan aki ta e promenan pa sinti e efecto di cambio climatico, perdida di biodiversidad den lama of riba costa y contaminacion. Presionnan riba e areanan aki ta inclui sobreturismo, deficit den vivienda, actividadnan economico dependiente riba temporada y oportunidadnan limita pa trabao, tur cual ta empeora instabilidad economico.

Teniendo na cuenta e tipo di retonan presenta, e comision a enfatisa e necesidad pa establece strategianan specificamente diseña pa cada tipo di teritorio. Cu esaki a diseña dos diferente strategia interconecta pa stimula atencion continuo riba e retonan climatico di e teritorionan mientras tanto respondiendo na e realidadnan unico di cada un.

Pa loke ta islanan den EU, e comision a establece un strategia cu ta structura rond di cuatro pilar. Cu e strategia aki, e bloc lo enfoca riba:
– Desaroyo, conectividad, competencia y innovacion economico;
– Seguridad di energia, proteccion ambiental y resiliencia pa clima;
– Comunidad y demografia (fortaleciendo servicionan publico, sector medico y vivienda) y
– Seguridad y preparacion pa crisis

Pa comunidadnan den areanan costero, a acorda na un strategia cu ta consisti di tres principio:

  1. Stimula prosperidad pa promove un economia dinamico, competitivo y diverso;
  2. Fortalece resiliencia pa engrandece capacidad pa adapta na cambio di clima y retonan ambiental, social y economico, y
  3. Engrandece calidad di bida pa promove salud y bienestar publico mientras tanto conserva cultural, herencia y identidad

Comision Europeo a pone enfasis riba politica nacional y a haci yamado pa estado miembronan evalua con esakinan ta afecta e teritorionan relevante. Segun ta splica den comunicado, e comision tin plania pa mehora coleccion di dato specificamente di e islanan dentro di e bloc; considera impacto di leynan riba e islanan; provee asistencia tecnico y sosten financiero y tene cumbrenan cada pasa dos aña pa reuni stakeholdernan di isla y institucionnan di EU.

Di nan parti, estadonan miembro ta encurasha pa crea strategia dedica pa desaroyo di e islanan, aloca fondo, mehora capacidad administrativo y usa fondo di EU y hermentnan estatal mas efectivo.

E iniciativa nobo ta marca un cambio grandi den politico Europeo como cu e ta e prome framework comprensivo di e bloc specificamente pa islanan. Na mesun momento e ta un cambio prometedor for di e maneho tradicional di trata isla como parti di politica regional, cual historicamente no tabata reconoce e factornan unico cu ta diferencia e teritorionan aki for di e paisnan den continente.

Manera Raffaele Fitto, vice presidente pa Cohesion y Reforma di Comision Europeo, a enfatisa tocante e Strategia, “Nos lo transforma obstaculonan den oportunidad, haciendo e teritorionan aki clave pa un Europa sostenible y competitivo.”

A pesar di e elogio, algun tambe a lansa critica. Manera a menciona, miembro Hulandes den parlamento Europeo Marit Maij a publica riba LinkedIn un critica tocante e strategia nobo, cual segun e ta exclui islanan den Caribe Hulandes.

E ta bisa cu e strategia ta pone gran enfasis riba e hecho cu islanan ta enfrenta cu retonan specifico debi na nan ubicacion isola, haciendo nan e promenan afecta pa consecuencianan negativo causa pa cambio di clima. Pa e motibo aki tabata importante pa e bloc acelera iniciativanan pa reforsa adaptacion di clima riba e islanan y combati pobresa y mehora conectividad. Sinembargo, e enfoke supuestamente no tabata riba e Oversees Countries and Territories (OCTs), di cual islanan CAS y BES den Reino Hulandes ta forma parti di dje.

Parlamentario Maij ta lamenta di e exclusion aki, bisando cu e ta un “oportunidad perdi” si ta lubida di e teritorionan aki cu tambe ta enfrenta e mesun retonan cu islanan miembro di EU manera Chipre y Malta ta enfrenta.

Aruba, manera otro OCTs, no ta forma parti di Union Europeo aunke nos pais ta asocia si cu e bloc. Pa via di nos status particular, Aruba ta cay bao gobernacion di Overseas Association Decision (OAD), cual ta e framework legal di EU pa cooperacion cu teritorionan OCT. E OAD ta percura pa nos por tin intercambio cu Union Europeo. Similarmente, sosten financiero pa OCTs ta bin via framework di cooperacion en bes di via politica di EU cual ta forma un elemento importante den e strategia nobo. Den otro palabra, pasobra Aruba no ta un miembro di EU, e no por tin acceso directo na financiamento Europeo, pero si e por haya acceso via programanan di partnership cu EU.

Y e programanan aki ya a ser implementa.

E OAD mes ta un partnership entre Aruba y Union Europeo cu ta consisti di varios pilarnan similar na e Strategia Europeo pa Islanan. Esakinan ta inclui entre otro desaroyo y diversificacion economico, resiliencia contra clima y proteccion ambiental, maneho sostenible di biodiversidad y preparacion pa desaster.

Tambe tin e asina yama “Green Oversees”, un programa entre EU y OCTs cu ta inclui fondo pa adaptacion climatico, energia renobable, turismo sostenible, iniciativa economico cu ta elimina desperdicio y fortalecemento di capacidad, entre otro.

OCTs tambe ta forma partnerships entre otro. Pa Aruba, cooperacion cu nos hermana islanan den Reino ta enfoca riba reduci riesgo di desaster, adaptacion climatico, maneho marino, energia sostenible y conectividad regional.

A pesar di no ta inclui den e strategia nobo, paisnan manera Aruba tin diferente framework y programanan cu tin enfoke similar.

Di otro banda, pa OCTs, “costo di insularidad”—costo di ta geograficamente isola—pa islanan manera Aruba ainda no a ser formalmente duna ainda. Esaki a pesar cu e retonan asocia cu insularidad, manera presion economico, vivienda caro, acceso limite na servicionan publico y presionnan demografico tambe ta relevante pa OCTs.

Y ta net pa e motibo aki cu e presentacion di e strategia nobo por sirbi como un punto di discusion pa teritorionan OCT. E iniciativa nobo por brinda un oportunidad pa islanan manera Aruba pa usa esaki como referencia politico ora ta boga dentro di Reino, e Asociacion di OCT (OCTA) of iniciativanan entre EU y OCT den futuro.