Fundacion AWAA ta haci yamado pa comunidad participa den campaña di sterilisacion gratis di mascota

Animal Welfare Alliance Aruba (AWAA) ta haci un yamado na tur residente di Aruba pa participa den e campaña gratis di sterilisacion cu lo tuma lugar siman cu ta bin, como parti di su esfuersonan continuo pa reduci e cantidad di cacho y pushi no desea riba isla y mehora bienestar animal.

Durante un entrevista cu Mercedes de Bruyn di fundacion AWAA el a splica cu e campaña ta forma parti di un programa permanente di sterilisacion cu AWAA ta organisa durante casi henter aña. Organisadornan ta pidi doñonan di mascota pa trece nan cacho y pushi pa ser opera, of pa tuma contacto via WhatsApp si nan tin dificultad cu transporte. Boluntarionan por coordina pa busca e bestia den cierto caso, aunke e fundacion ta enfatisa cu personanan cu por transporta nan mascota mes mester haci esaki pa yuda usa e recursonan limita di manera mas eficiente.

“Nos meta ta pa sterilisa tur cacho y pushi riba isla pa reduci sufrimento di bestia. Nos no ta ricibi sosten di gobierno. Tur loke nos ta haci ta posibel danki na boluntario y donacionnan,” De Bruyn a declara.

AWAA ta un aliansa forma pa tres organisacionnan dedica na bienestar animal: Criollo Trappers, Sergeant Pepper’s Friends y United Dogs Aruba. Hunto, nan ta coordina campañanan di sterilisacion, programa educativo y actividadnan di conscientisacion pa mehora condicionnan di bestia riba isla.

De Bruyn a splica cu e clinica ta opera aproximadamente 11 luna pa aña, cu campañanan cu ta dura dos siman cada luna. E operacionnan ta ser ofreci totalmente gratis, aunke comunidad ta bon bini pa contribui cu donacionnan den placa, cuminda, bebida of otro tipo di apoyo pa e boluntarionan.

Desde cu e fundacion a cuminsa su trabao na final di 2022, e iniciativa a crece considerablemente. Solamente den 2025, boluntarionan a dedica aproximadamente 26.000 ora di servicio y a opera cerca di 4.750 cacho y pushi.

De Bruyn indica cu e impacto di e programa ya ta visibel. Aunke ainda tin bestia riba caya, boluntarionan ta observa menos caso compara cu añanan anterior y ta ricibi reaccionnan positivo di parti di residentenan cu tambe a nota mehoracion.

“Nos ta mira diferencia y nos ta tende esaki tambe for di hende den comunidad. Ainda tin bestia riba caya, pero e cantidad a baha. E grupo di persona cu ainda no a sterilisa nan mascota tambe a bira mas chikito,” el a bisa.

Pero a pesar di e progreso, desafionan ainda ta existi. De Bruyn a splica cu tin residente cu ainda no conoce, of no ta consciente di e beneficio di sterilisa nan mascota, mientras cu otronan ta enfrenta dificultadnan economico of falta di acceso na informacion. El a menciona cu den cierto bario, pobreza y necesidadnan basico ta pone cu cuido di mascota no semper ta un prioridad.

El a enfatisa cu pa esaki educacion ta keda un elemento esencial den e strategia di AWAA. E fundacion ta colabora cu programanan educativo, incluyendo un iniciativa conoci como Snoop Doggy, cu ta bishita scolnan pa educa muchanan tocante responsabilidad den cuido di mascota y importancia di sterilisacion.

Ademas, De Bruyn a indica cu tin studiantenan ta participa regularmente den actividadnan di boluntario, obteniendo asina experiencia directo den trabao cu bestia.

El a enfatisa cu e hopi hoben ta mustra un nivel halto di consciencia tocante bienestar di bestia y por yuda motiva nan famia, amistad, y conocirnan pa tuma accion tambe.

Ademas di controla crecemento di poblacion di bestia, De Bruyn a subraya importancia di ta doño responsable. E organisacion ta señala cu hopi di e cachonan cu ta ser mira riba caya no necesariamente ta cacho di caya, sino mascota cu tin doño pero cu no ta ser manteni den un cura cera.

AWAA ta un fundacion cu tin como enfoke principal ta sterilisacion y prevencion. Pues nan no ta keda cu cacho ni pushi despues cu nan ser opera. Animalnan cu ta busca for di caya pa sterilisacion ta ser hiba back na e mesun lugar unda nan a ser haya despues cu nan recupera.

AWAA tambe ta traha cu veterinarionan stranhero pa sostene su operacionnan di volumen halto. De Bruyn a splica cu inicialmente, e fundacion tabata depende principalmente di veterinarionan di Merca y Europa. Cu tempo, sinembargo, nan a cuminsa colabora mas frecuentemente cu profesionalnan di Mexico y Colombia.

El a splica cu un di e motibonan pa esaki ta cu e veterinarionan aki tin experiencia cu condicionnan similar na Aruba, caminda clima di calor ta contribui na presencia di cierto enfermedadnan comun entre bestianan.

Entre e afeccionnan mas frecuente ta Ehrlichiosis, un infeccion transmiti pa garapata cu por causa problema serio di sanger, y tambe Heartworm, un enfermedad transmiti pa muskita cu eventualmente por resulta fatal si no ser trata na tempo.

AWAA a indica cu medicamento preventivo contra heartworm ta relativamente accesibel y por preveni hopi sufrimento innecesario. E fundacion ta recomenda doñonan pa consulta cu un veterinario tocante test y tratamento.

Pa loke ta trata e campaña binidero cu lo cuminsa diadomingo 14 di juni, De Bruyn a splica cu residentenan por entrega nan mascota durante horario specifico na fundacion AWAA. Parti atardi e orario ta di 5:00 pm pa 6:00 pm for di diadomingo te cu diahuebs, y parti mainta e orario lo ta entre 7:30 am y 8:00 am for di dialuna te cu diabierna.

AWAA ta calcula cu aproximadamente 10 veterinario lo participa den e campaña y ta anima comunidad pa probecha di e servicio gratis.

“Nos mester cu hende trece nan bestia. Si bo mester di ayudo, tuma contacto cu nos y nos lo haci loke nos por. Pero si bo por transporta bo mascota bo mes, por fabor haci esaki. Nos ta un organisacion chikito cu recurso limita y hopi peticion pa asistencia.”

Por ultimo, De Bruyn a enfatisa cu e fundacion ta spera cu e campaña lo sigui construi riba e resultado positivo cu nan alcansa durante e ultimo añanan y contribui na un reduccion mas grandi di bestianan no desea riba isla. Door di combina sterilisacion, educacion y participacion comunitario, AWAA ta busca pa crea un Aruba mas sigur y mas saludable tanto pa bestia como pa residentenan.