E perspectiva di un fin na e guera entre Iran y Merca/Israel tabatin efecto positivo inmediato mundialmente. Prijs di petroleo y gas natural a cuminza baha den un optimismo cu merece cautela sin embargo. Ta trata di un alto al fuego di 60 dia, durante cual e partidonan lo sigui delibera riba mayoria di aspecto pa cual no tin un areglo ainda. Un regreso na hostilidad ta parce un posibilidad remoto; cada partido tin nan motibo pa no continua e guera cu tabatin un costo enorme na ambos banda y cerca e paisnan den region tambe.

Pero e guera a mustra tambe cu poder militar grandi riba su mes no ta gana guera.Bombardea un pais no necesariamente ta haci un pueblo rindi; di esey tin hopi ehemplo den historia. Y tambe pone economia mundial na riesgo, inclusive na Merca mes, no ta parce un bon plan pa restablece hegemonia mundial. E guera y e actitud enemistoso Mericano, hasta y principalmente cu e supesto aliadonan di NATO, a solamente intensifica e busqueda di otro paisnan di lazo economico alternativo, lagando Merca un banda. Esaki ta conta en particular pa Europa y Canada, cu no por keda sin actua, buscando nan propio papel como bloque economico, cu no ta cuadra cu e vision di Trump, cu ta dividi mundo entre tres pais hegemonico: China, Rusia y Merca. Europa no tin pakico acepta e pensamento aki. Union Europeo, sin conta Gran Bretaña aden cu a mustra un aliado Europeo importante, ta un mercado mas grandi cu Merca y tres biaha tamaño di Rusia den poblacion y den GDP mas ainda. Ademas e reparticion cu Trump ta visualiza ta laga un banda un pais manera India, na e momento aki e pais cu mas poblacion y na caminda pa bira un poder economico importante.

Pa loke ta e situacion na Medio Oriente mes, punto mas importante ta cu e bloqueo di estrecho di Hormuz lo termina y trafico maritimo por reanuda. Pero esaki no ta significa cu di biaha por spera transporte maritimo den Golfo di Persia bolbe na e nivel normal. Tin varios problema pa resolve, entre otro e minanan cu Iran a pone den lama cu ta keda un peligro grandi pa barco. Ademas e asunto di seguro di embarcacion y mercancia si e peligro aki ta presente ainda. Prijs di petroleo pa futuro ta baha inmediatamente, pero lo tarda basta tempo pa e prijs pa e consumidordi gasolin y diesel baha na un nivel aceptable.Manera bisa anteriormente, un regreso na hostilidad militar ta menos probable, tambe si despues di 60 dia no tin un acuerdo final ainda. Partidonan envolvi lo prolonga e acuerdo actual. Mayoria di asunto clave no a keda resolvi, manera e tema di material nuclear enriqueci y e deseo di Iran pa keda cu energia nuclear. Ironicamente un acuerdo riba e puntonan aki ta keda cerca di e tratado cu gobierno di Obama a logra na 2015, cu presidente Trump a desbarata durante su promer periodo presidencial, pretendiendo cu e tratado tabata un desastre. Despues di esaki Iran a cuminza enriquece uranio, pasobra e pais no tabata mara mas na un acuerdo internacional. Ironia total lo ta si finalmente ta yega na un acuerdo cu ta practicamente identico na esun cu Obama a logra, lantando e pregunta pakico mester a causa tanto destruccion y gasta centenares di biyones na material militar, pa no papia mes di e destruccion causa na Iran y e paisnan den e region y na Libanon unda Israel ta hibando su propio ‘side-show’contra Hezbollah.

A pesar di e acuerdo momentaneo, gobierno di Trump ta sigui bao presion pa yega na un areglo definitivo. Dos luna di paz relativo ta pone nos den luna di augustus, cu poco tempo kedando pa eleccion na inicio di november na Merca. Un reanudacion di e guera sumamente impopular na Merca casi sigur lo ocasiona un desastre electoral pa partido Republicano, causando un perdida di mayoria den Congreso, posiblemente den tanto Senado como Camara di Representante. Ta importante por lo tanto pa resolve e asunto aki mas pronto posible. Pero gobierno di Trump tin mas ambicion. E intento di gobierno Mericano pa establece su mes atrobe como ‘doño di continente’ tin otro obhetivo na vista: Cuba. Esaki por bay causa bastante incrtidumbre den nos region, cu ta caracteriza pa hopi pais chiquito cu ta depende grandemente di turismo, entre nan nos propio pais. E peligro grandi ta cu na Merca esnan na fabor di guera por pensa cu Cuba lo ta un ‘paseo den ciudad’ manera na Venezuela, pero tur conocedor di e pais aki por comproba cu no ta yega facilmente na un acuerdo cu e regimen Cubano manera tabata e caso na Venezuela, unda realmente e top Chavista a entrega Nicolas Maduro y su esposa pa nan yega na un deal cu Trump encuanto reactivacion di industria petrolero. Cuba tin ademas lazo economico cu varios pais Europeo y cu Canada, cu no lo apoya Trump den un ‘take-over’sangriente na Cuba, unda un parti considerable di e pueblo lo defende nan pais. Por ta cu na e cumbre di paisnan di G7 actual esaki lo ta un di e temanan cu lo discuti. Progreso economico mundial mester di paz y no mas aventura militar di Merca. Sin embargo, e perdida di prestigio, especialmente cu e paisnan considera aliado, por conduci na un gobierno Mericano en busca di ocasion pa reafirma nan posicion di unico poder grandi, cu ya no ta un realidad mas. Dominio militar ya no ta e unico manera pa expresa influencia.