Ombudsman trahando… Y na gobierno pa actua…

Despues di institucion di Ombudsman como ultimo pais den Reino, awor por mira e promer frutonan di nan actividad. Claro cu esaki casi pa definicion ta riba tereno unda prestacion di gobernacion ta laga di desea. Hustamente p’esey tin un Ombudsman tambe, pa duna un impulso na mehoracion di e aparato publico, mas den direccion di interes di e ciudadano. Y awor palabra ta na banda gubernamental pa contesta kico ta e mehoracion cu tin planea, si esey ta e caso.

Un caso clave den e sentido aki ta e keho multiple cu a yega na man di Ombudsman tocante e fluho grandi di persona cu mester acudi na Censo pa inscribi. Esaki obviamente ta debi na miles di persona cu ta hayando permiso di estadia na ministerio di Husticia y despues mester bay Censo pa nan registracion oficial. Awor, cu e capacidad operativo di Censo no por cu e fluho aki, esey no mester ta sorpresa pa ningun, tampoco cu esaki ta trece incomodidad pa ciudadano cu mester haci uso di Censo. Loke ta remarcable ta cu e carta di Ombudsman encuanto e tema aki a bay pa ministro di husticia, tambe encarga cu integracion, y no pa ministro di asunto general cu, si no tabatin cambio den composicion di ministerio, ta directamente responsable pa e servicio publico unda e problema ta tumando lugar y unda lo mester tin un solucion. Ta trata mientras tanto di mas di seis mil persona cu mester registra a base di un permiso di estadia y proceso no a termina. E fluho regular cu Censo ta haya pa registra durante ultimo añanan (2023 – 2025) cu ta drenta Aruba, a subi di 3.132 na 2023 te 4.260 na 2025. Pa completa, emigracion tabata 2.760 na 2023 y 2.092 na 2025. Aña 2025 ta mustra anto e cifranan mas halto di aumento di e poblacion via migracion. No tin cifra conoci ainda di e fluho actual na 2026, tampoco di e reparticion entre persona naci na Aruba, otro ciudadano Hulandes y persona di otro nacionalidad. Tampoco dato di stranhero cu distincion entre persona cu permiso pa via di amnistia o cu ta drenta Aruba actualmente cu un permiso di estadia normal. E problema administrativo ta e aumento reciente di e cantidad di persona na Censo, sin cu tin un respuesta inmediato pa esaki. E recomendacion di Ombudsman logicamente ta pa aumenta esfuerzo di digitalizacion pa stimula acceso sin cu mester acudi na oficina. Den e caso di e migrantenan, cu o sin amnistia, tin un proceso digital presente na Husticia, cu por facilita e traspaso di dato pa Censo. Sin embargo, ta trata di un situacion cu tabata previsible desde inicio. Ta inimaginable cu un ministerio no ta comunica cu otro o cu despues di a señala e problema no a keda sigui e asunto manera por a spera. Di cualkier forma, por conclui cu e instituto Ombudsman a cuminza adverti y contribui na mehora proceso administrativo gubernamental, na beneficio di e ciudadano.

Fondo di inversion trata

Recientemente a tuma lugar e tratamento den parlamento di e propuesta di ley di un fondo di inversion, cu manera anticipa a haya critica fuerte di oposicion. Pero e pregunta cu mester haya contesta desde inicio ta: kico un fondo di inversion ta haci cu gobierno mes no por haci? No cu ta expresa aki obhecion contra un tal fondo, pero kico ta e beneficionan cu no por logra ora e inversionnan planea ta keda na e ministerionan cu ta encarga cu ehecucion? Kico ta diferente cu e practica te awe den mayoria di caso? Ademas, a tene cuenta cu e critica fuerte di e organismo constitucional cu mester controla, Algemene Rekenkamer, cu a haci un evaluacion bastante revelador di e fondonan existente. No a duna mucho informacion con e biaha aki control debido lo ta garantiza. Pero tin algo mas fundamental ainda: si bo ta bisa cu e ta un fondo di “desaroyo y inversion”, bo no por djis presenta un lista di proyecto, yam’e bo ‘agenda di inversion’ y cla ta. E palabra ‘desaroyo’ ta sugeri cu ta trata di un vision di desaroyo a largo plazo, anto ta logico cu comunidad tin derecho di tuma nota di e pensamento desaroyador tras di e fondo. Ademas, ta importante pa duna cuenta, y na tempo, di e avance di e labor, incluyendo informacion financiero di uso di e recursonan den e fondo. Esey ta e recomendacion tambe di CAft, cu den nan conseho encuanto presupuesto 2026 aproba, duna na januari 2026; cu ta encera tambe raporta tocante avance di e fondo den e cambio di presupuesto 2026 y den e reportahe di ehecucion (uitvoeringsrapportage). Cu esaki CAft ya a duna contesta na un pregunta cu a surgi den Staten durante tratamento di e ley, esta si e fondo di inversion ta cay bao di supervision financiero di CAft. Y pa responde esey aki mes: ta trata di fondo cu gobierno ta aparta di su propio patrimonio pa destina na un fondo cu ta cay directamente bao di escrutinio final ministerial. Anto e supervision financiero ta keda mescos, pero mas importante ta kico gobierno ta haci cu e recomendacionnan di Rekenkamer. Manera ta conta pa henter gobernacion, e fondo aki tambe mester entrega anualmente un declaracion aprobatorio di un accountant, y no un par di aña despues, manera ta casi tradicion na Aruba.

Tin un motibo pakico a tarda asina hopi aña pa nos haya un Ombudsman; ta e mesun motibo pa cual politico(nan) en general no ta encanta cu obligacion di duna cuenta. Control na tempo mester bira algo normal ainda…