E costo minimo calcula pa mantene un nivel di bida socialmente aceptabel na Aruba a sigui subi durante luna di mei 2026. Segun e ultimo Indice di Prijs di Consumo (CPI) publica door di Oficina Central di Estadistica (CBS), e bestaansminimum pa un hogar consistiendo di dos adulto y dos mucha a yega Afl. 5.641 pa luna di mei, loke ta representa un subida di Afl. 53 compara cu april 2026 y un aumento di Afl. 131 compara cu mei di aña pasa.

Pa un hogar cu consisti di un solo adulto, e bestaansminimum mensual a subi di Afl. 2.661 na april pa Afl. 2.686 na mei, un aumento di Afl. 25 den un solo luna. Compara cu mei 2025, esaki ta representa un aumento anual di Afl. 62. E cifranan ta mustra con e costo minimo pa cubri gastonan esencial ta sigui aumenta, aunke e inflacion general ta keda relativamente modera.

Segun CBS, e concepto di bestaansminimum no ta simplemente referi na e cantidad minimo necesario pa sobrevivi, sino na un nivel di entrada cu ta ser considera suficiente pa un persona of famia por participa di un forma adecuado den sociedad. Pa e motibo ey, CBS ta papia di un “sociaal bestaansminimum”, cu ta inclui e costo di diferente necesidad basico manera cuminda, paña, vivienda, transporte, comunicacion y otro gasto esencial den bida diario.

E instituto di estadistica ta señala cu e indice actual ta basa riba e estudio “Bestaansminimum 2010”, publica originalmente na december 2010. Cada luna e cantidad ta ser actualisa usando e cambionan den Indice di Prijs di Consumo (CPI), permitiendo e cifranan sigui refleha e evolucion di prijsnan den economia di Aruba. E unidad di referencia cu CBS ta usa ta un hogar di dos adulto y dos mucha cu edad entre 0 y 14 aña.

E aumento registra durante luna di mei a ser impulsa principalmente door di prijsnan mas halto pa cuminda y transporte. Segun e analisis di CBS, solamente e sector di “cuminda y bebida no-alcoholico” a agrega Afl. 80 na e costo anual di e bestaansminimum pa un famia di cuatro persona. Den e mesun periodo, e sector di “transporte” a contribui cu otro Afl. 27. Di otro banda, e sector “mobilario” a registra un reduccion di Afl. 11, e unico cambio significativo cu parcialmente a compensa e aumento den otro categorianan.

Mirando e composicion di e gasto, e costo mensual pa cuminda y bebida no-alcoholico pa un hogar di referencia a aumenta di Afl. 2.303 na mei 2025 pa Afl. 2.383 un aña despues. Vivienda a subi di Afl. 1.659 pa Afl. 1,677, mientras comunicacion a aumenta di Afl. 175 pa Afl. 186. Gastonan pa recreacion, educacion y otro bienes y servicio tambe a registra aumentonan mas chikito durante e ultimo 12 luna.

CBS tambe publica e cifranan pa diferente composicion di hogar. Den luna mei 2026, un adulto cu un mucha tabatin mester aproximadamente Afl. 3.492 pa luna. Un hogar di dos adulto cu un mucha tabatin mester cerca di Afl. 4.835, mientras e hogar di referencia di dos adulto cu dos mucha a yega tabatin mester Afl. 5.641. E calculacionnan aki ta basa riba escalanan di ekivalencia, unda e prome adulto ta conta como 1.0, un segundo adulto como 0.5 y cada mucha como 0.3. E sistema aki ta permiti adapta e costo minimo segun tamaño y composicion di cada hogar.

Un di e puntonan cu mas a hala atencion ta e situacion di personanan cu ta gana salario minimo. CBS a calcula cu, na mei 2026, un adulto cu ta ricibi salario minimo ainda tin un deficit mensual di entrada di Afl. 679 compara cu e bestaansminimum calcula. Esaki ta Afl. 41 mas halto cu e deficit registra un aña pasa, cu tabata Afl. 638. Segun CBS, esaki ta e deficit di entrada mas halto registra pa luna di mei den un periodo di seis aña.

E CPI ta indica cu, pa brinda un imagen mas completo di e situacion financiero di trahadornan cu salario minimo, CBS a incorpora dos columna adicional den su tabel estadistico. Un ta mustra e reparatietoeslag cu algun trahador elegibel ta ricibi, mientras e otro ta calcula e deficit despues di aplica e sosten financiero. Cu e reparatietoeslag di Afl. 175, e deficit pa un adulto cu salario minimo ta baha di Afl. 679 pa Afl. 504. Toch asina e suma cu ta resta ta mustra cu e entrada disponible ainda no ta alcansa pa cubri e costo calcula di un nivel di bida socialmente aceptabel.

CBS a enfatisa cu e metodologia di calculacion no a cambia. E instituto a indica cu mantene e mesun metodo ta importante pa sigura consistencia y comparabilidad entre e diferente añanan. Esaki ta permiti pa cambionan den e bestaansminimum refleha principalmente e movimento di prijsnan den e economia, y no cambionan den e forma di calcula e indice.

E desaroyonan den e bestaansminimum ta bay hunto cu e ultimo cifranan di inflacion. Durante luna di mei 2026, e Indice di Prijs di Consumo a subi cu 1.0% compara cu april, mientras cu e inflacion anual a yega 2.1%. Segun CBS, e aumentonan di prijs cu a contribui mas na e inflacion durante e luna tabata principalmente den transporte, paña y sapato, y comunicacion. Di otro banda, algun producto den e categoria mobilario a registra reduccion di prijs, mitigando parcialmente e efecto general di e aumentonan.

Mirando solamente e ultimo 12 luna, e bestaansminimum pa un hogar di dos adulto y dos mucha a subi di Afl. 5.510 na mei 2025 pa Afl. 5.641 na mei 2026. Di e aumento total di Afl. 131, e gran parti ta relaciona cu e costo mas halto di cuminda y transporte. Esaki ta confirma cu, a pesar di un inflacion relativamente modera compara cu periodonan anterior, e gastonan esencial cu mayoria di famia ta enfrenta diariamente ta sigui aumenta.

E cifranan publica door di CBS ta keda un herment importante pa evalua e costo di bida na Aruba. Ademas di sirbi como referencia pa analisis economico, e bestaansminimum ta ofrece un indicacion di con e cambionan den prijsnan por afecta e capacidad di hogarnan pa cubri nan necesidadnan basico. E actualisacion mensual di e indice ta permiti sigui e evolucion di e costo di bida y e presion financiero cu famianan y personanan individual por enfrenta den e contexto economico actual.