E teremotonan fuerte cu a sacudi Venezuela a move hopi curason na Aruba. Despues di e desaster natural diferente organisacion, iglesia, grupo comunitario, negoshi y ciudadano a cuminsa mobilisa pa duna un man di ayudo na e miles di famianan cu a perde sernan keri, cas y otro posesion esencial. Riba diferente plataforma di social media ta sigui aparece convocatoria pa colecta donacion y recauda fondo cu lo contribui na e esfuerso humanitario.

Pa hopi residente di Aruba, e tragedia no ta un acontecimento leu di cas. Venezuela ta un pais bisiña cu Aruba tin lasonan historico, cultural y familiar profundo cune. Hopi hende na Aruba tin famia, amigo of sernan keri cu ta biba den e areanan afecta, loke a haci cu e yamado pa solidaridad a haya un reaccion inmediato den comunidad. Mientras autoridadnan Venezolano y organisacionnan internacional ta traha pa brinda asistencia di emergencia, comunidad Arubano tambe ta busca forma di aporta den loke por.

E diferente iniciativanan ta enfoca riba colecta articulonan di prome necesidad, manera cuminda cu no ta daña facil, boter di awa, productonan di higiena personal, pamper, clechi, paña den bon estado, medicamento y otro suministro esencial. Organisadornan tambe ta invita comunidad pa haci donacion monetario cu lo yuda cubri gastonan logistico y cumpra articulonan cu ta urgente na e lugarnan mas gravemente afecta.

Fundacion VeneAruba Solidaria, cu durante añanan a brinda sosten na comunidad Venezolano na Aruba, ta entre e organisacionnan cu a comparti informacion y a expresa nan compromiso pa sigui apoya esnan cu ta pasando door di e situacion dificil.

Otro fundacionnan manera Cruz Cora Aruba (Red Cross Aruba) y Caritas Aruba, tambe ta sirbi como punto di contacto pa hendenan cu kier informa con nan por contribui na e esfuerso humanitario. Dependiendo di e necesidadnan cu ta surgi na Venezuela y e coordinacion cu organisacionnan internacional, e diferente entidadnan ta comparti informacion tocante e forma mas efectivo pa yuda, ya sea pa medio di donacion di articulonan, aporte financiero of coordinacion di boluntario.

Na mesun momento, diferente iglesia, negoshi local y grupo di boluntario ta coordina punto di colecta di donacion y ta usa nan rednan social pa mantene comunidad informa tocante con y unda por contribui.

Mas cu un simpel colecta di articulonan, e accionnan aki ta representa un expresion di solidaridad y compasion. Den momentonan di incertidumbre y dolor, hopi residente di Aruba a expresa cu nan kier laga e pueblo Venezolano sa cu nan no ta enfrenta e tragedia nan so. Aunke ningun donacion por reemplasa loke hopi famia a perde, cada caha di cuminda, cada pakete di productonan di higiena y cada aporte financiero por haci un diferencia real pa esnan afecta pa e desaster aki.

E ola di solidaridad na Aruba ta pone na evidencia cu, den momentonan di crisis, e lasonan humano cu ta uni dos pueblo bisiña por bira un fuente importante di speransa. Organisadornan ta sigui anima comunidad pa participa segun nan posibilidad, enfatisando cu hasta e gesto mas chikito por yega na un famia cu desesperadamente tin mester di sosten.