Contratistanan local, incluyendo empresanan chikito y mediano, lo tin un forma nobo pa participa den destahonan di Fundacion Cas pa Comunidad Arubano (FCCA). Cu e lansamento oficial di e plataforma digital DigiBID, FCCA ta busca facilita acceso na oportunidadnan di construccion y mantencion, mientras cu e ta modernisa y simplifica su proceso di destaho.
FCCA a presenta su plataforma digital nobo, DigiBID como parti di su esfuersonan pa modernisa y simplifica e proceso di destaho, mientras cu e ta amplia acceso na oportunidadnan di construccion y mantencion. Pa medio di DigiBID, companianan local registra na Camara di Comercio di Aruba por registra y haya acceso na destahonan cu ta habri. Contratistanan tambe por entrega nan ofertanan electronicamente pa medio di un sistema confidencial.
Jessica van Montfoort-Posner, Hefe di Servicio na Cliente, Marketing y Comunicacion na FCCA, a splica cu e fundacion ta dedica na ofrece casnan pa comunidad, un mision cu ta implica un fluho constante di proyecto di construccion, renobacion y mantencion den colaboracion cu diferente partner.
Segun Van Montfoort-Posner, pa FCCA ta di gran importancia cu companianan di tur tamaño tin e mesun oportunidad pa participa den e proyectonan aki. El a reconoce cu den pasado e proceso di destaho por tabata un poco fastioso y hopi biaha tabata exigi pa contratistanan keda pendiente constantemente pa no perde oportunidadnan. Esaki a motiva FCCA pa busca un solucion cu ta simplifica e proceso y haci participacion mas facil y accesibel.
El a indica cu DigiBID a ser desaroya precisamente cu e meta ey. Companianan cu cumpli cu e rekisitonan di inscripcion y entrega e documentacion necesario por sigui tur destahonan habri for di un solo plataforma y entrega nan ofertanan den un forma sigur y confidencial. Na e momento aki, solamente companianan estableci na Aruba y registra na Camara di Comercio por inscribi riba e plataforma.
Directora di FCCA, Julie Wever, a describi e lansamento manera un paso importante den e proceso continuo di modernisacion di e fundacion. Segun Wever, e plataforma digital ta ofrece contratistanan un manera mas eficiente y sigur pa entrega nan ofertanan, mientras cu e sistema ta garantisa cu tur oferta ta keda confidencial te ora cu e proceso di destaho a termina oficialmente.
Wever a agrega cu FCCA tin varios proyecto grandi den preparacion y cu e prome destaho cu lo ser publica pa medio di DigiBID lo sali pronto. El a enfatisa cu FCCA kier stimula participacion di contratistanan di tur tamaño, incluyendo empresanan chikito, mediano, grandi y tambe companianan cu ta specialisa den trabao specifico.
Segun Wever, e plataforma lo yuda mehora acceso na informacion tocante destahonan cu ta habri, atendiendo cu un di e retonan cu hopi contratista tabata enfrenta anteriormente: no semper tabata facil pa ta na altura ora cu oportunidadnan nobo tabata disponible. Ademas, FCCA lo sigui informa comunidad empresarial tocante destahonan nobo y sigui anima companianan pa registra, cu e meta di logra cu mas contratista local por participa den futuro proyecto di construccion y mantencion di casnan.
