Mester un corte… Constitucional…?

A surgi e tema di un corte constitucional na Hulanda pa Reino, cu por atende tambe disputa manera sa existi entre gobierno di un isla autonomo y gobierno di Reino. Esaki por ta un idea pa varios motibo, cu merece splicacion. Pero a pensa riba un corte constitucional na Aruba tambe? Pasobra tin isla (Sint Maarten) cu tin un corte asina. Por ta cu tin motibo pa nos no tin uno? Al fin y al cabo, crea esey ta un asunto autonomo, cu no ta requeri aprobacion Hulandes…

Pa cuminza cu e idea di un corte constitucional na Hulanda; esey ta un idea cu a surgi – atrobe – na 2021 unda gobierno di e tempo ey no tabatin mucho animo, pero a yega na un evaluacion di e sistema di corte constitucional na diferente pais, pa haya un guia pa un modelo viable. Den e evaluacion ey a contempla tambe e corte constitucional di Sint Maarten, introduci den nan sistema legal na momento di bira pais autonomo na 2010. Pa loke ta e corte constitucional na Hulanda mes, a pesar di un debate publico na 2023 y 2024, no a yega ainda na un acuerdo politico cu por incentiva e legislacion necesario. Un corte constitucional Hulandes anto, cu por keda encarga, no exclusivamente, cu caso di disputa entre gobierno di Reino y un teritorio autonomo, no lo ta realidad por lo pronto y talvez nunca, pasobra tin politico Hulandes ta prefera di mantene e sistema actual, unda den caso di disputa, e evaluacion ta tuma lugar den Raad van State, cu ta e asesor constitucional di ehecutivo Hulandes y no un tribunal di husticia. Esaki ta implica cu ehecutivo por pone e conseho un banda, pero mester tin motibo di peso pa esaki. Manera semper, un conseho no ta un veredicto y nos propio politiconan tambe sa bon con pa haci uso di e distincion ey.

Conclusion: pa loke ta un corte constitucional na Hulanda cu por keda encarga tambe cu disputa entre gobierno di Reino/Hulanda y un teritorio autonomo, sigur a corto plazo no lo bira realidad. Esaki ta implica cu por lo pronto lo keda un situacion den Reino unda e islanan lo keda enfatiza e ‘deficit democratico’ unda gobierno di Reino, domina pa gobierno Hulandes, na modo di papia ‘ta toca y baila’. Esaki naturalmente no ta un situacion agradable pa gobierno di e islanan, pero ta inherente na e modelo cu a scoge na 1954. Reino Hulandes no ta un estado federal, cu un gobierno di Reino cu ta consisti di partinan ni igual, ni representa equitativamente. Cu e Statuut a crea un organismo, sin personeria huridico, sin patrimonio o organizacion ehecutivo propio, cu realmente ta existi ora e organismo ta convoca den su reunion, di Conseho di Ministro di Reino. Tur loke ta toca actividad administrativo ta cay pa responsabilidad di gobierno di pais Hulanda. Por ta cu nos por mira cambio – marginal – na e modelo di gobernacion di Reino, expresa den Statuut. Loke nunca lo tuma lugar ta un modelo federativo, unda e pais anteriormente colonizador ta pone su mes vulnerable pa e deseonan di e anterior teritorionan coloniza. Aki nos ta topa cu e contradiccion di semper, cu pueblo mes a pone pa nos gobernantenan: deseo di mas independencia, sin supervision di Reino (Hulanda) no ta posible dentro di e actual acuerdo, pero di otro banda no por sali tampoco, pasobra pueblo den gran mayoria ta desea e capa di supervision di Reino. Tanten esey no cambia, y no tin señal palpable di esey, nos ta keda teritorio autonomo, ademas cu limitacion temporal extra di supervision financiero.

Corte Constitucional na Aruba?

Un corte constitucional di Aruba mes ta otro asunto, nunca proponi pa nos politiconan. Tin un modelo, di Sint Maarten, cu por sirbi como ehemplo pero no sin tuma na cuenta e experiencia aya. E corte na Sint Maarten ta consisti di un presidente ( y su reemplazante) segun recomendacion di Raad van State y for di su seno, y un vice-presidente (y su reemplazante) for di seno di Corte Comun di e islanan. E tercer miembro ta nombra riba proposicion di e Corte mes. Funcionamento te awor di e corte a keda limita, talvez tambe pasobra e casonan ta yega na corte solamente a traves di peticion di Ombudsman; un punto pa contempla sigur.

Pero kico asina no ta cuadra cu Constitucion cu corte por evalua? E ordenanza di Sint Maarten ta referi na ley y regulacion cu ta origina den e leynan ey. No tin claridad cual facultad e corte tin ora gobernacion no ta cumpli cu obligacion describi den Constitucion mes. Manera incumplimento di presidente(nan) di Staten cu regla constitucional encuanto convocacion di reunion parlamentario.

Den caso di institui un corte asina mester pensa cu lo tin consecuencia tambe. Ora gobierno regularmente o hasta continuamente ta laga na huez (constitucional) pa dicidi si cierto accion gubernamental ta hustifica, lo laga na huez pa dicidi si gobierno a practica bon gobernacion, envez di haci e pregunta critico ey na su mes. Unavez ta subi e caminda aki, por surgi e critica di politico mes cu huez ta sinta demasiado riba stoel di poder ehecutivo. E pregunta – retorico – lo ta: y ta ken a hiba asunto di disputa pa huez evalua y dicidi? Probablemente nos no ta haya un corte constitucional local pasobra no ta conveni e politico local. Ademas, e corte ey nunca por ta reemplazante di gobernacion adecua, di gobierno mes, respetando ley, primordialmente Constitucion. Nos por keda anto, den Reino y aki, manera bisa popularmente, cu ‘niun y ningun’…?