E caso penal cu Ministerio Publico (OM) tin pendiente contra parlamentario Mike de Meza (AVP) ta drenta un fase nobo, despues cu su ekipo legal a anuncia cu lo protesta e documento oficial di acusacion, e “dagvaarding”, una bes e documento aki ser entrega oficialmente. Segun un publicacion den un medio di comunicacion local, abogado Desiree Croes a indica cu defensa te ainda no a ricibi e documento cu mester specifica exactamente cual acusacionnan OM ta presentando contra su cliente, a pesar cu e caso ya tin fecha pa tratamento den Corte, dia 24 di augustus.

E anuncio di defensa ta sigui despues cu De Meza a rechasa un propuesta di areglo cu OM a presenta anteriormente. Segun defensa a indica, e propuesta no tabata basa riba fundamentonan factual ni huridico suficiente pa hustifica un areglo. Na opinion di abogado Croes, no tin base pa un persecucion penal y e caso no mester a yega den Corte.

Segun e noticiero local, abogado Croes a indica cu defensa ta prepara pa protesta e procedemento legal desde e momento cu e documento oficial di acusacion ser entrega. Segun e, e manera con e proceso a bay te awor ta motibo pa cuestiona e procedemento. El a sostene cu, den opinion di defensa, simplemente no tin un caso fiscal contra e parlamentario.

Croes a argumenta cu e asunto fiscal di De Meza ta resolvi y cu e declaracionnan di impuesto cu anteriormente no a ser entrega na tempo finalmente a ser entrega, procesa y acepta pa Departamento di Impuesto. Segun defensa, esaki ta un elemento importante den evaluacion di e caso, pasobra e situacion fiscal di De Meza awor ta regularisa.

Abogado Croes a señala tambe cu durante un procedemento anterior, Inspector di Impuesto a confirma den Corte cu e obligacionnan fiscal di De Meza tabata na ordo. Segun defensa, e punto ey ta fortalece e posicion cu no tin base pa un acusacion.

Un elemento central den e discusion actual ta precisamente e dagvaarding. Den derecho, e documento aki ta marca e inicio formal di un proceso hudicial. E dagvaarding ta indica e hechonan cu OM ta considera castigabel, e articulonan di ley cu segun OM a ser viola y e acusacionnan concreto cu lo ser presenta dilanti hues. Solamente despues cu e documento aki ser entrega oficialmente, defensa por analisa detayadamente e acusacionnan y formula su reaccion formal.

Segun Croes, defensa a solicita copia di e documento oficial mesora cu nan a informa OM cu nan no tabata acepta e propuesta di areglo. Sinembargo, te na momento di e declaracionnan recien di abogado Croes na e noticiero local, e documento ainda no tabata den man di defensa.

A pesar di esey, defensa ta indica cu dia 24 di augustus no ta representa ningun problema. Si e caso sigui manera cu ta programa, De Meza y su abogadonan ta prepara pa presenta den Corte pa protesta e acusacionnan.

E investigacion contra parlamentario Mike de Meza ta bin despues di un periodo prolonga di controversia relaciona cu su situacion fiscal y cu e proceso di screening cu tabata necesario pa su posible nombramento como minister den Gabinete AVP-Futuro.

Na comienso di 2025, De Meza tabata e candidato di AVP pa ocupa e cartera di Infrastructura, Energia y Medio Ambiente. Sinembargo, e proceso di screening no a ser completa despues cu Departamento di Impuesto a emiti un evaluacion desfaborabel tocante su comportamento fiscal, loke a impedi cu e nombramento sigui manera inicialmente tabata plania.

Esaki a conduci na varios procedemento legal. De Meza a inicia un caso contra Departamento di Impuesto buscando pa e instancia duna un declaracion faborable tocante su comportamento fiscal. Segun defensa, tabatin diferencia di opinion tocante con Departamento di Impuesto a interpreta su dossier fiscal y con e informacion a ser presenta durante e screening.

Na juni di 2025, Corte a conclui cu e no tabata competente pa ordena Departamento di Impuesto emiti un declaracion faborable. Segun e sentencia, e cartanan di DIMP tabata di caracter informativo y no tabata constitui decisionnan administrativo cu por ser protesta den e procedemento cu De Meza a inicia. Corte a indica cu finalmente ta e formador di gobierno tin e responsabilidad politico pa dicidi si un candidato ta apto pa ser nombra minister.

Paralelamente na e proceso administrativo, un investigacion penal tambe a surgi. Durante e proceso di screening, OM a confirma cu De Meza tabata ser considera un sospechoso den un investigacion relaciona cu posible infraccionnan fiscal. Despues di esaki, De Meza a solicita na Corte pa OM duna mas claridad tocante e naturalesa di e sospechonan y e base legal di e investigacion.

Den un decision Corte a determina cu OM a cumpli cu su obligacion di informa De Meza cu e tabata sospechoso den un investigacion penal y di comunica e articulo di ley relevante. Corte no a obliga OM pa anuncia ainda si efectivamente lo sigui cu un persecucion penal na e momento ey, considerando cu e peticion tabata prematuro.

Finalmente, OM a presenta un propuesta di areglo den e caso. E contenido exacto di e propuesta no a ser haci publico. De Meza y su defensa, sinembargo, a rechasa e oferta. Segun defensa, e propuesta no tabata hustifica pasobra, den nan opinion, e hechonan no ta constitui suficiente base pa persecucion penal.

Awor cu e propuesta di areglo no a ser acepta, OM a sigui cu e proceso regular pa hiba e caso dilanti Corte. E siguiente paso ta e entrega oficial di e documento di acusacion, dagvaarding.

OM ainda no a publica oficialmente e contenido di e acusacion cu lo ser presenta den Corte. Esaki ta nifica cu e cargo of cargonan exacto cu De Meza lo enfrenta ainda no ta conoci publicamente.

E tratamento di e caso ta programa pa dia 24 di augustus. Durante e audiencia, Corte lo por analisa si e procedemento por sigui y despues trata e acusacionnan cu OM lo presenta.

Mientras tanto, defensa ta mantene cu e posicion di De Meza no a cambia. Segun abogado Croes, tur asunto fiscal ta resolvi, e declaracionnan di impuesto a ser acepta door di Departamento di Impuesto y, segun nan interpretacion di e hechonan, no tin base legal pa un condena penal.