E ta un hecho cu globalmente debe gubernamental di paisnan G7 ta un nivel alarmante. Un segundo hecho ta cu tayonan di interes riba debe di paisnan G7 ta hisando, tambe den un manera cu mester mas atencion publico. Si e tendencianan aki sigui asina, y no tin ningun motibo na horizon pa pensa cu esaki lo cambia. E lo tin consecuencianan profundo riba mercadonan financiero global. E scenario aki den terminonan academico ta wordo yama “Yield Curve Control”. Den e columna aki nos lo splica breve kico esaki ta, dicon e ta di importancia grandi, y kico lo por ta e impacto riba pais Aruba.
Kico ta Yield Curve Control?
Ora un gobierno mester placa, e ta fia dje mercado. E ta bende “bono di estado” — un papel cu ta priminti pa paga bek e suma presta cu interes despues di cierto tempo. E interes cu inversionistanan ta exigi pa e bononan aki yama “rendimento” (yield). Den un situacion normal, e banco central ta controla solamente e interes di corto plazo. E rendimento a largo plazo ta keda den man dje mercado.
Ora un gobierno/pais tin un nivel di debe demasiado halto, e nivel di interes riba bono di estado ta hunga un rol sumamente grandi. Simplemente pa un pais no bay failliet, cual ta politicamente inaceptabel, e nivel di interes riba bono di estado no mag di hisa dimas. Exactamente cua nivel ta considera “demasiado halto” ta un pregunta hopi complica. Pero por nota cu desde 2022, e tayo di interes di casi tur pais den G7 a hisa den un manera obviamente alarmante.
Den e scenario di Yield Curve Control, paisnan bou presion di tayo di interes, ta causa cu Banconan Central local ta interveni: e ta pone un “techo” riba e rendimento/interes (yield) y ta imprimi placa nobo pa cumpra tur bono cu mester pa mantene e techo ey.
E ora un lector por puntra su mes, pero Simon, Banconan Central ta suppose di ta completamente neutral di influencianan asina, con Yield Curve Control lo por pasa den e contexto aki?
Nos no mester lubida, cu te hasta Banconan Central grandi manera ECB (Europa), FED (USA), BoJ (Japon) ta bou presion inmenso di politica local. Asina leu, cu te hasta e siman aki, un Presidente di ECB, den un comunicado a indica esaki.
Kico ta e efecto di Yield Curve Control pa Aruba?
E “techo” riba e rendimento no ta gratis. Pa tene e rendimento abou, e banco central mester cumpra bono — y e ta haci esaki cu placa cu e ta crea for di nada. Esaki yama “quantitative easing” (QE). E resultado ta cu e cantidad di placa den e sistema lo hisa significantemente. Esaki simplemente lo causa cu inflacion globalmente lo hisa.
Aunke e scenario di Yield Curve Control, siguramente no ta “institutional consensus” ainda, es decir. Cu e no ta obvio pa mayoria economista profesional, e ta parce mi hopi prudente pa cuminsa discuti e scenario aki den mas detaya. Tambe pa e motibo di e impacto inmenso cu esaki lo por tin pa mundo, y pa isla di Aruba.
Usando Claude Opus 4.8, a traha un modelo sofistica di inflacion bou di diferente scenario di Yield Curve Control. Den e scenario mas controla y cu tiki panico bou inversionista, inflacion na Aruba lo por hisa te na 5.4% anualmente. Den scenarionan mas severo e porcentahe aki lo por ta significantemente mas halto.
Pero nos no tin cu lubida e interaccion di inflacion y tempo: Hasta den scenarionan mas conteni, un inflacion anual di 5.4% kiermen cu pa 2030, e Florin Arubiano lo perde 23% di su balor den terminonan real.
Kico e ora lo ta e impacto riba largo plazo pa Aruba?
Den mi punta di bista tur e trendnan monetario internacional lo haci cu Aruba lo cuminsa bira “onregeerbaar”. Unda cu Gobiernonan den futuro lo cay rapidamente tra’i otro, bou di presion di un poblacion local cu lo bira mas y mas descontento cu nan perdida di poder di compra. Un analogia por ta paisnan manera Italia, unda gobiernonan tabata cay den averahe cada 2 aña.
Tambe nos por a nota, cu mas cu 4 aña pasa caba mi persona a nota cu “Stagflation Global” lo tuma lugar y cu Aruba tin cu prepara pa cu esaki. Lastimamente, esaki no a pasa, cu e consecuencianan cu nos tur a cuminsa sinti den nos bida diario. E ta duel mi persona cu nos pais por a prepara su mes hopi mas miho, si a tuma tur e advertencianan aki na serio.
