Mediante un comunicado di prensa, Departamento di Enseñansa Aruba (DEA) a comparti informacion tocante e peticionnan pa Arubalening y e proceso e aña aki, ademas di comparti informacion importante pa e studiantenan cu a aplica pa Arubalening.

Segun DEA, e aña aki a ricibi 63 peticion di studiantenan cu ta desea di sigui nan estudio avansa na Aruba y 360 peticion pa un fiansa pa estudio pa sigui un estudio den exterior. Total esaki ta 423 peticion.

Tayer

Departamento di Enseñansa Aruba (DEA) den colaboracion cu Realign Coaching Consultancy & Services, cu sosten di Stimuleringsfonds y Strategic Educational Alliance – Nederlandse Samenwerkende Hogescholen (SEA) a termina orguyosamente e programa unico: “Ban pa Bay 2026”.

E programa aki a consisti di 6 tayer unico, specificamente diseña pa yuda tur studiante cu a haci peticion pa un Arubalening y cu ta bay cuminsa cu un estudio superior, sin importa si nan ta bay studia na Aruba, Corsou, Hulanda, Merca, Canada of cualkier otro pais den exterior.

E tayernan a cubri topiconan manera:

• Con pa studia den educacion superior, prepara bo portfolio y planificacion ;
• Asertividad, imagen propio y liderazgo;

• Transicion pa bida universitario na Aruba y tambe den exterior ;
• Maneho di emocion, independencia;

• Traha e presupuesto cu ta fit abo!

• Preparacion mental y cultural pa un miho integracion.

Studiantenan cu no a participa na e tayernan aki mester haci un tarea cu nan lo ricibi via e-mail. Na momento cu nan cumpli cu e tarea aki nan por bin na remarca pa haya e Arubalening.

Fecha Importante

Dia 15 di juli 2026 ta e ultimo dia cu por entrega e documentonan pa termina cu e proceso di Arubalening.

Tur studiante cu nan peticion digital a wordo aproba (goedgekeurd) a haya 6 link den nan Arubalening Portal.
Den e linknan aki mester upload e siguiente 6 documentonan:
1. Vooropleidingsdiploma: E diploma mester ta certifica (gewaarmerkt). Por haci esaki na scol mes of mester pasa na Dienst Inspectie van het Onderwijs pa por laga certifica e diploma.

2. Bewijsstuk Arubaanse Bankrekeningnummer: Esaki mester ta un cuenta coriente na un banco local na nomber di e studiante.

3. Bewijsstuk Verzekering: Esaki ta un seguro na e pais unda e studiante ta bay biba.

4. Bewijsstuk toelating: Akinan mester upload e carta di aceptacion na e scol cu ta bay sigui studia.

5. Contactgegevens Ouders: Akinan mester yena e datonan di e mayornan.
6. Overeenkomst Arubalening: Akinan ta upload e overeenkomst Arubalening cu ta coresponde na e pais na unda e studiante ta bay studia. Por haya esaki riba nos website: https://www.ea.aw/pages/studia/arubalening-overeenkomst/

Na momento cu nos aproba e “Overeenkomst tot geldlening”, e studiante ta haya un “Verklaring tot toekenning” den su Arubalening Portal. E “Verklaring tot toekenning” ta mustra bashi, primi afdrukken pa wak esaki y print e.

Mester entrega dos (2x) version orginal di e “verklaring” aki hunto cu dos (2x) version original di e “overeenkomst” cerca nos na Departamento di Enseñansa Aruba (DEA), seccion di Studiefaciliteiten. Por fabor tene na cuenta: TUR DOS MESTER TA FIRMA CU PEN BLAUW! Sin esaki nos no por paga e studiante. Departamento di Enseñansa Aruba ta ubica na e John F. Kennedy Education Center na Stadionweg 37.

Vuelo pa Hulanda

Pa esnan cu ta bay sigui nan estudio na Hulanda y ta desea di biaha cu e vuelo organisa dia 5 augustus 2026: por fabor tene na cuenta cu dia 15 juli 2026 ta e ultimo dia pa indica si ta desea e Arubalening NL Reisproduct.

Nos ta pidi tur studiante pa bay den nan Arubalening portal y controla si a scoge pa e Arubalening NL Reisproduct.

Esnan cu a scoge esaki y awo ta planea pa biaha riba un otro fecha cu dia 5 di augustus 2025 tin te dia 15 juli 2026 pa indica cu nan no ta desea di bin na remarca mas pa e Arubalening NL Reisproduct. Den caso cu e studiante no informa seccion Studiefaciliteiten cu e no ta desea e Arubalening NL Reisproduct mas, e suma di e ticket lo wordo kita for di e startpakket di e studiante.

Esnan cu no a pidi pa e Arubalening NL Reisproduct ainda tambe tin te dia di 15 juli 2026 pa pidi esaki.

Despues di dia 15 juli 2026 nos no por kita ni agrega niun studiante mas riba e vuelo.

Por fabor avisa nos via nos e-mail arubalening@ea.aw of via nos Whatsapp Only line 594-4140.

Censo

Pa locual ta regarda uitschrijving for di Censo, seccion Studiefaciliteiten, Arubalening, mester manda un lista cu nomber di tur studiante cu ta sigui nan estudio den exterior pa Censo y Censo na su turno ta indica na e studiantenan riba ki dia nan por pasa Censo pa schrijf uit.

Hopi exito

Personal di DEA y seccion Studiefaciliteiten ta desea tur studiante exito cu nan ultimo preparacionnan. Disfruta di e ultimo dianan na Aruba sanamente y nunca lubida e meta cu bo a pone bo dilanti.

Keda up-to-date dor di acudi regularmente na nos website www.ea.aw como tambe sigui nos via social media (facebook y instagram) @educationaruba.

Pa cualkier pregunta por tuma contacto cu seccion Studiefaciliteiten en -begeleiding via nan WhatsApp only line 594-4140 of por manda un e-mail na arubalening@ea.aw. Por pasa personalmente tambe cerca nos na Stadionweg 37. Nos no ta tuma yamada pero por haci un peticion pa nos callback.