Hobennan di Aruba entre 20 pa 28 aña di edad tin un porta nobo cu a habri pa nan den creacion di politica Europeo via Overseas Countries and Territories (OCT) Youth Network.
Overseas Countries and Territories Youth Network ta un iniciativa di Comision Europeo cu ta conecta hobennan for di teritorionan den exterior di EU cu institucionnan Europeo, y awo e ta aceptando aplicacion pa su proximo edicion anual.
Solicitantenan exitoso lo pasa henter un aña ta siña tocante e relacionnan entre Union Europeo y pais y teritorio den exterior, incluyendo un biahe di estudio na Bruselas.
Segun e Comision Europeo su propio descripcion di e programa, cada edicion ta scoge 25 hoben for di 13 teritorio asocia cu EU, cual banda di Aruba, ta inclui Boneiro, Corsou, Saba, Sint Eustatius, Sint Maarten y varios teritorio Frances y Danes.
Den centro di e programa aki ta un bishita di estudio di un siman na Bruselas, durante cual e miembronan ta explora con institucionnan Europeo ta funciona y ta reuni cu representantenan y lidernan politico. Mas aleu cu e biahe aki, e programa ta inclui webinar online diseña pa profundisa e participantenan su conocemento y habilidadnan, eventonan di network cu otro hobennan y stakeholdernan clave, ademas di sesionnan di dialogo cu lidernan politico di EU. E miembronan tambe ta haya invitacion pa forma parti di reunionnan internacional manera e forum OCTs-EU, dunando nan un plataforma mas aleu di nan isla.
Notablemente, e programa no ta educacional den un solo direccion. E participacion no ta solamente pa e hobennan absorbe informacion tocante EU; nan ta anticipa explicitamente di trece nan propio perspectiva den e relacion. Manera e comision ta describi, miembronan ta contribui na duna forma na actividadnan di e network y ta yuda scoge e prioridadnan y topiconan cu e mester atende di awo en adelante. Den otro palabra, e participantenan tin e libertad di contribui na e relacion entre EU-OCT for di un perspectiva hoben y te hasta ta haya e oportunidad di trece dilanti e topiconan cu nan ta kere ta merece mas atencion dentro di e partnership aki.
A establece OCT Youth Network na aña 2022 y su proposito, segun e Comision, ta di aumenta y mehora e laso entre hobennan bibando den e pais y teritorionan y EU, ademas di amplia e conocemento y participacion di hobennan den e partnership di OCT-EU. Splica di manera mas concreto, e red su obhetivonan ta di conecta hobennan den e 13 teritorio cu otro y institucionnan Europeo, pa provee un perspectiva hoben tocante e relacion, profundisa comprension di EU dentro di e teritorionan mes y crea conexion cu otro iniciativanan hoben na ambos un nivel nacional y regional.
E iniciativa tambe ta den un cambio di politica mas amplio di EU. E comision ta señala na su Youth Action Plan den accion externo, adopta na october di 2022, como e cuadro cu ta formalisa un vision di partnership cu hobennan como actor esencial di cambio pa sociedadnan mas democratico, igual, inclusivo y pacifico. Den otro palabra, esaki no ta un gesto individual dirigi na hubentud Arubano specificamente, sino parti di un strategia amplio pa trata hobennan como partner activo den politica di desaroyo na luga di mira nan como solamente recipientenan pasivo di esaki.
Importancia pa Aruba
Pa un isla chikito cual su relacion cu Union Europeo hopi biaha ta topico di discusion na nivel di status legal – LGO of UPG, acuerdonan di asociacion, fondo strcutural – e programa aki ta ofrece algo mas incomun, pues e ta ofrece un canal directo y personal den e relacion pa hobennan Arubano comun, no solamente diplomaticonan of ambtenaarnan.
Como un pais autonomo den Reino Hulandes, Aruba tin e status di un Overseas Country and Territory bao ley di EU. Esak ta nifica cu e ta asocia pero no un miembro completo di e Union Europeo. E status aki ta duna forma na tur cos for di reglanan di mercado te na acceso na financiamento, y frecuentemente ta suheto di debate tecnico di politica den cual e pueblo cu e ta afecta di manera mas directo – e mesun ciudadanonan di Aruba – masha poco ta haya un asiento na e mesa. Un red manera esaki no ta cambia Aruba su status legal, pero si e ta cambia ken ta haya e oportunidad di compronde e status aki suficientemente bon pa interactua cune, y ken tin un bos ora cu institucionnan di EU ta pone decisionnan futuro den balans cu ta afecta e OCTnan.
Aruba a yega di tin representacion den edicionnan pasado di e iniciativa. Recordnan publico ta mustra cu tabatin participantenan di Aruba presente den varios grupo anterior, dunando evidencia cu esaki no ta trata di un oportunidad hipotetico sino uno cu nos hobennan a yega di usa caba den añanan reciente. Na mesun tempo, cu e hecho cu tin participacion di Aruba den varios edicion anterior, nos por refleha un presencia consistente pa e teritorionan di Caribe Hulandes, banda di Corsou y Boneiro, desde su fundamento.
E comision su recuento di e iniciativa su historia ta mustra con e formato a evoluciona desde su lansamento. E prome edicion, tumando luga for di 2022 pa 2023, a uni 25 hoben hunto for di loke tabata 10 OCT participante y a culmina den un Youth Declaration cu a presenta na OCT-EU Forum na Nouméa, New Caledonia.
Den su tercer edicion, cubriendo 2024 y 2025, e red a crece di tal manera cu el a inclui representantenan di 13 teritorio asocia, y e miembronan a forma parti di un rango mas amplio di eventonan di nivel halto – incluyendo dialogo structura cu Younous Omarjee, vice-presidente di Parlamento Europeo cu ta responsable pa OCTs, ademas di participacion den Climate Finance Forum na Bruselas, European Youth Event na Strasbourg y United Nations Conference on the Oceans na Nice. E trayectorio aki ta sugeri cu e iniciativa consistentemente ta gara mas forsa institucional dentro di EU su makinaria di relacionnan externo, na luga di keda un proyecto piloto.
Na nivel individual, e programa aki ta ofrece e participantenan un adicion poco comun pa profesionalnan hoben di Caribe: participacion directo cu institucionnan Europeo, un biahe di estudio pa Bruselas, un aña di exposicion structura na procesonan di politica internacional, networking y dialogo publico. Pa hobennan di Aruba cu ta considerando un carera den administracion publico, relacionnan internacional, ley, sostenibilidad of politica, e tipo di exposicion institucional aki ta dificil di obtene via canalnan local so.
Na nivel colectivo, e posible impacto ta menos cierto pero posiblemente mas significante. Cada edicion a historicamente produci un Youth Declaration, presenta na OCTs-EU Forum, den cual participantenan ta articula e prioridad di hobennan dentro di e partnership entre Union Europeo y e OCTnan.
Declaracionnan den pasado a trece dilanti topiconan cu ta cubri for di resiliencia di clima na intercambio cultural entre e teritorionan y EU. Sea cu e declaracionnan aki ta traduci den cambio di politica concreto no ta algo cu por verifica for di e iniciativa su recordnan publico y ta bal la pena pa nos como residentenan di nos isla mantene un bista critico riba con hopi peso den politica e contribucion di nos hobennan ta carga compara cu e balor simbolico di e participacion.
Tog, hasta como un mecanismo simbolico, representacion hubenil sosteni den cada edicion ta construi un recuerdo institucional cumulativo y un cadena di bos Arubano cu tin contacto directo cu Bruselas – un recurso cu ta carga un importancia considerable, mas ainda si Aruba su propio relacion cu EU evoluciona den e añanan binidero, sea via negociacion di financiamento, posible dialogo tocante su status of prioridadnan nobo di cooperacion.
Bayendo mas leu, tin un beneficio practico cu ta mas inmediato pa hobennan di Aruba, y esaki ta e desaroyo profesional cu tiki oportunidadnan local por iguala. Banda di studia institucionnan Europeo for di un buki den klas, participantenan ta siña directamente for di e personanan cu ta opera nan, manera por ehempel den e sesionnan di dialogo cu a menciona anteriormente. E tipo di exposicion directo aki ta precisamente e tipo di experiencia cu ta impulsa y amplia comprension profesional di con politica, diplomacia y administracion publico ta funciona den practica.
