(AFP)—Un adolescente cu a mata cuatro persona cu un arma cu su tata a regal’e pa Pasco a ser condena diamars na cadena perpetua pa un atake na un scol secundario den e estado Mericano di Georgia.
Colt Gray, di 16 aña, a declara su culpabilidad pa e atake cu a tuma luga na september di 2024 na Apalachee High School den e ciudad di Winder.
Gray tabatin 14 aña ora el a mata dos studiante di 14 aña y dos maestro, mientras cu nuebe otro persona a resulta herida. El a ser procesa como un adulto. Hues Nicholas Primm di Corte Superior a sentencia Gray na cadena perpetua sin posibilidad di libertad condicional.
“Bo mayornan por a faya bo. Bo famia por a faya bo,” Primm a bisa. “E fracaso ey no ta kita bo responsabilidad pa kende bo a scoge pa idolatra, adora y bira.”
“Bo no a ser maltrata na Apalachee,” e hues a bisa. “Bo no a haci esaki pa odio. Bo ni sikiera tabata conoce e personanan na e scol. Bo a haci esaki pa bira famoso.”
Tata di Gray, Colin Gray, a ser condena na maart di 2026 pa asesinato di segundo grado y homicidio inboluntario, den un caso poco comun unda un mayor a ser procesa pa un incidente di tiro cometi pa su yiu.
Colin Gray a cumpra e rifle estilo AR-15 cu su yiu a usa den e incidente como regalo di Pasco na 2023, a pesar di advertencianan cu su yiu a menasa di comete un tiramento na un scol.
Incidentenan di tiro na scol ta sucede regularmente na Merca, unda tin mas arma cu hende y unda e reglanan pa cumpra, hasta riflenan poderoso di estilo militar, ta relativamente flexible.
Responsabilidad di mayornan den incidentenan di tiro masal a haya cada bes mas atencion den e ultimo añanan. Mayornan di un adolescente cu a mata cuatro persona na un scol secundario na Michigan na 2021 a ser condena na 2024 pa homicidio inboluntario y sentencia na entre 10 y 15 aña di prison den un caso sin precedente cu a atrae hopi atencion.
