Diamars Bon Dia Aruba a haya oportunidad pa sinta cu presidente y tesorero di Fundacion CONPA, Sr. Simon Waslander y Sr. Aaron Bislip, pa papia tocante e iniciativa di Fundacion CONPA pa amplia conscientisacion tocante e proyecto di vivienda controversial na Burubundu. Durante e entrevista, e representantenan di e fundacion investigatorio a conta tocante e ultimo desaroyo den nan accion atendiendo cu e situacion di Burubundu como tambe respuesta cu nan ta hayando for di ambos miembronan di comunidad y gobierno mes.

CONPA, cual ta un abreviacion pa “Consenshi di Pueblo di Aruba”, ta un organisacion NGO cu ta tene conscientisacion central den nan operacion. Manera presidente Simon Waslander ta splica, e fundacion ta tuma un maneho centra riba bienestar humano, creando un “frente uni” den organisacionnan social y sindicatonan na Aruba. CONPA tin hopi aña ta existi, pero te recien a bira activo atrobe unda riba 1 di juni 2026, Sr. Waslander y Sr. Bislip a ser instala como directiva di e organisacion.

Pa loke ta e proyecto di Burubundu, tabata Bislip cu a cuminsa cu un analisis riba su mes. Despues di publica dos analisis tocante e verkavelingsplan di e proyecto, e resalta cu e situacion ta toca hopi mas cu solamente falta den informacion oficial. Aki tabata trata di un falta di conscientisacion comunitario tocante e proyecto, falta di participacion y cooperacion entre diferente instancia y departamento di gobierno. Ta pa e motibonan ey cu CONPA a considera e iniciativa aki como algo cu nan por atende cu ne como fundacion. Sosteniendo Bislip, awor CONPA ta liderando e campaña di conscientisa pueblo tocante e proyecto cu a genera un critica y debate tocante con Pais Aruba ta y por maneha e crisis di vivienda riba e isla.

Resumen corto di e situacion

Comienso di juni 2026, ministerio di Vivienda bao maneho di minister Rene “Baba” Herdé a anuncia e proyecto di Burubundu Residence, unda tin plan pa construi 850 pa 1000 vivienda pa ciudadanonan. Aunke pa un parti di poblacion e noticia aki ta marca un paso den bon direccion pa atende cu e crisis di vivienda, otronan—specialmente den area di Pos Chikito—a expresa nan preocupacion tocante posible daño na naturalesa y strobacion pa e comunidad den bisindario. Pa algun hende, e hecho cu e proyecto ta rekeri rosamento di mondi caba a presenta un mal señal. Sinembargo, ta parce cu e proyecto tabatin otro aspecto cu no tabata cuadra cu ley of pa cual no a duna suficiente informacion.

Den su analisis tocante e verkavelingsplan di e proyecto entrega na DIP, Sr. Aaron Bislip a tuma nota di tres problema cu ta existi den e verkavelingsplan. Pa prome, e plan di gobierno ta falta transparencia tocante diverso aspecto importante di e bario nobo. Entre otro, dibuhonan y documentonan oficial di e proyecto no tabatin aanleiding ni autor, cual como ingeniero, Sr. Bislip a haya straño. A indica cu cierto aspecto cu ta bale investigacion a ser marca como “wordt nader bestudeerd.” Den otro palabra, ainda falta pa mas investigacion tuma luga. Segun CONPA ta bisa, bo no por entrega un plan asina grandi cu asina tiki informacion. Ademas di un falta den informacion, a resulta for di investigacion cu varios instancia y departamento di gobierno no tabata consciente di e proyecto y pues te awor no ta envolvi.

Tambe tabatin e gapnan den loke ta maneho di trafico y infrastructura crucial, manera rioolering. Investigacion di Bislip a mustra cu camindanan tabata hopi smal y lo pone mas presion riba caminda grandi den Pos Chikito. Ademas no tabatin un plan cla tocante con e sistema di rioolering lo ser instala den e bario nobo, cual ta crea espacio pa companianan di chica awa benta esaki den naturalesa.

Papiando di naturalesa, e rosamento rekeri tambe tabata un punto crucial den e analisis. Manera a menciona, hopi hende a ripara mesora cu rosamento di naturalesa—di cual Aruba no tin mucho mas—lo ta necesario pa construi e casi 1000 vivienda proponi. Investigacion di Bislip ta hasta subraya un contradiccion den e plan, unda aparentemente lo rosa unda tin naturalesa habri pa asina construi un parke.

Cu e puntonan central aki, Bislip—y awor CONPA—a lansa un campaña pa conscientisa pueblo tocante kico e plan aki ta encera, of ta falta.

Kico tur e campaña a logra te awor

Desde publicacion di Bislip su analisis riba e proyecto, e autor a dedica su tempo na amplia conscientisacion tocante varios aspecto di e proyecto y specialmente riba loke no ta cuadra. Diaranson ultimo, dia 22 di juli, CONPA a entrega e zienswijze riba e proyecto. Un zienswijze ta un reaccion oficial entrega na gobierno tocante un plan cu ainda no a ser ehecuta of defini. E zienswijze a ser entrega na Dienst Openbare Werken (DOW).

Manera e fundacion a splica, e zienswijze ta un canal oficial unda por referi back na dje den e combersacion di Burubundu. E zienswijze ta subraya varios contradiccion den e planificacion di e proyecto como tambe e parti huridico. Un ehempel ta e hecho cu Pos Chikito ta un area cu ya ta sobredesaroya, pues no por haci mas eynan.

Tambe a pone den zienswijze e hecho cu varios instancia y departamento no tabata inclui of ni tabata sa di e proyecto, por ehempel scolnan den bisindario, bisiña y ni e departamento di planificacion di Cuerpo Policial, segun e representantenan di CONPA ta conta. Y pa e fundacion, esaki ta algo preocupante. Den un situacion di emergencia, por ehempel, vehiculo di bombero, ambulance of polis mester por core den e cayanan di e bario sin enfrenta problema logistico. Con lo construi e cayanan, e verkavelingsplan no a duna mucho informacion cu excepcion cu lo tin tres caya principal y otro cayanan interno cu un hanchura di 10 meter. E capitulo tocante caminda ta consisti di un solo frase. E tipo di planificacion di caminda aki mester haya goedkeuring di e departamento di KPA. Sinembargo, e fundacion ta enfatisa KPA a check 15 aña den nan historia pero no a haya ningun rastro di e proyecto di Burubundu.

Banda di entrega zienswijze, e fundacion a haya asistencia di parlamentario Eduard Pieters (PPA) pa entrega un peticion oficial pa un reunion cu comision di infrastructura. Segun nan ta conta, ta anticipa cu fin di augustus nan lo sinta cu e comision.

CONPA tambe a manda varios carta oficial na ministernan y a entrega un LOB (Landsverordening openbaarheid van bestuur) tocante e proyecto di Burubundu.

Mientras CONPA tabata preparando pa entrega nan zienswijze, e organisacion a organisa un anochi informativo pa localnan na Savaneta, unda e reaccion di comunidad tabata amplio, segun nan ta conta.

Accion den bario

Pa nan campaña di conscientisacion, tabata importante pa e fundacion acerca e localnan mes pa tende di nan banda. E fundacion a haci esfuerso pa bishita residentenan den bisindario puntrando si nan tabata consciente di proyecto y kico tur nan sa. Tambe a cuminsa informa den diferente medio di comunicacion, di e manera aki buscando pa amplia atencion riba e asunto. Y e organisacion no tin plan pa stop. Manera a afirma, tin plan pa tene un townhall meeting na MFA Savaneta fin di augustus. Fecha y orario lo ser duna mas despues.

CONPA ta expresa cu nan ta keda comprometi pa ta hopi activo den e situacion di Burubundu, pero tambe den diferente topico di importancia cu ta toca maneho di instancianan, ley y derecho di trahadornan. Conscientisacion y nan meta pa mehora cooperacion entre sindicatonan of diferente departamento ta bin prome. “CONPA ta representa e frente uni.”

Pa loke ta iniciativa di comunidad mes, e fundacion a expresa cu awe ta ultimo dia cu ciudadanonan por entrega nan mesun zienswijze. A enfatisa cu esaki no mester ta un rapport extensivo; e por ta tambe un mensahe of carta unda cada ciudadano por expresa nan opinion personal tocante e proyecto.

Alternativamente, ciudadanonan por bishita e website saveburubundu.com pa firma y keda informa tocante e situacion.