Ta dos aña caba cu mi ta traha cu inteligencia artificial practicamente tur dia. No como un curiosidad tecnologico, sino como instrumento di trabou: pa analisa, pa skirbi, pa siña, pa prepara workshop, pa traha documento di maneho y awo te hasta pa desaroya software simpel. Den e dos añanan aki mi a mira un progreso cu, sinceramente, ta laga mi keda keto.

E cambio aki no ta un cos abstracto cu ta pasa den un laboratorio na Silicon Valley. Ta un cos cu mi ta sinti den mi propio trabou, di siman pa siman. Pa ilustra esaki mi tin dos ehempel di mi mesun trabou.

Bijles pa examenklas di HAVO

September di aña pasa mi a haci un test simpel. Mi a duna e modelonan di AI di e momento ey pregunta di nivel HAVO 5 den temanan manera matematica, fisica, kimica y economia. E resultadonan aña pasa tabata hopi inconsistente. Hopi bes e modelonan di AI tabata haci fout obvio, of te hasta keda pega si ta papia di preguntanan di examenniveau.

Fast forward pa awo, Mi ta manda e AI e tarea di traha voorbeeld SO’s y Examentraining, y den algun minuut mi ta haya un voorbeeld toets completo, cu antwoordsleutel completo y mas importante 100% corecto/consistente.

Ban refleha riba esaki un rato asina, den solamente dies luna, AI a bay for di pega riba 1 pregunta di HAVO 5, pa por traha examens completo.

Traha apps dentro di 1 ora

E di dos ehempel ta toca mi mesun limitacionnan, y p’esey e ta mas honesto ainda. Mi no ta programador. Mi conocemento di codigo ta minimo. Mi ta comprende e logica di un programa, pero mi no por sinta y skirbi software full riba mes sin guia.

Un aña pasa, ora mi kier tabata purba di traha Web Applications (Apps), e proceso tabata largo y masha frustrante. Mi mester a skirbi prompts di un pagina henter, splica cada detaye chikito, y pa colmo mi tabata haya apps yena cu bugs y erornan. Hopi bes mi tabata gasta full un anochi, cu resultadonan cu no tabata nada di gaba.

E siman aki mi a traha un serie di Web Apps completo y completamente functional, esta den mi caso un grupo di 3 diferente “Brain Trainers”, applications pa tene mi mente skerpi, y porta te hasta hisa mi IQ un poco.

Pa visualisa, dentro di mas-o-menos 1 ora, cu prompts di un par di zin so, mi a traha Web Apps completamente funcional. Atrobe, e diferencia di e potencia di AI, ta cu esaki a tuma lugar den solamente 1 aña di tempo.

Pero e velocidad di AI no lo baha, e lo te hasta subi

Aki ta e parti cu, den mi opinion, ainda hopi hende no a comprende bon.

Nos tin tendencia di pensa den liña straight. Si algo a mehora asina tanto den un aña, nos ta imagina cu e proximo aña lo trece mas of menos e mesun cantidad di mehoransa. Pero e evidencia ta indica algo completamente otro: e velocidad mes ta subiendo, y esaki ta un diferencia grandi mes. E motibo ta simpel y na mes tempo hopi profundo. AI awor ta yuda traha AI. E modelonan ta skirbi un parti grandi di e codigo cu ta produci e proximo generacion.

Loke esey ta nifica ta cu si e ultimo dos aña a parce dramatico, e proximo dos aña por parce mas dramatico ainda. Y aki ta e problema real: nos leynan, nos sistema fiscal y nos maneho social ta move na un velocidad completamente otro.

Un yamada urgente na nos Gobierno

P’esey mi kier termina e columna aki no cu solamente entusiasmo, pero cu un peticion serio na nos Gobierno, nos Parlamento y nos institucionnan. Nos mester cuminsa investigacion di maneho awor. No aña cu ta bin. Awor. Y specificamente riba tres tema cu ta conecta cu otro: 1. Automatisacion masal. 2. Impuesto riba vermogen y riba AI. 3. Entrada Basico Universal (UBI).

Nos como sociedad no por afford, warda te ora cu e tsunami di AI dal. Cu cada luna cu ta pasa e urgencia di e yamada aki, no ta hisando linearmente, pero exponencialmente.