Despues cu Algemene Ziektekosten Verzekering (AZV) a publica un comunicado oficial reaccionando riba e conferencia di prensa cu ex-politico Ricardo Croes a tene dia 24 di juli tocante e tratamento medico di su yiu, kende ta enfrenta un forma agresivo di cancer, Bon Dia Aruba a tuma contacto cu Croes pa ricibi su reaccion riba e posicion di e institucion. Segun Croes, e comunicado di AZV no a contesta e puntonan principal cu el a presenta durante su conferencia di prensa y, den su opinion, a evita aborda e decisionnan concreto cu a afecta e tratamento di su yiu.

Entre e puntonan cu Croes a presenta durante su conferencia di prensa tabatin e retraso den e decision riba un peticion pa continua cu inmunoterapia na Bogota, e falta di coordinacion cu, segun e, a caracterisa e proceso y e criterio cu, na su opinion, Aruba ta aplica tocante e tipo di tratamento aki. Tambe el a expresa cu su critica tabata dirigi na e manera cu e sistema a funciona den su caso y cu su meta tabata comparti su experiencia pa otro famianan por conoce con e proceso a desaroya.

Poco despues di e conferencia di prensa, AZV a publica un comunicado oficial reaccionando riba e declaracionnan di Croes. Den e comunicado, e institucion a indica cu no por comenta den detaye riba un caso individual pa motibonan di privacidad medico. Sinembargo, AZV a confirma cu e caso a ser evalua y cu e decisionnan a ser tuma despues di evaluacion di e Comision di Oncologia di Aruba, e Commissie Grensoverschrijdende Zorg (CGZ) y un comision di oncologia na Colombia.

Ademas di responde den terminonan general riba e criticanan, AZV a dedica gran parti di su comunicado na splica con e procedemento pa cuido medico den exterior ta funciona. E institucion a aclaria cu un peticion pa tratamento den exterior mester cumpli cu diferente criterio estableci den ley y cu e evaluacion ta basa riba necesidad medico, disponibilidad di e tratamento na Aruba y e opinion di e diferente comisionnan competente.

Despues cu e comunicado oficial a ser publica, Bon Dia Aruba a tuma contacto cu Ricardo Croes, kende actualmente ta na Bogota cu su yiu, pa ricibi su reaccion riba e respuesta di AZV.

Croes a enfatisa cu e reaccion di AZV no a contesta e cuestionnan cu el a presenta durante su conferencia di prensa. “Loke mi por bisa tocante e reaccion di AZV ta cu e unico cos cu e reaccion a haci ta duna mi razon.”

Croes a agrega cu, den su opinion, splicacion di e procedemento cu AZV a publica ta mustra cu e institucion a dedica su atencion na splica con e sistema ta funciona, pero no riba e puntonan concreto cu el a trece dilanti. “Si lesa e procedura cu nan ta splica practicamente AZV no a contesta mi rueda di prensa. Nan no duna ningun splicacion riba e puntonan cu mi a trece dilanti.”

Croes a reconoce cu AZV a indica cu no por comenta riba un caso individual pa motibonan di privacidad, pero el a remarca cu e no ta comparti e posicion ey. Segun e, durante su conferencia di prensa el a bay den detaye tocante e procedemento y e cronologia di e caso sin viola ningun privacidad.

Un di e puntonan cu Croes ta bisa cu a keda sin respuesta ta e decision pa no autorisa e continuacion di inmunoterapia na Bogota. Segun e, AZV a argumenta cu Aruba tin oncologo y cu inmunoterapia tambe ta disponibel localmente. Sinembargo, Croes a cuestiona con e argumento aki ta cuadra cu loke a pasa den practica.

Segun Croes, su yiu originalmente a ser referi door di un specialista pa un oncologo na Colombia pa ricibi inmunoterapia. El a splica cu ora e hospital na Bogota a solicita autorisacion pa cubri e gastonan di e tratamento, AZV a comunica cu e peticion no tabata aproba, alegando cu Aruba tin oncologo y cu e tratamento tambe ta disponibel na e isla.

Pero segun Croes, te ainda su yiu no a ser referi pa ningun oncologo na Aruba.

El a relata cu despues cu nan a regresa Aruba dia 3 di juli, nan a presenta nan mes dia 6 di juli na poli di oncologia. Segun e, despues cu nan a ricibi un yamada telefonico e mesun dia, nan simplemente a ser referi bek na e specialista cu originalmente a manda su yiu Bogota.

Segun Croes, durante e encuentro cu e specialista nan a pidi pa e specialista bolbe haci un peticion na AZV pa continua cu e tratamento na Colombia. El a indica cu e plan prepara door di e oncologonan aya tabata contempla un periodo di aproximadamente seis siman entre e prome PET-scan y un di dos pa determina si e tumor tabata reaccionando positivamente riba inmunoterapia prome cu tuma un decision definitivo tocante un posible operacion. Segun e, esey tabata tur loke e famia tabata pidiendo.

Sin embargo, el a conta cu e specialista a informa nan cu si nan kier a regresa Colombia pa continua cu e tratamento, nan lo mester cubri tur e gastonan nan mes. El a bisa cu, for di e momento ey, e tratamento medico di su yiu den Aruba practicamente a caba.

Segun Croes, precisamente e secuencia di acontecimentonan aki ta un di e puntonan cu AZV no a aborda den su comunicado. El a cuestiona con ta posible cu, te na e momento aki, su yiu ainda no a ser referi pa un oncologo na Aruba.

Despues di evaluacion di e segundo peticion, nan a ser informa cu a surgi e decision pa referi su yiu pa un specialista KNO. El a splica cu e tipo di problema medico cu su yiu tin no por ser trata door di un KNO na Aruba. Ademas, el a indica cu Aruba no tin un PET-scan pa evalua e evolucion di e enfermedad, loke, segun su opinion, tabata precisamente un di e motibonan pakico su yiu originalmente a ser manda Colombia.

Croes a pone enfasis riba e tempo cu, segun e, AZV a tuma pa comunica e diferente decisionnan. El a indica cu AZV a cubri e prome traslado pa Bogota pasobra e caso tabata ser considera urgente, pero cu e mesun sentido di urgencia no a ser refleha den e tratamento despues.

Actualmente e famia ta na Bogota cubriendo cu nan propio recurso e gastonan di tratamento y estadia, mientras cu, segun e, Aruba no tin e facilidad di PET-scan cu e specialistanan ta considera necesario pa sigui e evolucion di e enfermedad.

Croes tambe a bolbe menciona e diferencia cu, segun e, ta existi den e aplicacion di inmunoterapia. El a relata cu durante e proceso nan a ser informa cu na Aruba inmunoterapia principalmente ta ser considera pa casonan den un fase paliativo, mientras cu e specialistanan na Colombia tabata proponiendo e tratamento como parti di un strategia pa evalua e respuesta di e tumor prome cu un posible operacion.

“E no tin sentido cu bo ta nenga un homber jong cu full un bida su dilanti di dun’e un inmunoterapia. Nan ta nenga di duna un hende cu por bringa, un homber jong cu tin tres yiu, bo ta neng’e inmunoterapia na Bogota pasobra bo tin’e na Aruba, pero bo no ta dun’e na Aruba te ora e ta muriendo. Un cos no ta cuadra cu e otro,” el a enaftisa.

Por ultimo, Croes a bolbe insisti cu, den su opinion, AZV no a contesta e contenido di su conferencia di prensa. “AZV no a contesta mi rueda di prensa”, el a subraya.

El a señala cu e comunicado oficial a concentra riba e procedemento general di AZV, pero no riba e preguntanan concreto cu, segun e, a surgi den e caso di su yiu.

Mientras tanto, AZV ta mantene e posicion cu e institucion no por comenta riba casonan individual pa motibonan di privacidad y cu decisionnan tocante tratamento den exterior ta ser tuma conforme cu e criterianan estableci den ley y despues di evaluacion door di e diferente comisionnan medico competente.