Siman pasa diaranson reportero Mericano conoci Greta van Susteren a publica un relato riba su website gretavansusteren.substack.com criticando e investigacion di Federal Bureau of Investigation (FBI) riba caso di Natalee Holloway cu a sacudi Aruba na 2005. E reportero ta argumenta cu e FBI su inaccion den un operacion riba sospechoso Joran van der Sloot a permitie cana liber cu 25.000 dollar dos siman prome cu e asesinato di Stephany Flores a sucede na Peru. Segun e reportero, FBI ta indirectamente culpabel pa e asesinato aki, ya cu nan investigacion por a resulta den detencion di van der Sloot.

Por a corda e caso aki cu a paralisa Aruba y a atrae un atencion negativo riba e isla. Mericano Natalee Holloway di Mountain Brook, Alabama—18 aña y recien gradua—a bay cu vakantie Aruba cu 124 otro graduado y shete acompañante dia 26 di mei 2005. Mainta trempan rond 1:30 riba 30 di mei—un dia prome cu e mester a bula bay back Merca—tabata e ultimo biaha cu Natalee su amiganan a mir’e despues cu el a sali di un bar na Oranjestad hunto cu un Joran van der Sloot y a bay den auto cu ne. Riba dia di biahe, e no a aparece na aeropuerto ni na e hotel, cual a pon’e su amiganan bati alarma. Autoridadnan a busca e hoben rond henter e isla, pero no por a hay’e. E caso aki a bira uno notorio, specialmente na Merca, y te dia di awe autoridadnan ainda no ta sigur unda Natalee Holloway ta ni kico exactamente a pasa riba e dia di su asesinato.

Den su blog, reportero y abogado van Susteren a lansa un critica fuerte contra e departamento investigatorio di Merca, argumentando cu e agencia a comete un gran eror pa no aresta Joran van der Sloot aunke nan operacion plania por a resulta facilmente den esaki. Despues, segun e ta conta, e agencia a pasa 16 aña ta purba sconde su fracaso. Despues di investiga e caso di Holloway pa casi dos decadas y añas ta purbando di haya documentonan oficial via peticionnan di Freedom of Information (FOIA), e reportero porfin a haya documentonan di FBI cu ta mustra erornan prevenibel.

Operacion cu por a resulta den van der Sloot su aresto

Van Susteren ta conta den su blog cu na 2010 el a haya e idea pa organisa un operacion cu FBI, mama di Natalee Holloway, Beth, y su abogado pa gara Joran van der Sloot den un crimen. Segun e ta splica, si por graba un sospechoso cometiendo un crimen riba nan mesun boluntad, esaki por persuadi un hurado pa condena e sospechoso, hasta si e ta origina for di un operacion plania. Esaki ta e tipo di operacionnan cu FBI ta haci pa desmantela sindicatonan di crimen organisa, e reportero ta splica. Den caso di van der Sloot, e no lo resulta den cargo pa e asesina, pero “hopi criminal notorio ta ser aresta cu e tipo di cargonan di RICO (crimen organisa) aki.”

E operacion tabata envolve un trampa den cual van der Sloot lo por ser aresta pa extorsion y fraude di transaccion di placa. Van Susteren a organisa e operacion hunto cu Beth Holloway y su abogado John Q. Kelly.

Den pasado, van der Sloot a purba riba varios ocasion pa haya placa pa duna informacion. Den un email na juli 2009, un reportero Hulandes a priminti Joran 100.000 euro si e haci un “declaracion corecto” tocante Natalee y unda e (of su curpa) ta.

Dia 30 di maart, Joran van der Sloot a propone na e abogado di Holloway cu e por hiba nan cerca Natalee si nan paga 25.000 dollar y no revela cu e informacion tocante e hoben desaparecido a bin for di dje. Como contesta, e abogado a sugeri pa topa cu e sospechoso pa haci e transaccion, puntrando pa “Duna mi un escenario, cu no ta envolve cooperacion for di otro personanan di bo banda cu ni ami ni abo tin control riba dje, y mi por hacie [e transaccion] posibel.”

Den su contesta, Joran a duna e abogado un lista cu demandanan prome cu topa nan. E abogado a acorda y asina e plania pa topa cu e sospechoso na un hotel na Aruba.

Dia 4 di april 2010, Kelly a topa cu van der Sloot. Pero ora Joran a ripara cu e abogado no a trece e 25.000 dollar p’e, e kier a bay. E sospechoso a insisti un contract firma pa ambos Kelly y Holloway mustrando cu nan ta comprometi na paga e suma na dje, e ora ey so e lo duna Natalee su paradero. El a cuminsa papia un tiki tocante unda Natalee ta, bisando solamente cu e ta dera den fundeshi di un cas. Cualkier otro informacion lo rekeri mas pago.

Mientras Kelly tabata redactando e contract y wardando firma di Holloway via fax, van der Sloot a disparce. Dia 16 di april el a aparece atrobe, interesa pa haya pago. Holloway a manda 100 dollar pa e cuenta Hulandes di Joran como un test. Segun e reportero ta conta den su blog, e transaccion aki ya lo por a conta como fraude.

Mas despues den luna, e partidonan atrobe a purba plania un encuentro, pa cual Kelly y Beth a tuma contacto cu FBI. Nan a acerca e agencia Mericano cu e plan contra van der Sloot y dia 10 di april un agente special di e oficina di FBI na Birmingham a reuni cu Beth pa prepara pa e operacion.

Despues di varios comunicacion cu Joran, a regla un encuentro pa dia 10 di mei na e mesun hotel unda van der Sloot a topa Kelly. FBI lo mester a instala camara den e camber y tambe instala un sistema di grabacion den Kelly su auto pa graba henter e operacion y e transferencia riba video.

Con FBI a faya

Aunke nan a logra graba van der Sloot su crimen y informacion cu e tabatin tocante e hoben desaparecido—incluyendo un admision cu el a mat’e—FBI a trata e operacion diferente cu loke e partidonan inicialmente a plania. Segun van Susteren ta splica, FBI a trata e operacion como “parecido un cumpramento controla di droga, cu excepcion cu Kelly lo ta cumprando informacion en bes di droga.”

Di e manera aki, FBI a descarta ley federal di fraude di transaccion y ley federal di extorsion. E reportero ta sigui conta cu e agencia investigatorio no tabatin un otro plan pa si Joran huy Aruba cu e placa cu no ta acus’e despues di fraude di transaccion. Tampoco nan a considera e operacion uno tradicional. E reportero a agrega cu e FBI no a investiga e comportamento di van der Sloot durante e ultimo cinco añanan, a pesar cu esaki tabata e caso mas grandi cu e oficina di Birmingham a mira desde ora di Derecho Civil durante añanan 60. Kisas mas pio cu tur, manera e reportero ta insinua, e agencia nunca tabatin intencion pa detene van der Sloot.

Segun van Susteren ta enfatisa, e operacion a fracasa pa via di FBI su inaccion y e mal comprondemento di ley di parti e departamento di Abogado Mericano. Na momento cu Beth Holloway a manda Joran e 100 dollar, tabata posibel pa arest’e pa fraude. Ora Joran a yega na e hotel dia 10 di mei y a tuma 10.000 dollar den cash el a comete extorsion. E 15.000 dollar manda despues lo a conta pa un otro cargo di fraude di transaccion.

E unico tarea cu e agente di FBI tabatin ta pa entrega keho via telefon na e oficina di Magistrado di Merca na Birmingham Alabama (cual ta dura 15 minuut, segun e reportero). Ademas e agencia por a manda un nota pa Interpol cu lo por a stroba Joran di drenta un otro pais, incluyendo Peru, unda dos siman despues di reuni cu Kelly, el a asesina Stephany Flores. Si FBI a sigui su tarea adecuadamente, Merca lo por a aresta Joran mesora y di a manera aki preveni e morto di Stephany Flores.

Potretnan ta bin di Greta van Susteren via su blog.