Aruba ta pasando den su temporada di mas calor. Hunto cu juni, augustus, september y tin biaha october, ta e lunanan cu tradicionalmente ta registra e temperaturanan promedio mas halto. Sinembargo, den e ultimo añanan e calor ta bira mas intenso y periodonan di temperatura halto ta dura mas largo cu anteriormente. Segun expertonan, esaki ta forma parti di un tendencia mundial cu ta relaciona cu cambio climatico y cu tambe ta afecta e region di Caribe.
Datonan di Departamento Meteorologico Aruba ta mustra cu e temperatura promedio anual di e isla a aumenta gradualmente durante e ultimo decadas Comparacion entre diferente periodo climatologico ta indica cu Aruba ta registra un aumento constante di temperatura promedio. Aunke e diferencia den cifranan no ta grandi, cientificonan ta splica cu un aumento relativamente chikito por causa cu periodonan di calor extremo ta bira mas frecuente y mas intenso. Ademas, tera, asfalt y edificio ta retene calor pa mas tempo, loke ta haci cu hasta durante anochi temperatura no semper ta baha suficientemente pa duna e curpa un oportunidad pa refresca.
E pronosticonan pa e temporada actual tambe ta apunta den e mesun direccion. Departamento Meteorologico Aruba ta indica cu tin un probabilidad halto cu e periodo entre juli y september lo registra temperaturanan riba e promedio normal. E condicionnan climatologico internacional, incluyendo e desaroyo di El Niño, ta contribui na e expectativa aki.
E aumento di temperatura no ta solamente un asunto di comodidad. Calor extremo por tin consecuencia serio pa salud. Ora curpa humano ta enfrenta temperaturanan hopi halto, e ta trata di baha su temperatura interno principalmente door di soda. Den e proceso aki e persona ta perde hopi awa y salonan mineral. Si e likidonan aki no ser reponi na tempo, deshidratacion por desaroya rapidamente.
Sintomanan inicial di deshidratacion por inclui sed intenso, dolor di cabes, cansancio, draaimento di cabes y falta di concentracion. Si un persona sigui expone su mes na calor sin refresca of hidratacion suficiente, e situacion por empeora y evoluciona pa agotamento door di calor of un golpi di calor. E ultimo ta ser considera un emergencia medico cu ta rekeri atencion inmediato.
No tur persona ta enfrenta e mesun nivel di riesgo. Muchanan chikito, hende grandi, hende muhe na estado y personanan cu enfermedadnan cronico manera diabetes, enfermedad di curason, problema respiratorio of enfermedad renal ta mas vulnerable. Tambe miles di persona cu diariamente ta traha pafo den sectornan di, entre otro, construccion, hardineria, polis, chauffeur y otro profesionalnan cu ta pasa varios ora den solo, mester tuma precaucion adicional durante e dianan mas cayente.
Expertonan ta recomenda pa bebe awa regularmente durante henter dia y no warda te ora cu un persona ta sinti sed. Tambe ta importante pa limita actividad fisico durante e oranan cu solo ta mas fuerte y, si ta necesario traha pafo, busca sombra, usa paña light y di colornan cla, sombre y sunblock. Medidanan relativamente simpel manera esakinan por reduci significativamente e riesgo di problema di salud relaciona cu calor.
Otro conseho importante ta pa presta atencion na hende cu por ta mas vulnerable. Adulto mayor cu ta biba nan so, por ehempel, no semper ta ripara cu nan ta deshidrata. Un bishita, un yamada of simplemente verifica con nan ta sinti durante un dia hopi cayente por haci un diferencia importante.
Calor extremo tambe ta afecta mascotanan. Animalnan no por comunica cu nan ta sufri di calor, pero nan tambe por enfrenta consecuencia serio si nan no haya suficiente proteccion.
Cacho por ehempel, no ta soda manera ser humano pa regula nan temperatura corporal. Nan principalmente ta refresca door di hala rosea. Durante periodonan di calor extremo, e sistema aki talbes no ta suficiente, loke ta aumenta e riesgo.
Pa e motibo ey, acceso constante na awa fresco ta fundamental. Awa mester ser cambia regularmente y e recipiente mester keda den sombra pa evita cu e awa ta bira demasiado cayente. Animalnan cu ta pasa gran parti di dia pafo tambe mester tin un lugar fresco y cu sombra unda nan por refugia durante e oranan mas calor.
Veterinarionan tambe ta adverti cu cana cu cacho durante oranan di merdia, ora solo ta na su punto mas halto, no ta recomendable. Asfalt y cement por yega na temperaturanan suficiente pa kima e pata di e animal. Ta miho y mas sigur pa cana cu e cacho mainta tempran of despues cu solo a baha.
Otro aspecto importante ta cu ningun mascota mester ser laga den un auto staciona, aunke ta pa solamente algun minuut. Temperatura den un vehiculo cera por subi rapidamente te nivel peligroso, hasta si bentananan ta parcialmente habri. E situacion aki por causa golpi di calor den poco tempo.
Doñonan di mascota tambe mester conoce e sintomanan di sobrecalentamento. Halamento di rosea excesivo, debilidad, falta di energia, babamento abundante, dificultad pa move, sacamento of desmayo ta algun di e señalnan cu un veterinario mester ser contacta inmediatamente.
Calor extremo no solamente ta afecta hende y animalnan. Tambe tin impacto riba consumo di electricidad, uso di awa, agricultura y actividadnan pafo. Durante e periodonan mas calor, uzo di airco normalmente ta aumenta considerablemente, loke ta pone mas presion riba consumo di energia. Mata y vegetacion tambe ta sufri mas rapidamente durante periodonan prolonga di calor y falta di awa.
Expertonan ta coincidi cu e tendencia di temperaturanan creciente probablemente lo continua den e siguiente decadanan. Pa Aruba, esaki ta nifica cu adaptacion lo bira cada bes mas importante. Tanto gobierno, empresa, como ciudadano por contribui na reduci e impacto door di tuma medidanan preventivo y crea un ambiente mas sigur pa comunidad.
Aunke calor di solo semper lo forma parti di identidad di Aruba, e realidad actual ta mustra cu calor extremo ta bira un reto cu no por ser ignora. Door di mantene e curpa bon hidrata, limita exposicion na solo durante e oranan mas fuerte, pone atencion na personanan vulnerable y cuida e mascotanan bon, por evita hopi problema di salud y pasa e temporada mas calor di aña di un manera mas sigur.
