Cu maleta yen di soño, studiantenan Arubiano a sali rumbo pa Hulanda pa continua cu nan estudio

Ayera tardi, un grupo grandi di hoben Arubiano a sali for di Aruba rumbo pa Hulanda, unda nan lo cuminsa un capitulo nobo den nan bida. Pa hopi di nan, e biahe ta marca e prome paso rumbo pa enseñansa superior y un futuro profesional cu nan a prepara p’e.

Na aeropuerto e ambiente tabata yena di emocion. Famia, amistad y sernan keri a bin dispidi di e studiantenan cu ta bay persigui nan meta academico. Memey di sonrisa, lagrima y abrasonan di despedida por a sinti e mescla di emocion cu ta marca un momento asina importante.

Bon Dia Aruba a combersa cu algun di e studiantenan prome cu nan subi avion y a puntra nan con nan tabata sinti, con nan a prepara pa e gran paso aki y kico nan lo bay studia na Hulanda.

Mayoria di nan a bisa cu nan tabata sinti emociona, nervioso y tristo na mesun momento. Segun nan, e emocion ta bay man den man cu e oportunidad pa cuminsa un aventura nobo y sigui nan estudio na un pais diferente y cu pa algun di nan ta un pais desconoci ya cu ta prome biaha cu nan ta bayendo Hulanda. E sentimento di nervio, sinembargo, ta normal pasobra nan ta bay biba pa nan mes, conoce un cultura diferente y adapta nan mes na un sistema di enseñansa nobo.

Na mesun momento, hopi a expresa cu ta dificil pa laga nan cas, famia y amistadnan atras. Pa mayoria di hoben, ta e prome biaha cu nan lo biba leu di Aruba pa un periodo largo. A pesar di e tristesa cu e despedida ta trece, nan a expresa cu nan ta determina pa traha duro pa logra nan meta.

Entre e studiantenan cu nos a entrevista tabatin un variedad di estudio. Algun lo sigui un carera den Ley, otro den Information Technology (IT), Security, Psicologia y otro direccionnan profesional cu tin hopi demanda den mercado laboral.

Contestando e pregunta con nan a prepara nan mes pa e biahe, varios a conta cu nan a cuminsa prepara nan mes mentalmente hopi luna caba. Nan a haci investigacion tocante e lugarnan unda nan lo bay biba y studia, mientras cu otronan a participa na anochinan informativo organisa pa Arubalening, unda nan a ricibi informacion tocante estudio, vivienda, finanzas y loke nan por spera ora yega na Hulanda.

Hopi di nan a conta tambe cu nan a probecha e ultimo simannan pa pasa mas tempo cu famia y amigonan prome cu nan salida.

Di parti di Bon Dia Aruba, nos ta desea tur e studiante hopi exito den e etapa nobo di nan bida. Cu nan logra completa nan estudio cu exito, cu nan alcansa tur nan meta y cu den futuro nan por usa nan conocemento pa contribui na Aruba.