E decision di Gobierno pa cera e caminda tras di Tierra del Sol a wordo tuma sin un estudio di impacto, sin consulta cu stakeholdernan y sin transparencia riba e rasonamento tras di e decision abrupto aki.
Esaki ta e forma cu Gobierno ta tumando decisionnan cu ta afecta e bida di miles di ciudadano directamente.
Segun e carta di Aruba Offroad Foundation, alrededor di mil persona ta wordo afecta. Pensa riba empresarionan chikito, guianan turistico, operadornan y nan famianan. Nos ta papiando di hende cu ta depende di esaki pa nan sustento diario.
Loke ta preocupante no ta solamente e decision riba su mes, pero e manera con el a wordo tuma. Un gobierno cu ta tuma decisionnan cu ta afecta e bida economico di su pueblo sin dialoga prome, sin studia e consecuencianan, y sin presenta un alternativa, no ta gobernando e ta imponiendo.
E Offroad Foundation mes a presenta un solucion: un ruta unico, controla y cu supervision adecua. Un propuesta cu ta proteha naturalesa sin destrui empleo di nos hendenan. Te cu awe, Gobierno no ta duna nan contesta.
E reunion cu Prome Minister Eman riba 10 di juli a pasa sin resultado. E silencio di Gobierno ta e contesta.
Ta con Gobierno por papia di sostenibilidad ora e ta mata e negoshi di su mesun hendenan?
