Nos por observa varios punto di critica riba gobernacion cu ta surgi actualmente. Un di nan ta inclui den e cuatro puntonan cu nos ex-ministro presidente a trece dilanti recientemente, pa cumpli cu regla bon conoci na tur gobernante. Nan no lo mester di e les publica anto, y di mes lo reacciona bisando cu den cualkier gobierno anterior nos por a observa e mesun fayonan aki. Esey ta conta den tur caso anto,pa e contrincante politico, pero pa e propio partido tambe…

Pero esey no ta kita tur merito di e publicacion; mihor ta publica e recomendacionnan aki, envez di trata di tapa cualkier hecho di menos bon gobernacion den pasado recien. En todo caso, como medio di comunicacion nos tin e tarea di critica cualkier hecho di mal gobernacion, di cualkier partido. Y aki simplemente mester aplica e expresion “Then was then, and now is now.” Ta tratando un cierto tema o asunto actual y no ta importa ta ken ta den gobierno, mucho menos kico a sucede den pasado. E hecho cu ta lanza critica for di oposicion awor no ta haci esey menos relevante, importante ta pa haya sa si e critica ta basa den berdad si of no. E unico manera anto pa duna un contesta contundente ta responde na e preguntanan haci. Mas tanto net esey no ta sucede, loke si ta haci hopi biaha ta mantene un silencio profundo, no pa berguenza pasobra a descubri e asunto, sino mas bien pa un actitud di “Nos no debe boso un splicacion”, lubidando cu no ta solamente e contrincante politico ta en espera di e splicacion.

Y di e manera aki nos ta keda pega den un secuencia eterno di mal gobernacion, a pesar cu cada gobierno ta cuminza bon, haciendo tur e declaracionnan obligatorio y yenando nan programa di gobernacion cu e frasenan consideraeticamente corecto. Y despues ta confronta comunidad cu e realidad politico. Ta duna prioridad na dividi comunidad entre esnan cerca di partido y gobierno, y e otronan cu lo mester warda nan turno pa nan partido bin na mando. E ciudadano cu no ta desea di pertenece ni na esun ni e otro, ta hiba un bataya di bida largo pa haya varios asunto cumpli, cu no tin nada di haci cu afiliacion politico. Esaki ta e modelo di actuacion politico cu tin nos comunidad venena desde cu nos conoce gobernacion propio. Pero, nos no ta mira ningun avance anto? A pesar cu nos ta critico na tur momento pa cualkier caso cu presenta, ta importante reconoce cu tin un mehoracion den trato di ciudadano y agilizacion di proceso administrativo na cierto departamento y servicionan gubernamental, pero e no ta algo generaliza ainda. Y mehoracion no ta bin nunca di sinta den rueda di prensa declarando bon intencion, sino di e trabao duro y dificil di tur dia, henter aña. Claro cu ningun politico, cu no solamente ta ‘talk the talk’ pero ta haci loke mester haci, no por logra esaki su so. E mester ta envolvi na un manera fuerte y eficaz cu e aparato cu e ta dirigi, pa dos motibo. Uno ta cu logra cambio positivo no ta algo cu ta tuma lugar di mes. Esaki tambe pa e di dos motibo: patronahe politicotin dos banda: e politico y esun cu ta busca y haya e fabor. Den cuarenta aña di gobernacion autonomota dificil pa bisa cu nos a avanza, aunke si por bisa cu, manera remarca anteriormente, tabatin un mehoracion den trato di e ciudadano individual. E problema cu a keda, sin embargo, ta e trato ora ta reparti privilegio mas compleho y costoso, por ehemplo den otorga un proyecto di varios miyon florin. Pa pone e asunto aki bon cla: si nos ta preocupa pa trato corecto y diligente na tur oficina gubernamental di tur ciudadano individual, ta spera di nos cu nos mester keda keto y mester ‘comprende’ e mensahe di “Nos no tin ningun deber di bisa boso nada”, ora ta trata di miyones di placa di pueblo?

Transparencia

E asunto actual, di falta di claridad den e proyecto entama pa nos institucion gubernamental encarga cu fomento di turismo, ta trece nos riba e tema di transparencia en general. Y aki nos ta critica tur gobierno, di pasado y e actual, pa ta tolera cu un cantidad di instancia (semi)gubernamental no ta cumpli cu publicacion di nan cuenta y/o relato anual. E institucion di turismo menciona mes ta un cu no tin cuenta anual riba nan website, manera Banco Central, AZV, SVB y algun mas tin desde hopi aña. Un simple pregunta na e mandatarionan responsable awe: te ki dia ta sigui cu un maneho di ‘transparencia’ cu ta conta pa esun pero no pa e otro? Ta e tipo di practica aki ta haci cu porehemplo nos por tuma nota di un boto desapareci, propiedad di Refineria di Aruba NV, sea ta berdad of no, pero ken ta na altura con e compania aki, cu ta propietario di e tereno di refineria, ta andando financieramente? Anto esey despues di descubri den pasado recien un monton di cos cu no tabata soporta luz di dia. Por ta cu aki tambe nos mester di un sentencia di Hoge Raad pa forza cierto transparencia, manera nos por observa na Departamento di Infrastructura y Planificacion, unda e website awe ta duna cuenta di cierto peticionnan pa tereno erfpacht? Nos mester warda riba un sentencia pa obliga gobierno, di cualkier color, practica transparencia di berdad, of ‘nos mes por’?