(AFP) – Noruega a anuncia diamars cu e tin plan pa regula uso di smart glasses y otro aparato similar mas estrictamente, y ta considera prohibi funcionnan cu ta permiti reconocemento facial den espacio publico.
Smart glasses ta permiti usuario saca potret y video, scucha musica, atende yamada, traduci señalnan den otro idioma, proyecta texto of mapa den campo di vision y interactua cu un asistente di inteligencia artificial integra.
“Nos ta mira cu bida priva y privacidad di hende ta cada bes mas bao presion pa motibo di tecnologia nobo, y p’esey mi kier regula smart glasses y aparatonan similar mas estrictamente cu awe,” Minister di Digitalisacion Karianne Tung a bisa den un declaracion.
“Esaki por, por ehempel, nifica prohibi funcionnan manera reconocemento facial di otro hende den espacio publico,” el a agrega.
Tung a bisa cu e tin plan pa nombra un grupo di experto pa conseha Gobierno tocante con por proteha consumidor miho contra e tecnologianan nobo aki, y a pidi tanto sector publico como priva pa considera crea nan propio reglamentonan.
“Tin un tendencia cla cu inteligencia artificial ta ser combina cu camara y microfon integra den cosnan manera bril, earbud, pechi y otro articulo cu nos ta usa den bida diario. Nos mester evita cu e aparatonan aki ta ser usa pa monitorea otro hende den espacio publico,” Tung a bisa.
Hefe di politica digital di Norwegian Consumer Council, Finn Lutzow-Holm Myrstad, a elogia e paso di Gobierno y a pidi comerciantenan pa para benta di smart glasses te ora tin mas claridad legal tocante nan uso.
Segun reportahenan, Meta ya a desaroya un funcion di reconocemento facial cu ta cla pa integra den su smart glasses. “Meta ya tin e tecnologia aki cla, y ta solamente un cuestion di tempo prome cu nan lans’e den e brilnan,” Myrstad a bisa.
Sinembargo, el a adverti cu hasta si reconocemento facial keda prohibi, esaki no lo evita cu usuario por filma otro hende secretamente.
“E potencial pa abuso ta enorme,” el a bisa.
