Lider di fraccion di PPA den Parlamento, Eduard Pieters, a tene un conferencia di prensa ayera tardi durante cual el a critica cu un peticion cu el a presenta dia 29 di juli 2025 pa tene un vragenuur cu minister di Asuntonan Economico, Geoffrey Wever tocante situacion di Free Zone Aruba no a conduci na un reunion pa e minister duna cuenta den Parlamento, mas cu un aña despues. Pieters a bolbe trece e asunto dilanti den conexion cu ciere di e aña parlamentario, señalando cu Parlamento tin como un di su tareanan principal controla gobierno y exigi responsabilisacion di minister.

Pieters a presenta copia di e peticion cu PPA a manda dia 29 di juli 2025 como base pa su critica. Segun e lider di fraccion, e peticion tabata pa yama un vragenuur cu minister Geoffrey Wever, kende ta carga responsabilidad pa Economia y actualmente tambe pa Finanzas, pa duna splicacion tocante Free Zone Aruba.

E peticion tabata relaciona, entre otro, cu un doorlichtingsrapport prepara pa PricewaterhouseCoopers (PwC) tocante Free Zone Aruba. Segun Pieters, contenido di e rapport a lanta preocupacion serio pa e fraccion di PPA tocante maneho, situacion financiero y gobernacion di e entidad.

PPA ta sostene cu varios di e problemanan identifica no a cuminsa recientemente. Pieters a indica cu desde cu Wever a asumi e cartera di Economia na 2021, e minister tabata den posicion pa conoce e situacion financiero y administrativo di Free Zone Aruba y, segun PPA, mester a actua mas trempan.

Entre e puntonan cu Pieters a menciona tin perdida financiero y problema relaciona cu pago di prima di pensioen pa personal. Tambe el a cuestiona e rol di e director anterior di Free Zone Aruba y e manera cu e organisacion a ser dirigi durante un periodo largo.

Segun PPA, e rapport di PwC a señala problema cu desaroyo di Free Zone, inversion y gobernacion. Pieters ta considera cu e situacion mester a resulta den un debate parlamentario caminda minister Wever por a splica ki accion gobierno a tuma, pakico cierto decisionnan a ser tuma y con gobierno a maneha e señalnan cu tabata presente.

Pieters a contrasta e situacion anterior cu desaroyonan den ultimo añanan bao di otro direccion. Segun e, actualmente Free Zone ta mustra un miho resultado financiero y mas atencion pa bon gobernacion. Sinembargo, pa PPA esaki no ta elimina e necesidad pa haya claridad tocante loke a pasa anteriormente y e responsabilidad politico pa e periodo concerni.

E punto central den critica di PPA, sinembargo, no ta solamente contenido di e caso di Free Zone. Pieters ta cuestiona principalmente cu un instrumento parlamentario solicita desde juli 2025 no a conduci na e debate solicita prome cu e aña parlamentario a yega na su fin.

Segun Pieters, despues di mas cu un aña PPA ainda no a haya e oportunidad pa confronta minister Wever den e vragenuur solicita. E fraccion a manda un rappel pa bolbe hala atencion riba e peticion y ta cuestiona con Parlamento por cumpli cu su funcion di controla gobierno si un peticion asina por keda pendiente pa mas cu un aña.

PPA ta basa su posicion riba e principio cu minister mester responsabilisa su mes pa su maneho y decisionnan dilanti di Parlamento. For di e punto di bista di Pieters, si un peticion parlamentario pa un minister duna cuenta por keda pendiente pa mas cu un aña, e pregunta ta surgi te unda Parlamento por ehecuta efectivamente su funcion di supervision riba gobierno.

Falta di contesta di gobierno na Parlamento no ta algo inusual. E critica ta haya un contexto mas amplio den cifranan di Relato Parlamentario. Segun e estadisticanan, durante e periodo concerni tabatin 29 peticion por escrito pa reunion publico, di cual 11 a ser convoca. Esaki ta nifica cu 18, of 62%, no a resulta den un reunion convoca.

Pa reunion solicita pa fraccionnan, Relato Parlamentario ta registra 14 peticion, di cual ocho a ser convoca. Ademas, gobierno y stakeholders a solicita cuater reunion, di cual dos a ser convoca.

E categoria cu ta directamente relaciona cu critica di PPA ta vragenuur. Relato Parlamentario ta indica cu ocho vragenuur a ser solicita por escrito durante e periodo registra, pero solamente dos a ser convoca. Esey ta laga seis peticion cu no a resulta den un vragenuur convoca.

E cifranan di pregunta por escrito ta mustra un diferencia ainda mas grandi entre cantidad di pregunta manda pa gobierno y e cantidad cu a ser contesta. Parlamentarionan a presenta un total di 4.595 pregunta por escrito, mientras gobierno a contesta 1.979. Segun e calculacion 2.616 pregunta, of 57% di e total di pregunta a keda sin contesta.

E datonan no ta indica cuanto tempo cada pregunta tabata pendiente, ni ta splica e motibo pakico cada reunion of vragenuur no a ser convoca. Tampoco nan no ta establece responsabilidad di un minister specifico pa cada caso. Sinembargo, nan ta mustra cu un parti considerabel di e peticion y preguntanan registra durante e aña parlamentario no a resulta den un reunion convoca of un contesta di gobierno.

E tema di responsabilisacion parlamentario a bin dilanti tambe durante ciere di aña parlamentario. Den su discurso, lider di fraccion di MEP, Evelyn Wever-Croes, a pone atencion riba e manera cu Parlamento ta ehecuta su funcion di control y con gobierno ta responde na e trabao parlamentario.

Wever-Croes a critica e cantidad di pregunta parlamentario cu, segun e cifranan presenta, no a ser contesta. Su posicion tabata cu Parlamento no por cumpli completamente cu su funcion di controla gobierno si preguntanan no ta haya reaccion y si mocionnan adopta no ta ser traduci den accion.

Den su discurso, Wever-Croes a menciona varios tereno caminda, segun e, falta di reaccion y accion di gobierno ta preocupante, incluyendo naturalesa, educacion, salud, turismo y infrastructura. El a señala cu e situacion tambe ta toca e manera con gobierno ta trata Parlamento y ta duna siguimento na pregunta y otro iniciativanan parlamentario.

Tanto fraccion di PPA y MEP ta pone atencion riba e mesun pregunta institucional: con Parlamento por ehecuta su funcion di control si peticion y preguntanan parlamentario no ta ser trata of contesta dentro di un periodo rasonabel.

Pa PPA, e situacion rond di Free Zone ta ilustra e preocupacion cu Pieters ta expresa tocante funcionamento di control di Parlamento riba gobierno. E fraccion tabata busca oportunidad pa cuestiona minister Wever directamente riba e hallazgonan den e doorlichtingsrapport y riba maneho di Free Zone durante e periodo concerni, pero e vragenuur solicita no a tuma lugar durante e aña parlamentario.

E cifranan di Relato Parlamentario ta coloca e caso den un contexto mas amplio. Seis di ocho vragenuur solicita por escrito no a ser convoca, mientras 2.616 di 4.595 pregunta por escrito presenta pa parlamentarionan, ekivalente na 57%, a keda sin contesta. Aunke e datonan no ta splica circunstancianan di cada caso individual, nan ta mustra e cantidad di solicitud y pregunta cu no a haya contesta durante e periodo registra.

Awor cu Parlamento ta drenta un aña parlamentario nobo, e peticion tocante Free Zone Aruba ta sigui pendiente. Pa Pieters, e asunto a pasa di ta solamente un discusion tocante maneho di Free Zone pa bira tambe un cuestion tocante e espacio cu Parlamento tin pa ehecuta su funcion di supervision y pidi gobierno duna cuenta di su maneho.