Dia 7 di september Aruba a haya e noticia tristo cu Sra. Faustina Frank a fayece. Frank tabata kisas miho conoci pa ta e prome minister femenino pa Antias Hulandes. El a nace y crece durante un epoca unda hende muher no tabatin mucho derecho y asina mes a desafia expectativanan di sociedad y a laga un legado atras cu lo keda inspira generacionnan di hende muher Arubiano.

Naci na Noord na 1940, Sra. Frank a crece cu balornan Catolico y desde su infancia a siña con importante e ta pa keda resiliente y pa ta den servicio di hende. Ora el a yega na edad pa studia afo, el a sigui su educacion na Hulanda y despues a cuminsa su carera den sector di educacion na Aruba. Despues di varios aña como maestra dedica, el a bira inspector di scol y a sigui subi den rango di e sistema di enseñanza aki na Aruba. Segun publicacionnan tocante ex-educador aki, e tabata un pionero cu semper a boga pa muchanan mira nan mesun cultura refleha den materia di scol.

Pero su logro mas notabel kisas tabata ora el a bira e prome minister femenino pa Antias Hulandes, representante Partido Patriotico di Aruba (PPA), cual den su tempo como minister tabata e partido mas grandi di Aruba. Desde 1976 pa 1979, Sra. Frank a sirbi como minister di Enseñanza y a lucha pa profesionalisa trabao di maestronan por medio di conecta politicanan mas cerca cu necesidadnan di ciudadanonan.

Cu su plataforma tambe el a bringa pa derecho di hende muher cu varios campaña promoviendo e voz femenino den sociedad. Segun reportahe den otro medio di comunicacion, Frank a hasta campaña cu jack hammer banda di caminda, asina mustrando cu hende muher tambe por haci e trabaonan cu tradicionalmente tabata considera como algo pa hende homber so.

Frank tabata un di e voznan mas grandi pa derecho di hende muher riba e isla, y su carera como un figura riba rango halto den gobernacion a mustra cu hende muher tambe por. Awendia por mira cu hende muher tin mas derecho y ta traha den sectornan cu prome tabata manteni pa hende homber. Y esaki tabata danki na defensor y figuranan remarcabel manera Faustina Frank.

Su legado sigur lo ser recorda pa futuro generacionnan di hende muher, ademas di pueblo henter.

Bon Dia Aruba ta extende palabranan di condolencia na famia, (ex)coleganan, amigonan y sernan keri di Sra. Frank. Cu e descansa na paz.