Gobierno di Aruba y representantenan di diferente compania di tour a firma un protocol pa formalisa continuacion di dialogo tocante futuro di actividadnan cu UTV y ATV y uzo di rutanan den areanan natural di Aruba. E paso ta sigui despues cu Corte a pospone pa cinco siman e caso entama pa Aruba Birdlife Conservation (ABC) contra Gobierno di Aruba y Aruba Conservation Foundation (ACF), creando espacio pa partidonan busca un solucion cu ta tene cuenta cu tanto proteccion di naturalesa como interesnan relaciona cu turismo y actividad economico.

E protocol ta resultado di varios encuentro cu a tuma lugar durante ultimo dianan entre gobierno y representantenan di sector di tour. Minister Rene Herdé, minister Wendrick Cicilia y prome minister Mike Eman a reuni cu operadornan pa intercambia informacion y scucha nan preocupacion tocante ceramento di ruta y futuro di excursionnan off-road.

Durante un conferencia di prensa prome minister Eman a splica cu e proceso actual ta representa un oportunidad pa establece un dialogo mas structural cu e sector aki cu pa hopi aña, segun el a indica 20 aña, a busca participacion den decisionnan cu ta afecta su operacion. E intencion ta pa no limita e deliberacion solamente na gobierno y tour operators, sino inclui ABC y otro organisacion cu tin como responsabilidad of meta proteccion di naturalesa.

E anuncio di e protocol aki ta bin despues di varios siman di tension rond di acceso na costa noord di Aruba. Na comienso di september, diferente compania di tour a expresa publicamente nan preocupacion tocante ponemento di baranca y ceramento di camindanan cu tradicionalmente ta forma parti di ruta di off-road. Nan a argumenta cu e medidanan ey ta afecta directamente nan operacion y a pidi mas consulta prome cu implementacion di cambio cu por tin consecuencia pa e sector.

E situacion actual tin su origen den un discusion cu ta andando pa hopi tempo tocante impacto di vehiculo motorisa recreacional den areanan natural. Na mei di 2026, ABC a cuminsa un caso contra Gobierno di Aruba y ACF, argumentando cu proteccion di naturalesa no ta ser aplica suficientemente y cu actividad cu ATV y UTV ta causa daño na diferente zona natural vulnerable. Entre e preocupacionnan menciona den e caso tin erosion, daño na vegetacion, stof, zonido y disturbio di habitat di fauna.

Un elemento central den e discusion ta Ruimtelijk Ontwikkelingsplan met Voorschriften, ROPV, cu a bira oficial na 2021. E plan ta establece regla pa uzo di tereno y pa actividad den diferente area. Den areanan cu tin designacion relaciona cu naturalesa y paisahe, uzo recreacional di vehiculo motorisa ta conecta na camindanan cu mester ser designa pa esaki.

Sinembargo, implementacion practico di e sistema di ruta a keda un punto pendiente pa varios aña. Gobierno a papia anteriormente tocante regulacion di actividad off-road y ruta alternativo, pero te recientemente no tabatin un sistema completo di ruta oficialmente designa y marca pa e actividad. Esaki a contribui na e situacion actual, caminda di un banda tin regla ambiental vigente y di otro banda tin un industria cu pa hopi aña a desaroya su operacion uzando diferente ruta den e area.

E conflicto a bira mas visible ora gobierno a cuminsa blokea acceso na seccionnan di costa norte, incluyendo e ruta den area patras di California Lighthouse. E medidanan a genera reaccion tanto entre operadornan di tour como entre residentenan, mientras organisacionnan ambiental a sigui enfatisa necesidad pa proteha zonanan vulnerable.

Durante ultimo siman, e tension a bolbe aumenta. Representantenan di tour operators a organisa varios accion di protesta y a presenta hunto pa pidi gobierno mas claridad y participacion. Nan a enfatisa cu nan no ta contra proteccion di naturalesa, pero ta considera cu regulacion mester ser desaroya den consulta cu e sector y cu mester tin alternativa practico pa companianan cu ta depende di e rutanan aki.

Durante e conferencia di prensa representantenan di e sector a trece dilanti tambe cu ceramento di un ruta por tin consecuencia pa otro area. Segun nan, companianan no ta uza exactamente e mesun camindanan durante nan tour, loke ta distribui e cantidad di vehiculo riba diferente ruta. Ora acceso na algun caminda ser cera, mas operador por ser obliga pa concentra nan excursion riba e mesun ruta alternativo.

P’esey, segun nan, un di e topiconan cu mester forma parti di e dialogo ta con pa distribui trafico di UTV y ATV di un manera controla, mientras zonanan vulnerable ta keda protegi.

E preocupacionnan a conduci na un reunion cu prome minister Eman, despues cu representantenan di tour guides a solicita gobierno intervencion pa crea mas espacio pa dialogo. Durante e encuentro, nan a pidi pa gobierno pidi Corte mas tempo prome cu continua cu e caso legal, pa asina e diferente partidonan por sinta na mesa.

Corte a acepta pa pospone e caso pa cinco siman. E periodo aki ta crea espacio pa gobierno, tour operators, ABC y eventualmente otro organisacionnan concerni busca posibilidad pa sinta na mesa y dialoga.

Como siguiente paso, gobierno y representantenan di tour operators a firma e protocol cu ta confirma nan compromiso pa continua e deliberacion. Entre e companianan relaciona cu e iniciativa tin ABC Tours Aruba, Fofoti Tour & Transfer, De Palm Tours, Rockabeach Tours, AGW Tours y Aruba Ariba Tours, mientras otro operadornan tambe ta sostene e proceso.

E protocol no ta establece ainda cual ruta lo keda habri of cera, ni ta determina e regulacion definitivo pa actividad cu UTV y ATV. Su funcion principal ta pa crea un base pa dialogo y determina con e partidonan lo contribui cu informacion, propuesta y preocupacion durante e proceso.

Gobierno a invita otro tour operator cu ainda no ta forma parti di e iniciativa pa conecta na e deliberacionnan. Na mesun momento, gobierno ta considera participacion di organisacionnan ambiental esencial pa por evalua e proposicionnan for di perspectiva di conservacion.

Representantenan di tour operators a indica cu nan ta mira e momento manera un oportunidad importante despues di añanan di discusion tocante regulacion di e sector. Nan ta considera cu nan presencia na mesa ta permiti pa experiencia practico di operadornan ser combina cu conocemento di experto ambiental y responsabilidad di gobierno.

E sector ta enfatisa cu e discusion no mester ser presenta manera un escogencia entre turismo y naturalesa. Nan a subraya cu naturalesa ta juist e fundeshi di gran parti di e producto cu nan ta ofrece. Paisahe di costa noord y otro area natural ta un elemento importante den e experiencia cu bishitantenan ta busca durante excursionnan off-road, y p’esey conservacion di e areanan aki tambe ta importante pa continuidad di e sector.

Un posibilidad cu tour operators kier trece den e dialogo ta mas educacion pa tour guides. Esaki por inclui programa pa tour guides existente y nobo cu mas informacion tocante flora, fauna, area vulnerable y manera responsabel di uza rutanan. E sector ta considera cu educacion, ruta cla y aplicacion consistente di regla por forma parti di un sistema mas sostenibel.

Otro punto cu ta bay forma parti di e siguiente fase ta acceso na ruta cu a ser cera cu baranca. Segun e representantenan di tour operators a splica, algun ruta por bolbe ser uza. Sinembargo, e reapertura no ta nifica cu ya tin un acuerdo definitivo tocante uzo futuro di e area.

Tour guides a ser informa cu, mientras dialogo ta andando, uzo di e rutanan mester tuma lugar conscientemente. Condicionnan definitivo, incluyendo cua ruta por ser uza, con trafico lo ser regula y cua area mester keda protegi, ainda ta topico pa deliberacion.

E sector a presenta diferente idea na gobierno, pero ta reconoce cu evaluacion ambiental mester bin di persona y organisacionnan cu tin conocemento specialisa den naturalesa. E intencion ta pa e siguiente mesa di dialogo duna espacio pa proposicionnan ser evalua y determina kico ta factibel y unda ta necesario pa establece limite.

E cinco simannan cu Corte a duna ta pone un periodo concreto pa e proceso aki. Den e tempo ey, partidonan lo mester determina si tin suficiente espacio pa yega na acuerdo riba por lo menos algun di e puntonan cu durante ultimo lunanan a genera conflicto.

Pa awor, firmamento di e protocol no ta pone fin na e disputa tocante UTV, ATV y acceso na costa noord. E ta marca, sinembargo, un cambio den e proceso: di un situacion caracteriza pa ceramento di ruta, preocupacion di sector y un disputa legal, pa un intento pa reuni gobierno, operador y organisacionnan ambiental na mesa.

E reto durante e siguiente simannan lo ta pa traduci e dialogo den acuerdo concreto cu por ser implementa den practica. E resultado lo mester determina con Aruba por proteha su areanan natural y, na mesun momento, establece regla cla pa un sector turistico cu pa hopi aña a opera den e mesun teritorio cu awor ta centro di e discusion.