Gerecht in Ambtenarenzaken a determina cu e castigo di retiro disciplinario imponi na un ambtenaar di Directie Volksgezondheid cu a cambia informacion riba su payslip tabata demasiado severo. E ambtenaar a presenta e caso contra Gobernador di Aruba, cu ta figura como parti demanda den e procedemento. Corte a considera e accion manera un falta disciplinario serio, pero a conclui cu retiro inmediato no tabata proporcional na e circunstancianan. E Landsbesluit di retiro a ser anula y autoridad por tuma un decision nobo tocante un castigo disciplinario.
E sentencia a ser dicta dia 31 di augustus 2026 door di Gerecht in Ambtenarenzaken di Aruba. E ambtenaar a presenta tanto un obhecion contra su retiro como tambe un peticion pa un medida provisional. Den e procedemento, Gobernador di Aruba ta figura formalmente como parti demanda y a ser representa door di abogadonan di Departamento Wetgeving en Juridische Zaken (DWJZ) y Departamento Recurso Humano (DRH).
E ambtenaar ta traha desde 1 di augustus 2017 como empleado administrativo di asunto financiero na Directie Volksgezondheid. Den 2024 caba el a ricibi un advertencia disciplinario por escrito pa expresionnan considera inapropia riba rednan social.
E caso actual a cuminsa na october 2025, ora e ambtenaar a purba di haya un prestamo di Afl. 2.500 cerca Island Finance pa drecha su auto. Como parti di e solicitud, el a entrega payslip di su salario di september y october 2025.
Island Finance a verifica e informacion cerca DRH. E control a mustra cu e payslip di september cu e ambtenaar a entrega no tabata cuadra cu e original den administracion salarial. E suma neto riba e slip original tabata Afl. 2.628,88, mientras cu riba esun cu el a entrega na Island Finance el a ser cambia pa Afl. 3.515,79. Ademas, e liña cu tabata indica un embargo riba salario, hunto cu e sumanan relaciona cu esaki, a ser kita.
Durante investigacion, a nenga acceso e ambtenaar acceso na su lugar di trabao y el a ser suspendi mientras autoridad tabata determina cua medida disciplinario lo ser aplica. Dia 5 di juni 2026, director di DRH a haci denuncia relaciona cu posible falsificacion di documento y intento di engaño.
Mediante Landsbesluit di 7 di juli 2026, e ambtenaar a ser castiga cu retiro disciplinario cu efecto inmediato. Segun e posicion presenta door di e abogadonan di Gobernador, cambia y uza un payslip oficial ta un violacion serio di integridad y confiabilidad cu ta ser spera di un ambtenaar publico.
Tambe a ser señala cu e ambtenaar ya tabatin un castigo disciplinario anterior, cu e accion tabata relaciona cu beneficio personal y cu tabatin preocupacion tocante posibilidad di ripiticion. Basa riba e circunstancianan aki, retiro a ser considera manera un castigo apropia.
E ambtenaar no a nenga cu e mes a adapta e slip. Sinembargo, el a splica cu e documento di september 2025 no tabata refleha, segun su opinion, un imagen realistico di su ingreso neto. Riba e salario ainda tabatin un deduccion di Afl. 888,91 relaciona cu un embargo.
Pero segun e ambtenaar, e prestamo cu tabata na base di e embargo ya a ser paga na augustus. E acreedor despues a debolbe e suma cu a ser kita di su salario. El a pidi administracion salarial pa coregi e payslip di september, pero esaki no a ser haci. P’esey, segun su splicacion, el a adapta e documento pa mustra su ingreso sin e deduccion relaciona cu e embargo.
Abogadonan di Gobernador a enfatisa cu un payslip ta un documento oficial y cu un ambtenaar no tin autoridad pa cambia esaki riba su propio iniciativa y despues uza e version modifica manera si tabata esun original. Particularmente pa un empleado cu ta traha cu asunto financiero, e conducta a ser considera un falta disciplinario serio.
Otro punto cu Corte mester a resolve tabata si e ambtenaar a presenta su obhecion na tempo. E partido demanda a argumenta cu esaki no a ser haci, of cu e obhecion a yega demasiado laat.
Corte no a acepta e argumento. E ambtenaar a ricibi e Landsbesluit dia 10 di juli y tres dia despues el a presenta un peticion pa un medida provisional. Aunke e documento a ser presenta bao di e titulo di un peticion provisional, e contenido di tambe tabata indica cu e ambtenaar a presenta un obhecion contra e Landsbesluit y a pidi anulacion di e decision. P’esey, Corte a considera e documento manera un obhecion formal tambe.
Riba contenido di e caso, Corte a determina cu e ambtenaar si a comete un falta disciplinario. Segun hues, e payslip di september 2025 tabata corecto na momento cu el a ser emiti. E embargo ainda tabata formalmente vigente y, consecuentemente, administracion salarial mester a haci e deduccion.
E hecho cu e prestamo relaciona cu e embargo ya tabata paga no tabata duna e ambtenaar derecho pa cambia e documento personalmente. Segun Corte, e por a entrega e payslip original na Island Finance y splica cu e prestamo ya tabata paga y cu e suma deduci despues a ser debolbi.
Corte a considera cambio di e payslip y uzo di e documento modifica pa solicita un prestamo manera un falta disciplinario serio. E conducta ta toca integridad, confiabilidad y credibilidad di administracion publico. Como empleado administrativo den asunto financiero, e ambtenaar mester sa cu no ta permiti pa modifica documento financiero cu despues ta ser entrega na tercero.
Sinembargo, pa Corte e gravedad di e falta no tabata suficiente pa hustifica retiro inmediato den e circunstancianan specifico di e caso.
Corte a tene cuenta cu e embargo a sigui aparece riba e payslip di september, aunke e obligacion relaciona cu ne ya a ser paga. E acreedor despues a debolbe e sumanan cu a ser cobra via embargo na augustus y september. E ambtenaar tabatin necesidad di e prestamo pa paga reparacion di su auto y tabatin miedo cu e embargo riba e slip lo impedi su solicitud.
Segun evaluacion di Corte, e ambtenaar a purba di drecha e situacion di un manera cu no tabata permiti. Sinembargo, su intencion no tabata pa presenta Island Finance un ingreso diferente di loke e realmente lo a ricibi sin e deduccion cuestiona. Corte a observa cu si e acreedor no a laga e embargo sigui, e payslip lo a mustra e suma cu e ambtenaar a purba di refleha den e payslip modifica.
Esaki no ta kita gravedad di falsifica un documento, pero si ta importante pa determina ki tipo di castigo ta proporcional.
Corte tampoco a considera e advertencia disciplinario anterior manera un circunstancia cu mester haci e castigo actual mas grave. E incidente anterior tabata relaciona cu un otro tipo di conducta, no tabata un falta disciplinario serio y a ser castiga relativamente leve.
Corte tampoco a mira suficiente indicacion di un riesgo di ripiticion. E hecho cu e ambtenaar ainda tabata sostene cu su manera di actua no tabata robes no ta suficiente pa conclui cu e lo bolbe comete un falta similar.
Como alternativa, Corte a menciona e posibilidad di un retiro condicional cu un periodo di prueba di dos aña. Segun hues, un medida asina por ta suficientemente serio pa evita cu e ambtenaar lo por comete un falta similar of otro falta disciplinario serio den futuro.
Mirando tur e circunstancianan hunto y e consecuencia grandi cu un retiro definitivo tin pa e ambtenaar, Corte a conclui cu e retiro disciplinario incondicional tabata desproporcional.
Corte si a señala cu e conducta di e ambtenaar, combina cu e incidente anterior, ta un punto cu merece atencion tanto di e ambtenaar como di su superiornan. E periodo di prueba por inclui condicionnan special pa haci e ambtenaar mas consciente di e conducta cu ta ser spera di dje como empleado publico.
Finalmente, Corte a declara e obhecion di e ambtenaar funda y e Landsbesluit di 7 di juli 2026 cu a impone su retiro disciplinario a ser anula. Esaki no ta nifica cu e ambtenaar no por ricibi un castigo. Autoridad por tuma un decision nobo tocante un medida disciplinario, teniendo cuenta cu e consideracionnan di Corte.
Como e Landsbesluit a ser anula, ya no tabatin base pa dicta un medida provisional y e peticion pa esaki a ser rechasa. Gobernador tambe a ser ordena pa paga Afl. 1.400 na gastonan di procedemento.
Tanto e ambtenaar como Gobernador di Aruba, como partidonan den e procedemento, por presenta apelacion contra e sentencia cerca Raad van Beroep in Ambtenarenzaken. E termino pa apelacion ta, dependiendo di e circunstancianan di notificacion, 30 dia. Contra e decision tocante e peticion pa un medida provisional no por presenta apelacion.
