(AFP)—Ed Sheeran ta enfrenta yamadonan di boycott y pa hendenan ta bandona su tour, lagando e cantante Britanico den un crisis di carera cu ta mustra con hasta e streanan mas grandi di mundo ta ser hala den politica di guera na Gaza.
Prome cu su siguiente concierto planea pa diasabra, e icono pop di “Shape of You” a pasa den un siman purbando si salba su Loop Tour y su imagen publico mientras critica tabata yega for di colega y usuarionan di red social.
Problemanan di e cantante di 35 aña a cuminsa cu su amigo rapper Macklemore, ken a papia na fabor di derechonan Palestino y “Palestina liber” mientras e tabata riba escenario prome cu Sheeran durante conciertonan na MetLife Stadium na New Jersey dia 4 y 5 di september.
Ora Macklemore a keda kita for di e siguiente conciertonan—bou di presion di doñonan di stadion na Merca, incluyendo biyonario Robert Kraft—Sheeran a haya hopi critica.
Criticonan a acus’e di diferente cos: di no defende un amigo y libertad di expresion, di no tin curashi pa papia tocante Gaza, y di pone placa prome cu principio.
“Artistanan no mester keda keto ora nan ta papia na fabor di hendenan oprimi,” cantante Finneas, ruman homber di Billie Eilish, a skirbi riba red social mientras e y tres otro artista cu tabata programa pa presenta prome cu Sheeran a retira di e tour diamars.
“Si mi tabata Ed, lo mi laga mi orguyo un banda y cancela e tour,” veterano cantante y compositor Britanico Billy Bragg a conseha.
Grupo Palestino PACBI, cu ta haci campaña pa un boycott cultural di Israel, a pidi Sheeran pa pone Macklemore back riba e tour. “Te ora esey pasa, nos ta pidi artistanan cu ta habri e show, publico y, unda ta posibel, tripulacion pa boicotia e tour cu ta complice,” e grupo a agrega.
“Ta un lastima cu e (Sheeran) ta un hende cu tin suficiente poder y un status asina grandi cu e por a para firme,” Neil March, un escritor di musica cu ta duna les na Institute of Contemporary Music Performance (ICMP) na Londres, a bisa AFP.
Activismo pa Gaza
Desde cu Israel a invadi Gaza na october 2023 despues di e atake mas malo den historia di e pais door di grupo militante Hamas, e cantidad di victima Palestino y e asunto mas amplio di derechonan Palestino a bira poco poco un causa importante den industria di entretenimento.
For di Oscars te Emmys, ceremonianan importante di premio di musica y festivalnan di pelicula Europeo, e guera na Gaza frecuentemente a drenta riba agenda mientras cada bes mas figuranan ta papia y anima otro pa haci mescos.
“Palestina ta mucho mas den atencion cu nunca antes,” Julie Norman, profesor y experto riba e conflicto entre Israel y Palestina na University College London (UCL), a bisa AFP.
“Mi ta kere cu e manera cu mundo a presencia e guera, loke hopi hende a mira como un genocidio pasando na Gaza riba red social, a motiva un generacion nobo rond di e asunto aki den un manera masha diferente cu nunca a mira antes,” Norman, ken tambe ta asociado cu Middle East Programme di Chatham House, a bisa.
“Mi ta kere cu specialmente pa hobennan, sea na Merca, Reino Uni, Europa of rond mundo, esaki ta un di e asuntonan mas importante pa nan,” el a agrega.
Sheeran a yega na fama como un ex-musico di caya apto pa henter famia, cu su estilo simpel y letranan pegahoso cu a hacie un di e artistanan mas scucha via streaming di su generacion.
Den su declaracion e siman aki, el a bisa cu e “no ta uza mi plataforma profesional pa politica”. Pero el a presenta na un concierto den sosten pa Ucrania despues cu Rusia a invadi e pais na 2022 y a firma un carta habri cu tabata adverti contra Brexit na 2018.
El a sostene iniciativa contra pobresa Comic Relief na Gran Bretaña y a bisa corant The Sunday Times na 2017 cu e “tabata stima” e lider izquierdista di Labour Party e tempo ey, Jeremy Corbyn—ken mas despues a keda involucra den un controversia tocante antisemitismo.
“Musica nunca tabata politicamente neutral… esey ta un excuus, y mi no ta kere cu ningun hende ta acepta esaki,” March a bisa AFP.
Gretchen Larsen, un profesor cu ta studia industria di musica na Durham University Business School na Gran Bretaña, a bisa AFP cu e fanaticonan mas fiel di Sheeran probablemente no lo bandon’e, pero hendenan cu ta scucha su musica mas casualmente por distancia nan mes.
“Te cierto punto, su reaccion no ta neutral, pasobra el a permiti e ‘podernan’ ey silencia cierto artista y el a bay hunto cu esaki, pues su prome reaccion ta un posicion politico,” el a bisa.
“Claramente tin bastante incomodidad tocante con a maneha henter e situacion aki,” el a agrega.
