Ayera rond 6:15 di mainta Aruba Weather Watch a registra un temblor di magnitud 3.8 entre Aruba y Venezuela. E temblor aki a pasa 12km noordoost di Cabo San Roman den estado Falcon di Venezuela y a ser registra pa Caribbean Weather Center tambe.
Aunke no a emiti ningun alerta pa e actividad sismico aki, varios usuario riba Facebook a conta cu nan a sinti un temblor leve den varios parti di Aruba. Algun a compara e sentimento como “un truck pasando”, “un vibracion chikito” of “zonido duro”. A base di comentarionan, ta parce cu por a sinti e temblor mas tanto den area di Paradera, Jaburibari y Santa Cruz, cu algun sintiendo e te San Nicolas.
Sinembargo, ta parce cu pa gran parti di poblacion, e temblor a pasa sin cu nan sa.
A pesar di un sacudimento chikito, no a reporta ningun condicion climatico fuera di lo normal. Ta anticipa shelo cu basta nubia pero sin yobida, ademas di biento cu velocidad modera.
Aruba ta keda na alerta di temblor
Desde e temblornan devastador di 7.2 y 7.4 na Venezuela, cual a laga miles di persona morto y mayoria edificio destrui principalmente na Caracas y La Guaira, Aruba a keda na alerta pa actividad sismico den region. E preocupacion a aumenta despues di un otro temblor di 7.5 na Choco, Colombia a resulta tambe den rond di 334 morto y mas cu 600 persona herida.
A pesar cu e temblornan aki no a trece ningun consecuencia pa Aruba, Corsou ni Boneiru, e coincidencia cu dos pais banda di otro a mira temblornan devastador a laga hopi hende cuestiona e tempo ey si e actividad sismico aki ta forma parti di un cadena cu por pronto afecta nos directamente.
Sinembargo—manera Bon Dia Aruba a reporta anteriormente—no tin evidencia cu ta bisa cu esaki ta probabel. Esaki specialmente pasobra a demostra cu e temblornan na Colombia y Venezuela en fin no tabata conecta. Manera a reporta, e temblornan di Colombia tabata asocia principalmente cu e subduccion di e Plachi Nazca bao di e Plachi Sur Americano mientras cu na Venezuela tabata trata di movemento mas superficial ‘strike-slip’ asocia cu e interaccion entre e plachinan Caribense y Sur Americano.
Consecuencianan di cambio climatico ta bira mas visibel
Den un tempo unda reportahenan di desasternan natural ta birando mas frecuente, preocupacion pa seguridad di nos isla chikito a bira mas relevante den e ultimo añanan. A pesar cu Aruba no ta cay den zonanan di horcan of nunca a bira victima di temblornan grave, nos isla ta keda vulnerabel pa cambio climatico, cual por trece cu ne subida di nivel di lama, calor, erosion di costa y presion riba recursonan natural—riesgonan cu por ta specialmente dañino pa Aruba.
Y nos ta sintiendo e efectonan caba. Segun Caribbean Weather Center na comienso di augustus, Aruba y region Caribe por anticipa un aumento den temperatura cu por dura te na 2027—un consecuencia directo di e ‘Super Niño’ anticipa den region Pacifico. Cu esaki den mente, ta importante pa ciudadanonan cuminsa tuma mas precaucion pa cu nan salud y bienestar, por medio di entre otro bebe mas awa y evita solo directo. Di su banda, gobierno tambe mester cuminsa tuma accion pa percura cu Aruba ta keda mas prepara posibel pa fenomenonan climatico den futuro.
Potret di Caribbean Weather Center (CWC).
