Diahuebs atardi gobierno a publica un comunicado den cual minister di Enseñansa Gerlien a afirma cu ta trahando riba fase 2 di e ahuste salarial pa maestro. Na september 2025, sindicato di maestro SIMAR a haya confirmacion di e mandatario cu a cuminsa traha riba e restructuracion, unda e prome fase tabata encera igualacion di salario di maestronan di kleuterschool, basisschool y voorgezet onderwijs. E tempo ey a informa cu aumento den salario lo tuma luga den tres aña, cu un aumento priminti na 2026, 2027 y e ultimo na 2028. Sinembargo, ta parce cu e aumento a keda retrasa, y awor ta anticipa cu e di dos pago lo tuma luga entrante 1 di januari 2028.

SIMAR tin basta tempo ta haciendo yamado pa restructura salario di maestronan. Desde 1990 no tabatin aumento di salario pa maestro. Tambe tabatin diferencianan grandi den salario di maestronan di kleuter, basis school y maestronan di voortgezet onderwijs. Esaki a pone e sindicato yama pa un reunion cu minister Gerlien Croes pa asina yega na un solucion.

Na september 2025 SIMAR a logra habri dialogo cu e mandatario, unda a informa nan cu gobierno ya tabata activamente trahando riba e problema aki y con e restructuracion lo mustra. Un punto importante pa SIMAR pa loke ta trata diferencia di salario ta entre e docentenan cu ta traha na EPB aworaki y e docentenan cu ta traha na EPI, mirando cu EPB a cambia pa un scol MBO awor y EPI ta un scol MBO. Ora a tene e reunion na 2025, SIMAR a trece e preocupacion aki dilanti, haciendo yamado pa tin regulacion aki tambe.

Aunke e comunicado recien di gobierno no a menciona nada di e salario di docentenan na EPI y EPB, a splica si cu ta trahando ainda riba simplifica e scala salarial. Na 2025, SIMAR a conta Bon Dia Aruba cu ta anticipa cu esaki lo mira tur maestronan cu ta den schaal 13 bay schuif pa schaal 34 y tur e otro maestronan di tur e schaalnan lo ricibi un aumento di 3.49% den nan salario. Comunicado di gobierno, sinembargo, no a duna mas detaye riba esaki.

Durante e reunion di 2025 tambe a trece dilanti e cuestion di elimina criterionan di edad vincula na salario. E tempo ey, presidente di SIMAR Angelique Quijada a splica cu no lo cambia edad den prome fase, pero cu si lo anticipa un cambia pa e siguiente aunke no a duna nada concreto. Den e comunicado di gobierno diahuebs, ta indica sinembargo cu e parti aki ainda ta bao investigacion.

Den su comunicado, e mandatario a informa cu durante 2026 a tene varios reunion tocante ehecucion di e structura desea. Na maart y juli, a indica cu a tene audiencia cu sindicatonan pa nan por duna nan input riba areanan cu ta desea un cambio y funcionnan dentro di e veld di enseñansa. Banda di esey, a reuni cu diferente stakeholders pa finalisa e descripcionnan di e funcionnan aki. E mandatario a enfatisa cu na momento cu tin esaki cla, lo present’e na veld di educacion.

Loke ta notabel ta cu reforma ta canando mas lento cu loke sindicatonan a anticipa. Manera a menciona, e di dos pago di salario di fase 1 lo tuma luga na 2028 en bes di 2027 manera a bisa anteriormente. Gobierno a indica cu fase 1 a keda formalisa despues cu a aproba presupuesta di aña 2026. Pa loke e reunionnan cu a tuma luga durante e aña aki, nan lo forma un base pa fase 2 cu ta anticipa pa 2028. Na 2025, a anticipa cu fase lo drenta na vigor februari 2026.