Aumento di temperatura ta sobresali como e preocupacion climatico principal entre participantenan di un estudio na Aruba. Den e encuesta, 52% a indica calor creciente manera e tema cu Aruba mester duna mas prioridad. E investigacion ta forma parti di preparacion pa Aruba su National Adaptation Strategy.
E resultado ta forma parti di e estudio ‘Public preferences towards climate change adaptation in Aruba: a national survey’, prepara pa Institute for Environmental Studies di Vrije Universiteit Amsterdam. E rapport a ser publica e aña aki y ta forma parti di un proyecto pa sostene Aruba den desaroyo di un strategia nacional di adaptacion climatico.
E encuesta a ser conduci entre 29 di october y 19 di december 2025. Un total di 1.045 persona a cuminsa yena e encuesta, pero despues di elimina formulario incompleto y otro respuesta cu no a cumpli cu e criterianan di investigacion, e analisis cuantitativo ta basa riba 556 respuesta completa.
Un di e resultadonan principal ta cu preocupacion pa cambio climatico ta relativamente halto entre e participantenan. Un 88% a indica cu adaptacion na cambio climatico mester ser considera un asunto di urgencia critico, un prioridad principal pa Aruba durante proximo dies aña. Ademas, 76% ta considera cu den futuro cercano nan lo mester haci cambionan importante den algun aspecto di nan bida pa adapta na efectonan di cambio climatico.
E investigadornan a presenta seis tema climatico y a pidi e participantenan indica cua nan ta considera mas importante pa Aruba atende. Aumento di temperatura a sobresali claramente: 52% a pone esaki na prome luga y otro 19% na di dos luga.
E resultado ta notabel pasobra, segun e investigadornan, den discusion tocante cambio climatico riba islanan chikito hopi biaha aumento di nivel di lama ta haya hopi atencion. Den e encuesta na Aruba, sinembargo, preocupacion pa temperatura halto tabata mas grandi.
E percepcion aki no ta limita na loke participantenan ta spera pa futuro. Ora nan a ser puntra tocante cambionan cu nan a sinti durante ultimo cinco aña, 51% a indica cu aumento di temperatura promedio a afecta nan considerablemente. Un 45% a menciona temperaturanan mas extremo, 41% periodo prolonga di secura y tera mas seco, mientras 40% a menciona periodonan cu poco biento.
Ademas, 34% a indica cu nan a reduci nan tempo di actividadnan pafo manera un di e efectonan cu nan a experimenta. Segun e investigadornan, e resultadonan aki ta mustra cu calor no ta ser mira solamente manera un riesgo pa futuro, pero tambe manera algo cu ya ta influencia comportamento y bienestar di algun residente.
E estudio no solamente a puntra cua problema ta preocupa participantenan, pero tambe cua medida nan ta prefera pa adapta na cada riesgo climatico.
Entre e 291 persona cu a pone aumento di temperatura manera nan prioridad principal, 80% a scoge uzo di energia solar, energia di lama y energia di biento pa por mantene ambiente fresco na un manera pagabel y confiabel.
Casi mesun cantidad, 79%, a opta pa planta mas mata y crea mas parke, espacio berde y lugar cu awa den area urbano. Esaki ta pone naturalesa hunto cu energia renobabel entre e solucionnan cu mas sosten a haya entre e grupo cu ta preocupa principalmente pa aumento di temperatura.
Un 72% a prefera mehoracion na cas, scol y hospital, uzando material y sistema cu ta yuda mantene e espacionan mas fresco. Ademas, 52% a opta pa programa nacional di clima y reglanan di construccion cu ta ofrece miho proteccion contra calor.
E preferencianan aki ta haci cu e asunto di calor ta conecta directamente cu e manera cu Aruba ta construi y desaroya su espacionan. E rapport ta indica cu adaptacion na temperatura mas halto por inclui no solamente produccion di energia, sino tambe diseño di edificio, material di construccion, sombra y disponibilidad di vegetacion den area residencial y comercial.
E estudio ta mustra cu participantenan no ta mira solamente medida contra calor manera un aspecto importante. Den varios parti di e encuesta, nan a mustra tambe un preferencia fuerte pa solucionnan cu ta uza y proteha naturalesa.
Ora participantenan mester a indica cua factor ta importante pa nan ora nan evalua un medida di adaptacion, 81% a considera un efecto positivo riba naturalesa manera masha of extremadamente relevante. E investigadornan ta interpreta esaki manera indicacion cu entre participantenan tin reconocemento di e funcion cu ecosistemanan por tin den reduccion di riesgo climatico.
Por ehempel, pa proteccion contra tormenta, yobida y horcan, restauracion di mangel, rif y area humedo tabata entre e opcionnan cu participantenan a scoge frecuentemente. Pa aumento di nivel di lama, proteccion y restauracion di rif, mangel, yerba di lama y vegetacion di costa tambe a haya sosten.
E rapport ta conclui cu e preferencianan no ta apunta exclusivamente na solucion natural. Participantenan tambe a sostene medida tecnico y infrastructural, manera mehoracion di sistema e rioolering, proteccion di caminda y infrastructura esencial, mehora tratamento di awa sushi y fortifica proteccion di costa. Segun e estudio, e resultadonan ta apunta mas bien na un combinacion di naturalesa, infrastructura y tecnologia.
Particularmente den caso di temperatura, e investigadornan ta mira un relacion entre adaptacion climatico y planificacion di espacio. Nan ta señala cu planta mata y crea sombra por ser integra den proyecto nobo di infrastructura, area comercial y bisindario.
E rapport ta menciona tambe e posibilidad di crea mapanan berde pa diferente districto, pa identifica unda mata, sombra y espacio berde por tin mas beneficio. Segun e investigadornan, condicionnan no ta necesariamente igual na tur parti di Aruba y, p’esey, medida pa agrega vegetacion por ser adapta na caracteristica di cada area.
E opinionnan habri di e participantenan ta duna un bista mas amplio riba con e tema ta ser percibi den realidad di Aruba. Algun a relaciona aumento di calor cu perdida di vegetacion y aumento di construccion. Den e analisis di e respuestanan, preocupacion tocante perdida di espacio natural y degradacion ambiental ta aparece varios biaha.
E punto aki ta importante pa interpretacion di e encuesta. Pa algun participante, adaptacion na calor no ta solamente cuestion di instala sistema pa refresca edificio. Nan ta mira proteccion di vegetacion, espacio berde y naturalesa como parti di e solucion tambe.
E estudio a analisa tambe si factornan manera edad, nivel di educacion, entrada y sexo tin influencia riba e manera con participantenan ta percibi cambio climatico. Educacion a aparece manera un factor relevante den varios resultado. Participantenan cu nivel mas halto di educacion tabata mas inclina pa atribui cambio climatico na actividad humano y pa pensa mas frecuentemente tocante e tema.
E rapport ta señala cu diferencia entre gruponan por ta un aspecto importante ora autoridad ta prepara informacion y programa di adaptacion. E investigadornan ta menciona, entre otro, uzo di rednan social y integracion di informacion climatico den educacion, cu comunicacion disponible den idioma accesibel, incluyendo Papiamento, Hulandes, Spaño y Ingles.
E investigadornan ta aclaria cu e resultadonan tin algun limitacion. Participacion na e encuesta tabata boluntario y e participantenan no a ser scogi sin un patronchi specifico. P’esey, e grupo cu a participa no ta representa poblacion di Aruba den su totalidad.
E rapport ta indica cu algun grupo tabata menos representa, mientras otro tabata mas representa. Esaki ta nifica cu e porcentahenan mester ser interpreta manera opinion di e participantenan di e estudio y no automaticamente como porcentahe exacto di henter poblacion di Aruba. E investigadornan ta recomenda cu encuesta den futuro por uza otro metodo pa logra representacion mas balansa di diferente grupo den sociedad.
A pesar di e limitacion aki, e estudio ta ofrece un indicacion amplio di cua aspectonan di cambio climatico ta preocupa e participantenan y cua tipo di solucion nan ta considera importante.
Den e resultado, aumento di temperatura ta sobresali claramente. E preocupacion ta ser compaña pa preferencia pa mas energia renobabel, mas mata y espacio berde, edificio cu ta keda mas fresco y regla di construccion cu ta tene cuenta cu calor.
E informacion aki lo forma parti di e base di conocemento pa desaroyo di Aruba su strategia nacional di adaptacion climatico. E reto, segun e rapport, no ta solamente prepara pa cambionan cu por presenta den futuro, sino tambe atende efectonan cu algun residente ta indica cu nan ya ta sinti actualmente.
