Gobierno Hulandes ta proyecta gasta mas di 28 miyon euro entre 2026 y 2031 riba e organisacion cu ta sostene supervision financiero di Aruba, Corsou, Sint Maarten y islanan BES. E cifranan a sali den un documento nobo cu Secretario di Estado pa Asuntonan Interno y Relacionnan den Reino, Eric van der Burg, a manda pa Tweede Kamer contestando preguntanan tocante gasto publico riba diferente organo y comision, incluyendo College Aruba financieel toezicht, CAft.
E preguntanan di parti di miembro di Tweede Kamer, Mona Keijzer tabata dirigi na diferente ministerio Hulandes. Cu e preguntanan aki, e parlamentario kier a haya mas claridad tocante e cantidad di placa publico cu ta bay na diferente organo, comision y organisacion no gubernamental, e manera cu nan ta ser financia y e papel cu nan por hunga den desaroyo di maneho.
Den su contesta, gobierno Hulandes ta dedica atencion specifico na e colegionan di supervision financiero den Reino. College financieel toezicht Curaçao en Sint Maarten, Cft, no ta cay bao di e ley general Hulandes pa organonan di conseho. Su tarea, organisacion y manera di traha ta ser determina, entre otro, den Rijkswet financieel toezicht Curaçao en Sint Maarten.
E cifranan presenta no ta solamente pa Cft di Corsou y Sint Maarten. Nan ta cubri e organisacion completo cu ta haci trabao pa Cft Curaçao en Sint Maarten, Cft BES y College Aruba financieel toezicht (CAft). CAft ta e instancia cu ta supervisa finanzas publico di Aruba y su trabao ta basa riba Landsverordening Aruba financieel toezicht.
Segun Gobierno Hulandes, e meta di e colegionan ta contribui, hunto cu gobiernonan di e diferente parti di Reino, na finanzas publico sostenibel.
Pa 2026, tin 6,063 miyon euro presupuesta pa e colegionan di supervision financiero. E suma ta baha na 4,519 miyon euro na 2027 y 4,308 miyon euro na 2028. Pa 2029, e cifra ta subi na 4,735 miyon euro, sigui pa 4,624 miyon na 2030 y 4,612 miyon euro na 2031.
Hunto, esaki ta representa aproximadamente 28,9 miyon euro durante seis aña. Sinembargo, e documento no ta specifica cuanto di e suma ta destina exclusivamente pa CAft Aruba. Tampoco e ta indica cuanto ta bay na Cft di Corsou y Sint Maarten of na Cft BES. P’esey, e casi 29 miyon euro no por ser presenta como gasto exclusivamente riba supervision financiero di Aruba.
E gastonan ta ser cubri via Hoofdstuk IV Koninkrijksrelaties, articulo 6, di presupuesto Hulandes. Esaki ta nifica cu e recursonan pa funcionamento di e structura di supervision financiero den Reino ta sali for di presupuesto destina pa Relacionnan den Reino.
E documento no ta anuncia ningun cambio den tarea of autoridad di CAft, ni e ta presenta un evaluacion nobo di situacion financiero di Aruba. E informacion nobo ta duna principalmente un bista riba e gastonan cu gobierno Hulandes ta proyecta pa funcionamento di e structura durante proximo añanan.
Den e contexto mas amplio, gobierno Hulandes ta splica cu consehonan entrega pa diferente organo independiente no ta obligatorio pa gobierno sigui. E organonan por aporta conocemento y recomendacionnan, pero gobierno ta evalua nan, tuma su decision y despues ta duna cuenta na Parlamento.
Pa Aruba, e cifranan ta duna un bista mas cla riba e recursonan cu Hulanda ta pone disponibel pa e sistema di supervision financiero den Reino, di cual CAft ta forma parti. Sinembargo, e documento no ta specifica cuanto di e gasto proyecta entre 2026 y 2031 ta destina directamente pa supervision financiero di Aruba.
