Ex-minister Otmar Oduber a anuncia cu e lo apela e sentencia cu Corte Comun di Husticia (Hof) a dicta den su contra den caso Flamingo. Den un declaracion por escrito fecha dia 22 di september, Oduber a indica cu e lo sigui su defensa usando e medionan legal disponibel. El a indica cu tin argumento y elemento presenta pa su defensa cu merece ser examina di nobo.

Hof a condena Oduber dia 17 di september na dos aña di prison. Ademas, durante cinco aña e no por ser eligi den un organo representativo ni ocupa un funcion publico. E sentencia ta mas severo cu esun dicta den Prome Instancia na januari 2025. Ministerio Publico tabata pidi tres aña di prison den apelacion.

Den su declaracion, Oduber a bolbe indica cu e ta respeta decision di Corte, pero cu e no ta comparti e conclusionnan. E ex-mandatario ta sostene cu e actonan cu a forma parti di e proceso tabata relaciona cu decisionnan tuma durante su periodo como minister y cu, segun su posicion, nan tabatin como meta atende necesidadnan manera vivienda, trabao y oportunidad pa habitantenan di Aruba.

Oduber a dedica gran parti di su declaracion na e diferencia cu, segun e, ta existi entre e garantia constitucional pa minister na Hulanda y e procedemento aplicabel na Aruba. El a cuestiona pakico minister Hulandes tin un procedemento constitucional particular pa cierto delito relaciona cu ehecucion di nan cargo, mientras cu na Aruba ta aplica otro procedemento.

Den e contexto ey, Oduber a presenta su posicion manera un discusion mas amplio tocante igualdad dentro di Reino. E ta sostene cu su critica no ta dirigi contra Hulanda ni contra pueblo Hulandes, pero contra loke e ta considera un diferencia den garantia institucional entre e paisnan. El a relaciona esaki tambe cu su posicion na fabor di un autonomia mas fuerte pa Aruba.

E ex-minister a enfatisa cu e no ta pidi impunidad ni un trato privilegia. Segun e, su punto ta cu Aruba y su ciudadanonan mester por conta cu garantia efectivo y trato igual dentro di Reino. Tambe el a sostene cu cuestiona un decision hudicial of diferencia entre sistemanan no ta mescos cu falta di respet pa ley.

Tocante e caso penal mes, Oduber a rechasa e idea cu su actonan tabata motiva pa beneficio personal. Sinembargo, den caso Flamingo Hof a considera cu tin suficiente prueba pa varios di e acusacionnan, entre otro fraude contra pais Aruba relaciona cu nombramento algun persona como funcionario publico sin cu nan tabata ehecuta e funcion corespondiente.

Den e parti relaciona cu reparticion di tereno, Hof no a considera cu tin suficiente prueba pa tur e acusacionnan. Oduber a ser absolvi di fraude contra pais Aruba riba e punto specifico ey, aunke Hof si a considera tabatin suficiente prueba pa condena Oduber pa abuso di su funcion.

Cu su declaracion, Oduber ta laga cla cu e proceso hudicial di su parti no ta caba cu e sentencia di Hof. El a indica cu e lo sigui defende su posicion a traves di e posibilidadnan legal cu ainda ta habri.